الەمدىك حالال ستاندارتىنا ساي قوناق ءۇيى سالىنادى

وزبەكستاندا الەمدىك حالال ستاندارتىنا ساي العاشقى مەيمانحانا sahid imam al-buhari قوناق ءۇيىنىڭ ىرگەتاسى سالتاناتتى تۇردە قالاندى دەپ حابارلايدى qamshy.kz اقپارات اگەنتتىگى ummet.kz سايتىنا سىلتەمە جاساپ.

وزبەكستاننىڭ سامارقاند قالاسىندا وتكەن اشىلۋ سالتاناتىنا يندونەزيالىق sahid group كومپانياسىنىڭ پرەزيدەنتى جانە باسقارۋ ديرەكتورى ۆيۆي حەرلامبانگ قاتىستى. يمام ءال-بۇحاري كومپلەكسىنىڭ اياسىندا سالىناتىن قوناق ءۇيدىڭ قۇرىلىسىن sahid group جانە sag كومپانياسى بىرلەسە جۇرگىزەدى دەپ جازادى وزبەكستان مەملەكەتتىك تۋريزم كوميتەتىنىڭ ءباسپاسوز قىزمەتى.

قوناق ءۇيىن باستاپقىدا 100 نومىرمەن اشىپ, الداعى 5 جىلدا بولمەلەر سانىن 300-گە دەيىن جەتكىزۋ جوسپارلانىپ وتىر. حالال ستاندارتىنىڭ تالاپتارىنا سايكەس ءار بولمەدە قۇبىلانىڭ باعىتى كورسەتىلىپ, جايناماز بەن قۇران قويىلادى. سونداي-اق حالال اس ءمازىرى جاسالىپ, رامازان ايىندا سارەسى جانە اۋىزاشار  مەزگىلدەرىندە ارنايى تاعامدار دايىندالادى.  

ايتا كەتەيىك, ءساۋىر ايىندا وزبەكستاندا قوناق ۇيلەردىڭ ساپاسى مەن قىزمەتىن دامىتۋ ماقساتىندا مەيمانحانالار اسسوسياسياسى قۇرىلعان ەدى. ءقازىر وزبەكستاندا ينۆەستورلارعا, سونىڭ ىشىندە قوناق ۇيلەر قۇرىلىسىنىڭ ينۆەستورلارىنا قولايلى جاعدايلار جاسالۋدا. 

ۇسىنعان: ماقپال سەمباي