مارالتاي رايىمبەكۇلىنىڭ مەرەيتويى تۋعان جەرىندە دۇركىرەپ ءوتتى

حالىقارالىق «الاش» ادەبي سىيلىعىنىڭ يەگەرى,  قازاقستان رەسپۋبليكاسىنىڭ ەڭبەك سىڭىرگەن قايراتكەرى مارالتاي رايىمبەكۇلى بيىل ەردىڭ جاسى-ەلۋگە تولدى. بۇعان دەيىن مەرەيتوي اياسىندا الماتى قالاسىندا  شىعارماشىلىق كەشتەرىن وتكىزگەن ارقالى اقىن تۋعان جەرى — اۋليەاتا وڭىرىنە ات باسىن بۇردى.

پوەزيا مەرەكەسى   ەڭ الدىمەن شوقان ءۋاليحانوۆ اتىنداعى وبلىستىق امبەباپ عىلىمي كىتاپحانادان باستاۋ الدى. وندا ەلباسىنىڭ «بولاشاققا باعدار:رۋحاني جاڭعىرۋ» باعدارلامالىق ماقالاسىنىڭ اياسىندا قولعا الىنعان «اۋىلدىق كىتاپحانا – جەرگىلىكتى قوعامداستىق ورتالىعى» اتتى اۋىلدىق كىتاپحانالار كۇندەرى اياسىندا سارىسۋ اۋدانىنا قاراستى يگىلىك اۋىلدىق كىتاپحاناسىنىڭ ماماندارى مارالتاي رايىمبەكۇلىنىڭ 50 جاس مەرەيتويىنا وراي «اي استىنداعى كەنتاۆر» اتتى ادەبي-سازدى كەش ۇيىمداستىردى.

شارا بارىسىندا جىر جامپوزىنىڭ شىعارماشىلىعى اڭگىمە وزەگىنە اينالىپ, اسەرلى ەستەلىكتەر ايتىلدى. جالىندى جىرلار وقىلىپ, پايىمدى پىكىرلەر ايتىلدى.  

ال نەگىزگى شارا «جۇلدىز اتتاس جالعىز شاھار جاھانداعى» تاقىرىبىمەن جامبىل وبلىستىق قازاق دراما تەاترىندا ءوتتى. مازمۇندى كەشكە قازاقستان جازۋشىلار وداعى ءتوراعاسىنىڭ ورىنباسارى, قازاقستان رەسپۋبليكاسى پرەزيدەنتى سىيلىعىنىڭ لاۋرەاتى, قالامگەر-جۋرناليست  مەرەكە قۇلكەنوۆ, قازاقستان رەسپۋبليكاسىنىڭ مەملەكەتتىك سىيلىعىنىڭ لاۋرەاتى, بەلگىلى اقىندار  ەسەنعالي راۋشانوۆ,   «دارىن» مەملەكەتتىك جاستار سىيلىعىنىڭ لاۋرەاتى,  «قۇرمەت» وردەنىنىڭ يەگەرى سۆەتقالي نۇرجانوۆ, مەملەكەتتىك سىيلىقتىڭ يەگەرى تىنىشتىقبەك ابدىكاكىمۇلى, قازاقستان جازۋشىلار وداعىنىڭ قاراعاندى وبلىستىق فيليالىنىڭ ديرەكتورى,  قازاقستاننىڭ ەڭبەك سىڭىرگەن قايراتكەرى سەرىك اقسۇڭقارۇلى,  جازۋشى, «الاش» ادەبي سىيلىعىنىڭ يەگەرى نەسىپبەك ءداۋتايۇلى قاتىستى.

جامبىلدىق جىرسۇيەر قاۋىمعا رۋحاني سەرپىلىس سىيلاعان شارانى  وبلىس اكىمى اسقار مىرزاحمەتوۆ اشىپ, قۇتتىقتاۋ ءسوز سويلەدى.

— قاسيەتتى اۋليەاتا وڭىرىنەن نەبىر ءدۇلدۇل دارىندار شىقتى. سونىڭ بىردەن ءبىر دالەلى وسى مەرەيتوي يەسى مارالتاي رايىمبەكۇلى. الماتىداعى ۇلكەن شىعارماشىلىق كەشىندە ارنايى قۇتتىقتاپ  بارىپ, «وبلىسقا سىڭىرگەن ەڭبەگى ءۇشىن» توسبەلگىسىن تابىستادىق. بۇگىن مىنە, ءوز ازاماتتىعىن كورسەتىپ, الماتىداعى كەشپەن شەكتەلمەي, تۋعان توپىراققا تاعزىم ەتىپ كەلىپ وتىر. وعان ۇلكەن قۋانىشتىمىز.

— مارالتاي رايىمبەكۇلى شىن مانىندە دە جاستىعىنا قاراماستان قازاق ادەبيەتىنە ۇلكەن ۇلەس قوستى, ءالى دە قوسىپ كەلە جاتىر. ول جازعان ولەڭدەردىڭ وزەكتىلىگى, ءوز بويىنداعى وجەتتىلىگى, قايسار مىنەزى, وسىنىڭ ارقاسىندا بويىنداعى تالانتىن كورسەتىپ, اقىندىق قۋاتىن مويىنداتىپ كەلە جاتىر. سوندىقتان ەل ءۇشىن, ەلدىڭ رۋحاني بايلىعى ءۇشىن اتقارعان قىزمەتىنە, جاساعان جۇمىسىنا شىن جۇرەكتەن العىس ايتامىز. ءبىز مارالتاي رايىمبەكۇلىمەن ماقتانامىز. الداعى ۋاقىتتا دا ۇلكەن تابىستار تىلەيمىز,-دەپ اسقار يسابەكۇلى اقىنعا سىي-قۇرمەت كورسەتىپ, ات مىڭگىزدى.

كەشتى باستان-اياق اتا-بابانىڭ اسىل مۇراسىن ارقالاپ جۇرگەن بەلگىلى جىرشى, فولكلورتانۋشى-عالىم بەرىك ءجۇسىپتىڭ ساۋىت بۇزار سوزدەرىمەن جۇرگىزۋى سالتاناتتى شارانىڭ سالماعىن ارتتىرا تۇسكەندەي. كەلىستى كەشتە قازاقستان جازۋشىلار وداعىنىڭ ءتوراعاسىنىڭ ورىنباسارى,  بەلگىلى قالامگەر مەرەكە قۇلكەنوۆ ىزگى لەبىزىن ءبىلدىرىپ, شىعارماشىلىق تابىس تىلەدى. الاشتىڭ ارداقتى اقىندارى  سەرىك اقسۇڭقارۇلى, تىنىشتىقبەك ابدىكاكىمۇلى,  سۆەتقالي نۇرجانوۆ, ەسەنعالي راۋشانوۆ اقجارما تىلەكتەرىن اقتارىپ, تەبىرەنە جىر وقىدى. ال, جازۋشى نەسىپبەك ءداۋتايۇلى اقىننىڭ ازاماتتىق بولمىسى  توڭىرەگىندە وي ساباقتاپ, ۇلتتىق بىرلىكتى نىعايتۋدا ادەبيەتتىڭ ماڭىزى زور ەكەندىگىن تىلگە تيەك ەتتى.

اقىننىڭ مەرەيتويى كەلەسى كۇنى ءوزىنىڭ كىندىك قانى تامعان سارىسۋ اۋدانىندا جالعاستى. جەرلەستەرى جىر جامپوزىن جىلى شىرايمەن قارسى الىپ, قۇرمەت-كوشەمەت كورسەتتى. اۋداننىڭ قۇرمەتتى ازاماتى بولتىرىك ءىلياسوۆ باستاعان قاريالار ءسوز سويلەپ, اۋىل حالقىنىڭ اتىنان اقىنعا ات مىنگىزدى. الايدا, مارالتاي اقىن اۋىلداستارىنىڭ بۇل قۇرمەتىنە العىس ايتىپ, تۇياعىمەن جەر تارپىعان تۇلپاردى ادەبيەتتە  رۋحاني قولداۋ كورسەتكەن  اعاسى, جازۋشى نەسىپبەك ءداۋتايۇلىنا سىيلادى. سونىمەن قاتار مەكتەپ وقۋشىلارى اراسىندا مارالتاي اقىننىڭ جىرلارىن وقۋدان وتكەن اۋداندىق جارىستىڭ جەڭىمپاز, جۇلدەگەرلەرىنە اقىن ءوز قولىمەن قارجىلاي سىيلىق تابىس ەتتى.

جاڭاتاس قالاسىنداعى اۋداندىق مادەنيەت ۇيىندە وتكەن شىعارماشىلىق كەش تە تاعىلىمعا تولى بولدى.  سالتاناتتى ساتتە اۋدان اكىمى قاناتبەك مادىبەك قۇتتىقتاۋ ءسوز سويلەپ, جۇرەكجاردى لەبىزىمەن ءبولىستى. يگىلىكتەن شىعىپ, ءيسى قازاققا تانىلعان اقىنعا  سىي-قۇرمەت كورسەتىپ, مەرەيتوي يەسىنىڭ قۋانىشىنا ارنايى كەلگەن مارعاسقا قالامگەرلەردىڭ يىعىنا  شاپان جاپتى. ءوز كەزەگىندە مارتەبەلى مەيمانداردى ءسوز تىزگىندەپ, كوپشىلىكتى ءبىر سەرپىلتىپ تاستادى.

شارا سوڭىندا كيەلى ساحناعا كوتەرىلىپ, تارپاڭ جىردىڭ تيەگىن اعىتقان مارالتاي اقىن ەل الدىندا باسىن ءيىپ, اعايىنعا العىسىن ايتتى. 

جويقىن جىگەر