• usd 468.56

  • eur 497.56

  • rub 7.3

  • cny 67.18

29 ناۋرىز, 04:42:01
+35°

24 مامىر, 2019 ءدىن

بالالى بولعىڭىز كەلسە...

بۇل اياتتار جاساعاننىڭ قۇلدارىنا تۇسىرگەن ۇلى يگىلىگى عوي.

بىز دۇعا وقي بىلەمىز بە؟ مەن بۇل قاقىندا ءسوز قوزعايىن دەپ وتىرعانىم جوق. ونى تۇسىندىرەتىن ءوز ادامدارى بار. مەنىڭ ورتاڭىزعا سالارىم, وتباسى قۇرعاندار كەيدە ءبىر بالاعا زار بولادى, نە كىندىگىنەن ىلعي قىز بالا ءوربىپ, مۇراگەر بولار ەر بالا كۇتەدى, الدە كەرسىنشە, ۇل بالالارى بار دا, قىز بالانى اڭسايدى. جانە مەنى زامانداستارىمنىڭ ءومىر جايلى, ەرلى-زايىپتىلاردىڭ قارىم-قاتىناسى قاقىنداعى تۇسىنىگى قايران قالدىرادى. ولاردىڭ كەيبىرى ۇيلەنىپ, ەرلى-زايىپتى اتانسا بولدى, بالا وزىنەن-وزى پايدا بولادى دەپ قاراۋى. ءيا, اللا بەرەدى. ءبىراق الگى تۇسىنىك بويىنشا ەر مەن ايەل بالانى پلاستاليننەن, نە قۇيىرشىق قۇساتىپ قامىردان, الدە بۋراتينو سياقتى اعاشتان جونىپ الارداي كورىنەدى. اقيقاتىندا ادام بالانى اللادان تىلەيدى. اللا ءوزى بىلەدى كىم بەرەرىن, ۇل ما, قىز با؟ دەگەنمەن سول مەيىرىم يەسىنىڭ ءوزى ۇيرەتكەن دۇعاسى بار, ول - كىلت. التىن كىلت. ءقازىر مەديسينا عىلىمىندا ەر مەن ايەل قاتىناسىنا كەستە جاساپ, حروموسوما ەسەپتەپ دەگەندەي, بويعا ۇل, نە قىز ءبىتىرۋىن رەتتەۋ جايىن ايتىپ ءجۇر عوي. ودان گورى ۇلىق يەمىزدىڭ ءوز ءسوزى الدەقايدا ءتيىمتى, الدەقايدا ارتىق ەمەس پە؟

مىسالعا, مەن ءوز باسىم ء"ال-عيمران" سۇرەسىنىڭ 38-اياتىن: "راببي ءھاب لي مين لادۋنكا ءزۋررييياتان تايييباتان ينناكا ءساميعۋ-د دۇعاي" (و, جاراتقان يەمىز, ماعان جاقسى ۇرپاق سىيلا, ويتكەنى سەن دۇعانى ەستيسىڭ!" دەگەن دۇعانى وقىپ ءجۇردىم, ومىرگە قىزىم كەلدى. شۇكىر يبالى, يماندى بولىپ ءوسىپ كەلەدى. سوسىن "ساففات" سۇرەسىنىڭ 100-اياتىن اۋىزعا الدىم: "راببي ءھاب لي مينا-س-ساليحين" (و, جاراتقان يەم! ساليحالىلاردىڭ ىشىنەن ماعان ۇل بەر.) وسى كەيىنگى دۇعانىڭ شاراپاتىمەن ايبارىس, ەلنامىس دەگەن قوس پەرزەنتىم دۇنيەگە كەلدى.

كەيىن ءۇي بولعان دوستارىما دا وسى دۇعالاردى بەردىم, ولار دا ۇل-قىزدى بولدى. ايەلىم جۇمىسىندا وتىرعاندا قۇربىسى مۇڭ شاعىپتى. بىزدە ەكى قىز بار, ۇشىنشىگە ويلانىپ ءجۇرمىز, قىز بولسا, الدىرىپ تاستايتىن بولارمىز, كۇيەۋىم ۇل كەرەك دەپ وتىر دەمەيدى مە؟! مۇنى ەستىگەن جولداسىم دۇعانى اۋىزعا الىپتى. سودان ول ايەلدىڭ كۇيەۋى ماعان كەلىپ جولىقتى. ەسىمى - رۋسلان. شەتەل كومپانياسىندا ىستەيدى ەكەن. بار شىنىن ايتتى. "ۇل كەرەك" دەيدى. مەن ءبىر ءتاۋىپ, اۋليە سەكىلدىمىن, ونىڭ پىكىرىنشە. ساسىپ قالدىم. سوسىن دۇعانى دارەت الىپ وقۋ كەرەكتىگىن, ىشىمدىكتەن اۋلاق بولعاننىڭ ابزالدىعىن ايتتىم. ول ء"سوز بەرەم, اينىتپاي ورىندايمىن" دەپ "ساففات" سۇرەسىنىڭ 100-اياتىن الىپ كەتكەن, تۋرا 9 اي 10 كۇن وتكەندە شەكەسى تورسىقتاي ۇلدى بولدى. اللاعا ماداق!

يا, دۇعانى وقۋدىڭ دا شارتى بار, تازا ءجۇرۋ كەرەكسىڭ. كىم بولسا دا ءبىر پەرزەنتكە زار ادامدارعا ء"انبييا" (پايعامبارلار) سۇرەسىنىڭ 89-اياتى كومەك دەر ەدىم: "راببي ءلا ءتازارني فاردان ۋا ءانتا ءحايرۋ-ل-ۋاريسينا" (و, جاراتقان يەم! مەنى جالعىز قالدىرما. سەن ميراسقورلاردىڭ ەڭ قايىرىمدىسىسىڭ.") اللاعا قالاي سەنسەڭ, ونىڭ دۇعاسىنا دا سولاي سەنگەن ابزال. مەن بۇلاردى ءبىر ءبىلىمىم اسىپ بارا جاتقان سوڭ ەمەس, الدەبىر ادامدارعا جاردەمى تيە مە, تۇيىقتان شىعۋعا, قازاق سانىن ساپالى كوبەيتۋگە ءبىر شاراپاتى بولا ما دەپ جازىپ وتىرمىن. كوبىمىز مەشىتكە بارمايمىز, يمامادارمەن پىكىرلەسپەيمىز, سوندىقتان كەرەك ەتكەن مۇسىلمان باۋىرلارىم جازىپ السىن دەپ شەشتىم.

بارى دە جاراتقاننىڭ قولىندا. بۇل اياتتار جاساعاننىڭ قۇلدارىنا تۇسىرگەن ۇلى يگىلىگى عوي. تەك ءبىز ونى پايدالانبايمىز, اسا ءمان بەرمەيمىز. ايتپەسە, دۇعامەن تاۋ قوپارۋعا بولادى... ءبارى دە اللا-تاعالانىڭ پارمەنىندە, دارگەيىندە!

دەرەككوز: islam.kz

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر