قارا كيىم, قارا بەتپەردە. "؛پوليسەيلەر بۇزاقى بوپ كەتكەن بە؟"؛

بۇگىن, ياعني, 5 ماۋسىم كۇنى الماتىدا تانىمال جۋرناليست, قوعام بەلسەندىسى ساۋلە ءابىلداحانقىزىنا قاستاندىق جاسالدى. ناقتىراق ايتساق, اي مەن كۇننىڭ امانىندا الماتىداعى قۇزىرلى ورگانداردىڭ ءبىرى سانالاتىن - ناۋرىزباي اۋداندىق ءىىب عيماراتى ماڭىندا بەلگىسىز ءبىر توپ ايەل ءىىب-نان شىققان ءجۋرناليستى اياۋسىز سوققىنىڭ استىنا العان. ءابىلداحانقىزىنىڭ ايتۋىنشا, دەنەسىنەن ۇرىپ, شاشىنان جۇلعان. ول اۋىر سوققىنىڭ سالدارىنان الماتىداعى  ؛№7 اۋرۋحاناعا جەتكىزىلدى.

بىر كۇندە ءتورت شاقىرتۋ

اڭگىمەنى ارىدەن تارقاتساق. كۇنى كەشە, ياعني, 4 ماۋسىمدا ساۋلە ءابىلداحانقىزى facebook پاراقشاسىندا ۇيىنە ءبىر كۇندە ءتورت رەت پوليسيا قىزمەتكەرلەرى كەلگەنىن جانە ۇستىنەن وزىنە تانىس ەمەس ادامداردان بىرنەشە ارىز تۇسكەنىن جازعان. ؛ پوليسيا قىزمەتكەرلەرى كەلگەن ءساتتى تىكەلەي ەفيرگە ءتۇسىرىپ, جەلى قولدانۋشىلارىمەن بولىسكەن ول ءوزىنىڭ ۇستىنەن بىرنەشە ارىزدىڭ ءتۇسۋىن قوعامداعى بەلسەندىلىگىمەن ءھام ساياسي كوزقاراسىمەن بايلانىستىردى.

بۇل ىسكە پوليسەيلەردىڭ قانداي قاتىسى بار؟

ال 5 ماۋسىمدا ؛بەلسەندىنى ناۋرىزباي اۋداندىق ىشكى ىستەر ءبولىمىنىڭ قىزمەتكەرلەرى ەرتەڭگى ساعات 10-دار شاماسىندا ۇيىنەن اكەتىپ, اتالعان اۋداننىڭ ىشكى ىستەر بولىمىنە جەتكىزگەن. ول جەردە ۇلجالعاس ساتقىنباەۆا ەسىمدى ازاماتشانىڭ ارىزى بويىنشا ساۋلە ءابىلداحانقىزىن ءۇش ساعات بويى تەرگەپ, ۇيىنە بوساتادى. ءبىراق, ءبىراق...

ابىلداحانقىزىن قولداۋعا بارعان كوپ بالالى انالاردىڭ ءبىرى: "مىنە, وسى جەردەن پولەيسەيلەردىڭ "قۇيتىرقى" ارەكەتتەرى باستالدى. قۇزىرلى ورگاندا قىزمەت قىلىپ جۇرگەن "پوگوندى كىسىلەردى" كىنالاۋدان اۋلاقپىن. دەيتۇرعانمەن, ىستەگەن ىستەرىنە قاراعاندا, ارتتارى تازا ەمەس-اۋ, بۇلاردىڭ! بىرىنشىدەن, ساۋلەنى پوليسەيلەر العاشقى كىرگەن ەسىكتەن ەمەس, بولىمشەنىڭ باسقا ەسىگىنەن سىرتقا شىعارعان. نەگە؟ سەبەبى كىرگىزگەن ەسىكتىڭ الدىندا ءبىز (كوپ بالالى انالار, باق وكىلدەرى جانە تاعى دا باسقا قولداۋعا كەلگەن ادامدار) كۇتىپ تۇردىق. ەكىنشىدەن, بىزگە ناۋرىزباي پولەيسەيلەرى "المالى اۋداندىق ءىىب-نا بارىڭىزدار, ساۋلە ءابىلداحانقىزىن سول جاققا الىپ كەتتى" دەگەن جالعان اقپارات بەردى", - دەيدى.

پوليسەيلەردىڭ "كۇدىكتى ارەكەتى" بۇل عانا ەمەس. ماسەلەن, ءابىلداحانقىزىنىڭ ايتۋىنا قاراعاندا, پوليسەلەر بولىمشە ەسىگىنەن شىعارعان سوڭ ءوزى مۇلدەم تانىمايتىن بىرنەشە ايەل ؛ ء"بىز سەنى قولداۋعا كەلدىك" دەپ جاقىنداي بەرگەندە, ؛ جابىلىپ سوققىعا جىققان. ال ءابىلداحانقىزىنا ؛ بولىمشەگە شاقىرتۋ الىپ كەلگەن پوليسەيلەردىڭ قاسىندا بولعان "قارا كيىم, قارا بەتپەردەلى ەر ازامات" بۇل جاعدايدى باستان-اياق ۆيدەوعا ءتۇسىرىپ تۇرعان.

سوندا قۇزىرلى ورگان وكىلدەرنىڭ قاسىندا جۇرگەن بۇل بەيتانىس كىسى كىم؟ پوليسەي مە؟ ەگەر سولاي بولسا, الماتىلىق پولييسەيلەر قاشاننان بەرى توبەلەستى باقىلاپ تۇراتىن بولعان؟ قازاقستاننىڭ باس پوليسەيى ەرلان تۇرعىنباەۆ مىرزا دا, ونىڭ وكىلدەرى دە بۇل سۇراقتارعا ءالى جاۋاپ بەرە قويمادى. دەسە دە, ءجۋرناليستى سوققىنىڭ استىنا الىپ, جازىقسىزدان جازىقسىز جاپا شەكتىرگەن بۇل ىسكە قر ءىىم جۋىق ارادا جاۋاپ بەرەدى دەگەن ويدامىز. ؛

ساۋلە ءابىلداحانقىزى تۇسكەن №7 اۋرۋحانانىڭ باس دارىگەرى قۋانىش جانبولات ؛ازاتتىق راديوسىنىڭ ؛تىلشىسىنە ءابىلداحانقىزىنىڭ دەنەسىندە تىرنالعان جەرلەر بارىن ايتىپتى.

"قولدارى, دەنەسى تىرنالعان. ونىڭ ءبارىن جازىپ بەرەمىز. باسىن رەنتگەنگە, ءىش-قۇرىلىسىن ۋزي-گە تۇسىردىك. سىنعان جەرى جوق, ىشكى اعزالارى امان. حيرۋرگ, تراۆماتولوگ, نەيروحيرۋرگ دارىگەرلەر قارادى. قولىنا قاعازدارىن بەرىپ, قانداي ءدارى ءىشۋ كەرەگىن ايتىپ, ۇيىنە قايتاردىق", - دەدى دارىگەر.

جۋرناليست ساۋلە ءابىلداحانقىزى سوڭعى كەزدەرى قوعامدا بەلسەندىلىگىمەن تانىلدى. ماسەلەن ول 2018 جىلى قىتاي قازاق شەكاراسىنان زاڭسىز وتكەن ەتنيكالىق قازاق سايراگۇل ساۋىتبايدىڭ ىسىنە ادۆوكات ابزال قۇسپانمەن بىرگە بەلسەنە ارالاسقان. ال اعىمداعى جىلدىڭ اقپان ايىنان باستاپ كوپ بالالى انالاردىڭ ءسوزىن سويلەپ, ولاردىڭ الەۋمەتتىك ماسەلەسى شەشىلۋ ءۇشىن بىرنەشە مارتە اكىمدىككە تالاپتارىن قويعان. ؛

ايتا كەتەيىك, بۇل جىل باسىنان بەرى قازاقستاندا قوعام بەلسەندىلەرىنە جاسالعان ءبىرىنشى قاستاندىق ەمەس. جۋىردا عانا قاراعاندى وبلىسىنىڭ جاڭاارقا اۋدانىندا قوعام بەلسەندىسى عالى باقتىباەۆتى ايەلىنىڭ كوزىنشە اتىپ ولتىرگەن. قىلمىسكەرلەر ءالى ۇستالعان جوق.

 ؛

 ؛