يسلامنىڭ ايەلگە كوزقاراسىن بەرىدەگى قارا نيەتتىلەر بۇرمالاعان...

قازىر الەمدە گەندەرلىك ساياسات, گەندەرلىك تەڭدىك دەگەن كولەمدى ناۋقان ءجۇرىپ جاتىر. سۇرايتىندارى – ايەل تەڭدىگى. بيلىكتە دە, قوعامدا دا تەڭدىك بولۋىن تالاپ ەتەدى.

قازاقستانداعى گەندەرلىك تەڭدىك ماسەلەسىنىڭ اۋقىمدى كوتەرىلگەنىنە, رەسمي ءسوز بولا باستاعانىنا كوپ بولا قويعان جوق. وسىعان وراي, qamshy.kz اقپارات اگەنتتىگى الاش قايراتكەرى – ءسابيت دونەنتاەۆتىڭ 1918 جىلى ايەل تەڭدىگى ماسەلەسى تۋراسىندا نە ايتقانىن وقىرمان نازارىنا ۇسىنباق. ماقالا "قازاق ايەلدەرى تۋرالى" دەگەن اتپەن "اباي" جۋرنالىنىڭ بەتىندە جارىق كورگەن.

وقىرمانعا قولايلى بولۋى ءۇشىن الاش ارىسىنىڭ ماقالاسىنداعى وتكىر پىكىرلەردى قاز-قالپىندا بەرۋدى ءجون كورىپ وتىر.

"بىز كورەمىز, شەجىرە جۇزىندە دە, تۇرمىس جۇزىندە دە ەركىن ايەلدەن ەلەۋلى كىسىلەردىڭ شىعۋعا مۇمكىن ەكەندىگىن. ءبىز كورەمىز, ءدىن كوزىلدىرىگىمەن قاراعاندا دا, يسلامنىڭ ناعىز اۋزىنان جالىنى شىعىپ تۇرعان كۇندەگى ايەلدەگى ەرىكتىڭ قانداي ەكەندىگىن.

مىسالى, پايعامباردىڭ قاتىندارى حاديشا مەن ايشانىڭ, بىرەۋى ۇلكەن ساۋدا جۇمىسىن باسقارىپ, ءبىرى پايعامباردىڭ وزىمەنەن نەشە سوعىستا بىرگە بولعاندىعى. يمام اعزامنىڭ حانيفا دەگەن قىزىنىڭ دانىشپان وقىمىستى بولعاندىعىنان, اتى شىعىپ, ءتىپتى يمام اعزامنىڭ ءوزىن دە "حانيفانىڭ اكەسى" ء(ابۋ حانيفا) دەپ كەتكەندىگى, قارۋن راشيد حاليفانىڭ قاتىنى زۇبايدا حانىمنىڭ باعداتتان مەككە-مەدينەگە دەيىن ارىق جۇرگىزدىرگەنى ءھام باسقالار ىلگەرىدە يسلامنىڭ ايەلگە قاي كوزبەن قاراعاندىعىن كورسەتۋگە جاراسا كەرەك.

بىراق بەرىرەك كەلگەن سوڭ كادىمگى پايعامباردىڭ ميراسقورلارى اناۋ تاريحتان دا كوز جۇمدى, مىناۋ يسلامدى دا بەل شالعىعا بۇردى. بۇعان سەبەپ: ءام ءما حاليفالارىنان باستاپ يسلام كۇشىنىڭ يران قولىنا كوشكەندەگى كەيبىر قارا جۇرەك ءومىر المۇميندەردىڭ وزدەرىنىڭ جاۋىز ناپسىلەرىنىڭ قىزىعى ءۇشىن حانىم سارايى دەپ ات قويىپ, ىڭعاي سۇلۋدى ۇيىرلەپ وڭاشا بولەك ۇستاۋلارىنا يسلامدى قۇرال قىلعاندىقتارىنان".

دايىنداعان: ادىلەت مادەنيەت