اياق-قول ءوسىپ شىقپايدى: مۇگەدەكتىكتى راستاۋداعى باسسىزدىقتار

مۇگەدەكتىكتى راستاۋ توڭىرەگىندەگى باسسىزدىقتار ءالى دە تىيىلار ەمەس ؛دەپ حابارلايدى qamshy.kz اقپارات اگەنتتىگى ؛ەۋرازيا ؛بىرىنشى ارناسىنا سىلتەمە جاساپ. ؛

دەپۋتاتتاردىڭ ءاردايىم ساۋال جولداپ وتىرعانىن دا ەشكىم پىسقىرىپ جاتقان جوق. سالاداعى شەكتەن شىققان بيۋروكراتيا قاشان توقتايدى؟ ؛

اياعى جوق ادام ونىڭ قايتا ءوسىپ شىقپاعانىن جىل سايىن دالەلدەمەۋى كەرەك.

لۋنارا رىسپايقىزى بۇلشىق ەت ديستروفياسى دەرتىنە شالدىققان جان. سۇيەگى مورت سىنعىش كەلەدى. ارباعا تاڭىلعان. اربانى دا ءوز اقشاسىنا العان. تۇقىم قۋالايتىن دەرتتىڭ شيپاسىن تابۋ مۇمكىن ەمەس. الايدا, 20 جىل بويى لۋنارا مۇگەدەكتىگىن دالەلدەۋمەن ءجۇر. ءومىر بويى وسىلاي جۇرەمىن بە دەپ قاپالانادى. جامبىلداعى اپكەسىندە دە تۋرا سول اۋرۋ ەكەن. ءبىراق ونىڭ ءومىر بويى مۇگەدەك دەگەن ستاتۋسى بار, ال لۋنارادا جوق. ؛

ء"ومىر باقيعا ءالى بەرمەي جاتىر. 1-توپتى ەكى جىل بۇرىن بەردى. ەندى 7 جىل دەگەن. ءالى مەنىڭ 4-5 جىلىم بار. ءبىراق, مەنىكى تۇقىم قۋالايتىن اۋرۋ. دارىگەرلەر بۇل اۋرۋدىڭ قانداي ەكەنىن جاقسى بىلەدى", - دەيدى 1-توپتاعى مۇگەدەك لۋنارا رىسپايقىزى.

ماسەلەنىڭ كوتەرىلىپ كەلە جاتقانى بۇگىن دە ەمەس, كەشە دە ەمەس. ونداعان جىل بولدى. ەستىپ جاتقان ەشكىم جوق. جاقىندا سەناتورلار تاعى ءبىر مارتە ساۋال جولداپ كوردى.

"مىسالى, اقتوبەلىك ازامات ءبىر جىلدان استام ۋاقىت مۇگەدەكتىگىن راسىمدەي الماعان. اياعىنان ايىرىلعان ول قۇجاتىنا ءبىر جىل دەگەندە اۋپىرىمدەپ قول جەتكىزدى. ءبىراق ءبىر جارىم ايدان سوڭ كوز جۇمدى. مۇگەدەكتىكتى راستاۋ مەن قايتا راسىمدەۋ ىسىندە جەمقورلىق ءقاۋپى جوعارى. زاڭ نورمالارى اياعى نە بۇيرەگى سياقتى ورگانىنان ايىرىلعان ادامدارعا ءومىر بويعى مۇگەدەكتىك الۋعا مۇمكىندىك بەرەدى. الايدا, ءىس جۇزىندە ول ورىندالمايدى", - دەيدى قر پارلامەنت سەناتىنىڭ دەپۋتاتى ناريمان تورەعاليەۆ.

اشىق دەرەككوزدەردە بار اقپاراتتار بويىنشا ەلىمىزدە 670 مىڭ مۇگەدەك بار. ماسەلەنىڭ اۋقىمىن وسىدان-اق باعامداۋعا بولادى. مادينا ءابىلقاسىموۆانى الماستىرعان ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ ەسەپ بەرۋ جيىنىن وتكىزىپ ەدى. پوزيسياسىن انىق ءبىلدىردى.

"ول دەگەن ەندى بولمايدى. قولى جوق بولسا, ءبىر جىلدان كەيىن ءقايتىپ قول پايدا بولمايدى عوي. سوندىقتان ول بولمايدى. ءبىز ونى...ول ءومىر باقي ءتيىستى جاردەماقىسىن الىپ تۇرۋ كەرەك", - دەدى قر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ.

ماسەلەنىڭ شەشىلەر كۇنى الىس ەمەس, دەيدى مينيستر. قازىرگى ۋاقىتتا دەنساۋلىق ساقتاۋ, الەۋمەتتىك قورعاۋ سالالارىندا اقپاراتتىق پلاتفورمالار بار. ءبىراق, ەلەكتروندى جۇيەلەر ءالى بىر-بىرىمەن اقپارات الماسا الماي جۇرگەن كورىنەدى. تەك 7 وڭىردە تاجىريبە جۇمىستارى ەندى ءجۇرىپ جاتىر. ؛