پاتەردەن جىلاپ شىقتى: قىتايدا قازا تاپقان قىزدىڭ سوڭعى ساتتەرى تاسپاعا ءتۇسىپ قالعان

چانچجوۋداعى ەڭ مىقتى ۋنيۆەرسيتەتتىڭ بىرىنە گرانتقا تۇسكەن قانداسىمىزدىڭ ءومىرىنىڭ سوڭعى ساتتەرى تاسپاعا ءتۇسىپ قالعان ؛دەپ حابارلايدى qamshy.kz اقپارات اگەنتتىگى ؛كتك ؛تەلەارناسىنا سىلتەمە جاساپ. ؛

ىس سۋيسيد دەپ جابىلعان. قىتايدا جۇمباق جاعدايدا قازا تاپقان ستۋدەنت قىزدىڭ تۋىستارى ادىلەتتىلىككە قول جەتكىزە الماي ءجۇر.

سانديرا سەرىكحان نۇر-سۇلتانداعى ەڭ ماقتاۋلى گيمنازيانىڭ تۇلەگى. نەبارى 16 جاسىندا قىتاي ءتىلىن مەڭگەرگەن قىز بىردەن گرانتقا وقۋعا تۇسكەن. الايدا, قىتايعا ارمان ارقالاپ كەتكەن قاراكوزىمىزدىڭ ەلگە تابىتى كەلدى. سونداعى پوليسيانىڭ رەسمي مالىمەتى بويىنشا, ساباعىن 5-كە وقىپ جۇرگەن قىز ءوز ەركىمەن ء17-شى قاباتتان سەكىرىپ كەتكەن.

"سانديرا سۋيسيد جاسادى دەگەنگە سەنبەيمىز. ول جازعى دەمالىسقا ۇيگە جينالىپ جاتقان. سول كۇننىڭ الدىندا عانا ۆيدەومەن سويلەستىك. باۋىرلارىنا ساتىپ العان سىيلىقتارىن كورسەتىپ, اناسىمەن ماز-مەيرام بولعان. قىزىمىزدى ادەيى ءولتىرىپ وتىر", - دەيدى مارقۇم قىزدىڭ ناعاشى اپكەسى ءالنۇر اعاەۆا.

قىزدىڭ ينستاگرامىنان بەلگىلى بولعانىنداي, سول كۇنى سانديرانى بايان دەگەن باسقا ءبىر ستۋدەنت كلۋبقا بارايىق دەپ قويماي, اقىرى كوندىرىپتى. وندا ؛ماديار جانە دانيار دەگەن دوستارىمەن تانىستىرعان. كەش سوڭىندا دانيار پاتەردەن ءبىر زات الۋ كەرەك دەگەن سىلتاۋمەن بىرگە بارۋىن ءوتىنىپ قويماعان ەكەن. قىز كەلىسكەنىمەن, تابالدىرىقتان ءارى اتتاعىسى كەلمەي تۇرعانى پودەزدەگى تاسپاعا ءتۇسىپ قالعان. ۆيدەودا جىگىت قىزدى جەتەكتەپ كىرگىزگەن دەيدى ءالنۇر اعاەۆا. ءبىرازدان سوڭ سانديرا پاتەردەن جىلاپ شىعادى. ءارى قارايعى جاعداي تاسپادان تىس جەردە جالعاسقان.

جىگىتتىڭ ايتۋىنشا, قىزدىڭ ء17-شى قاباتتان قالاي قۇلاپ كەتكەنى ەسىندە جوق. نە ءۇشىن جىلاپ جۇرگەنىن دە ءتۇسىندىرىپ بەرە الماپتى.

"دانيار يمانقۇلوۆ دەگەن جىگىت شىمكەنتتەن. قىز نەگە جىلادى دەگەن سۇراققا جاۋاپ بەرە المادى. ايتۋىنشا, ءوزى دە شوكتا بولعان", - دەپ تولىقتىردى سانديرانىڭ ناعاشى اپكەسى.

بىلمەيمىن دەپ باسىن الا قاشقان جىگىت سول كۇيى قاراسىن باتىرىپتى. ۇشەۋى دە وقۋ ورنىنا ىزدەپ بارعان قىزدىڭ اكەسىمەن جولىعۋدان باس تارتىپ, تەلەفوندارىن ءسوندىرىپ تاستاعان. تۋىستارى زورلىق-زومبىلىق جاسالدى ما دەپ كۇدىكتەنەدى. ودان قالدى, قىزدىڭ ءبىر اياق كيىمى تەرەزەنىڭ تۇسىندا قالىپ قويعان.  ؛جاقتاۋدان ساۋساق ىزدەرى تابىلماعان. سول سەبەپتى دە ونى بىرەۋدىڭ لاقتىرىپ جىبەرگەنىنە سەنىمدى. ءبىراق مۇنى دالەلدەۋ مۇمكىن بولماي تۇر. سەبەبى, زاڭى قاتال قىتاي ءمايىتتى 30 كۇن تەكسەرەدى ەكەن. مۇنشاما ۋاقىت كۇتە الماعان وتباسى قىزدىڭ دەنەسىن ساراپتاماسىز ەلگە اكەلۋگە ءماجبۇر بولعان. ال ءىس "سۋيسيد" دەپ جابىلىپ تىنعان. ەلىمىزدىڭ ديپلوماتتارى ءىستى قايتا قاراۋدى سۇراپتى. ءبىراق قورىتىندىسى وزگەرمەگەن.

"قىتاي تاراپى بۇل ءىستى قايتا قاراپ شىقتى. ونىڭ ناتيجەسى بويىنشا جازاتايىم وقيعا بولىپ شىقتى", - دەپ ءتۇسىندىردى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.

نەبارى 19 جاستاعى سانديرا سەرىكحان ءۇيىنىڭ ۇلكەنى ەكەن. وتباسىندا 4 بالا. كىشكەنتاي باۋىرلارى اپكەسى كەلەدى دەپ كۇندە كۇتىپ ءجۇر.  ؛ ؛