اقش-تا ەكس-پرەزيدەنت قاماۋعا الىندى

پەرۋدىڭ بۇرىنعى پرەزيدەنتى الەحاندرو تولەدو اقش-تا ۇستالدى دەپ حابارلايدى ؛qamshy.kz اقپارات اگەنتتىگى el comercio سايتىنا سىلتەمە جاساپ.

وعان ءوز ەلىندە سىبايلاس جەمقورلىق فاكتىلەرى بويىنشا قىلمىستىق ءىس قوزعالىپ, ىزدەۋ جاريالانعان. اقش پەرۋدىڭ ءوتىنىشى بويىنشا ساياساتكەردى قاماۋعا العان. بۇل تۋرالى وڭتۇستىك امەريكا رەسپۋبليكاسىنىڭ باس پروكۋرورى مالىمدەدى.

2017 جىلدىڭ اقپان ايىندا پەرۋ سوتى 2001 جىلدان باستاپ 2006 جىلعا دەيىن ەل پرەزيدەنتى بولىپ قىزمەت ەتكەن تولەدونى قاماۋعا الۋ تۋرالى ۇكىم شىعاردى. ونىڭ ۇستىنەن برازيليانىڭ odebrecht قۇرىلىس كورپوراسياسىمەن اۋىزجالاسىپ, زاڭسىز كەلىسىمشارتقا وتىرۋ جانە جەمقورلىق بويىنشا ءىس قوزعالعان.

تەرگەۋشىلەر كەلتىرگەن دەرەككە سۇيەنسەك, ەكس-پرەزيدەنت پەن ونىڭ ماڭىنداعى شەندىلەر برازيليالىق كومپانيادان 20 ميلليون دوللار كولەمىندە پارا العان. odebrecht پارانى ءىرى اۆتوجول قۇرىلىسى بويىنشا ءتيىمدى كەلىسىمشارتقا قول جەتكىزگەنى ءۇشىن بەرگەن.

تولەدوعا بىردەن ىزدەۋ جاريالانعان, ءبىراق ەلىن تاستاپ, قاشىپ ۇلگەرگەن. ول 2013 جىلى اقش ازاماتتىعىن الىپ العان بولىپ شىقتى.