"؛ولاردىڭ ماقساتى – قازاقتىڭ رۋحىن سىندىرىپ, قىتاي تىزىمىنە الىپ, قازاقستاندى جاۋلاپ الۋ"؛(ۆيدەو)

30 مامىردا جۋرناليست ينگا يمانباي جۇرگىزەتىن "پوليتون" تاۋەلسىز كلۋبىنىڭ كەزەكتى وتىرىسى وتتى دەپ جازادى qamshy.kz اقپارات اگەنتتىگى. 

تاۋەلسىز كلۋبتىڭ كەزەكتى وتىرىسىنا قۇقىق قورعاۋشى اينا شورمانباەۆا, ازاماتتىق بەلسەندى ىرىسبەك توقتاسىن, قىتايداعى تۇزەتۋ لاگەرىندە بولىپ كەلگەن قازاق ورىنبەك كوكسەبەك قاتىسىپ, قىتايداعى قازاقتاردىڭ جاعدايى تالقىلاندى. وتىرىستا بۇل تاقىرىپتىڭ تالقىلانۋىنا كۇنى كەشە قىتايدىڭ قازاقستانداعى ەلشىسى چجان سياونىڭ قازاقستان جۋرناليستەرىنە شىڭجاڭدا قازاقتارعا قىسىم جاسالىپ جاتقانى تۋرالى حابارلاردى "جالعان اقپارات" دەگەنى سەبەپ. ەستەرىڭىزدە بولسا, 28 مامىردا نۇر-سۇلتاندا قازاق-قىتاي قاتىناسىنا ارنالعان جيىندا چجان سياو سوڭعى 2-3 جىلدا قازاقستاندا ءجيى ايتىلعان شىڭجاڭداعى ساياسي تۇزەتۋ لاگەرى تۋرالى اقپاراتتى تەرىسكە شىعارعان.

–شىڭجاڭداعى جاعداي ءبىرقالىپتى. شىڭجاڭداعى شارالار - تەرروريزم جانە ەكسترەميزممەن كۇرەسۋ ارەكەتى, – دەدى قىتاي ەلشىسى.

ال قىتايداعى ساياسي تۇزەتۋ لاگەرىندە بولىپ كەلگەن ورىنبەك كوكسەبەك ەلشىنىڭ ءسوزىن جالعان دەپ وتىر.

"قىتايدا مەنى قاماعان جەر – ول تۇرمە. ولاردىڭ (قىتايلاردىڭ-رەد) ماقساتى – قازاقتىڭ رۋحىن سىندىرىپ, قىتاي تىزىمىنە الىپ, قازاقستاندى جاۋلاپ الۋ. مەن ءوزىم العاش رەت سول جەرگە كىرگەن كەزدە قىتايشا ءۇش ولەڭ جازىپ بەردى. سول ءۇش ولەڭنىڭ بىرەۋىن ءبىر جارىم اي جاتتادىم. ول جاقتا كۇنىم جىلاۋمەن وتەتىن. مەنىڭ ول جەردە ادامدىق قۇقىعىم تاپتالدى. ويتكەنى مەن ەشقانداي قىلمىس جاساعان جوقپىن. ول جەردى ساياسي ۇيرەنۋ لاگەرى دەپ ايتا المايمىن. ساياسي ۇيرەنۋ بولسا, ول جەردەگى ادامدار ءوز ەركىمەن وقيتىن ەدى عوي. ول – تۇرمە. مەن ونى دالەلدەي الامىن. ويتكەنى مەن العاش رەت سول جەرگە تۇسكەندە جەتى كۇن كىسەنمەن جاتتىم. جەتى كۇندە مەنى شۇڭقىرعا سالىپ, باسىما سۋ قۇيدى. ودان كەيىن دە ءبىزدى كىسەنمەن الىپ جۇرەتىن", – دەدى ورىنبەك كوكسەبەك. 

ونىڭ بۇل ءسوزىن قۇقىققورعاۋشى اينا شورمانباەۆا دا قۋاتتاپ وتىر. شورمانوۆانىڭ ايتۋىنشا, قۇقىق قورعاۋ ۇيىمدارىنا كوپتەگەن قىتايدان كەلگەن ۇلتى قازاق ازاماتتار ول جاقتا قۇقىقتارنىڭ تاپتالىپ, زاڭسىز قامالعاندارىن ايتىپ شاعىمدانعان. 

ال ازاماتتىق بەلسەندى ىرىسبەك توقتاسىننىڭ ايتۋىنشا, قىتايدا ساياسي وقىتۋ لاگەرلەرى ءالى دە جۇمىس جاساپ جاتىر.

"قازاقستان سىرتقى ىستەر مينيسترلىگى بۇل ماسەلەگە ارالاسقانى شىندىق. ءبىراق كىمدەر ارىزداندى, سول ادامداردىڭ تاعدىرىنا عانا ارالاستى. ءبىزدىڭ ۇكىمەت قازاقستاندا تۋىستارى بار ادامداردىڭ ارىز جازۋىنان كەيىن تىكەلەي سول ادامداردىڭ عانا ىسىنە ارالاستى. سونىڭ ارقاسىندا بوساپ شىعىپ جاتقاندار بار. ءبىراق قازاقستاندا تۋىسى جوق, ارىز جازباعان ادامدار ءالى سول جاقتا جاتىر. ءبىزدىڭ قوعامدىق ۇيىمعا قىتايدا قازاقتاردى ساياسي وقىتۋ لاگەرىنە قاماپ جاتقانى تۋرالى حاتتار ءالى كەلىپ جاتىر", – دەيدى ازاماتتىق بەلسەندى ىرىسبەك توقتاسىنوۆ.

دايىنداعان: ميات كاشىباي