جەتىستىككە جەتۋ ءۇشىن ءونىمدى جۇمىس ىستەۋدىڭ 10 قاعيداسى

بۇگىنگى نارىقتا بارلىعى ءوز تاۋارىنىڭ ونىمدىلىگىن ارتتىرۋدى كوزدەپ, ارەكەت ەتۋگە كوشكەن. ءتىپتى, كەيبىر كاسىپكەرلەر تۇتىنۋشىنىڭ پىكىرىن تىڭدايمىن دەپ وزدەرىنىڭ باستى يدەيالارىن دا جوعالتىپ جاتادى. ەستە بولسىن, نارىقتا ءونىمدى بولۋدىڭ باستى قاعيداسى – ەرەكشە ءارى قوعامعا قات نارسەنى تاۋىپ بەرە الۋ. وسىدان كەيىن بارىپ قانا قولدانۋشىلاردىڭ ۇسىنىس-پىكىرلەرىن تىڭداپ, سوعان وراي كىشىگىرىم وزگەرىستەر ەنگىزۋگە بولادى.

كاسىپ باستاعان كەز-كەلگەن ازامات ءوز تاۋارىنىڭ ونىمدىلىگىن ارتتىرۋدى كوزدەپ, ءتۇرلى كەڭەستەر بەرەتىن سايتتار مەن گازەت-جۋرنالداردىڭ بەتىن پاراقتايدى.

راس, كەيبىر قاعيدالاردى ءجوندى قولدانا بىلسەڭ, اجەپتەۋىر كومەگىن تيگىزەدى. دەگەنمەن, اتالعان قاعيدالاردىڭ بارلىق كاسىپكەرلەرگە بىردەي پايدا اكەلە بەرمەسىن قاپەردە ۇستاعان ءجون. ارينە, ونىمدىلىكتى ارتتىرۋ تۇرعىسىنداعى بارلىق شارتتاردى باستى نازاردا ۇستاپ, كوڭىل تۇكپىرىنە ءتۇيىپ جۇرگەننىڭ ايىبى جوق.  جۇمىس بارىسىندا  بۇل شارتتاردى قولداناتىن ۇتىمدى ۋاقىت كەلىپ قالۋى كادىك. كاسىپكەرلىك سالاسىندا بارلىعىنىڭ نازارىنا ۇسىنىلاتىن, ەش وزگەرمەيتىن 10 قاعيدا بار. بۇگىن سول تۋرالى اقپارات بەرمەكپىز. ەندەشە, ءارى قاراي وقىڭىز.

1 – قاعيدا. بارلىعىنا ۇلگەرۋ ءۇشىن ەرتە تۇرۋ قاجەت

كاسىپ سالاسىندا ىزدەنىستە جۇرگەن ازاماتتاردىڭ بارلىعى "تابىستى كاسىپكەر بولۋ ءۇشىن ۇيقىدان تاڭعى ساعات 4-تە تۇرۋ كەرەك" دەگەن تىركەستەردى وقىعانى انىق. جازبا اۆتورلارىنىڭ ەسەپتەۋىنشە, وسىنداي داعدى ارقىلى ادام جەتىستىككە جەتەدى ەكەن-مىس. راسىندا ەرتە تۇرۋ كوپ ماسەلەنى شەشەدى مە؟

راس, ەرتە تۇرعان ادامنىڭ ۇيقىسى سول داعدىعا ۇيرەنەدى. سودان كەيىن ول ءوزىن سەرگەك سەزىنەتىن بولادى. ال سەرگەك ادام كۇنى بويى كوپ تىرلىكتىڭ باسىن قايتارۋعا قاۋقارلى. بۇل – تاڭعى ۇيقىدان ەرتە ويانۋدىڭ بالاما پايداسى.

ال جوعارىدا كەلتىرگەن تىركەس سىندى جازبالاردىڭ اۆتورلارى ەرتە تۇرعان ادام ءساتتى جۇمىس اسايدى, جەتىستىككە جەتۋگە دەگەن قۇلشىنىسى ارتادى نەمەسە جاڭا مۇمكىندىكتەر پايدا بولادى دەگەن تۇيىندەر كەلتىرىپ جاتادى. ارينە, بۇل تىركەستەردىڭ ومىردە شىندىققا اينالۋى ابدەن مۇمكىن. ءبىراق بارلىق ادامنىڭ ومىرىندە ەمەس.

ال ەرتە تۇرۋ ارقىلى ۋاقىت ۇنەمدەۋ تاقىرىبىنا ورالساق, بۇل جەردە ارنايى بەكىتىلگەن قاجەتتى ۇيقىنى وتەپ ءجۇرىپ-اق بارلىعىنا ۇلگەرۋگە بولادى. ۋاقىتتى ءتيىمدى پايدالانۋ جونىندە جازىلعان دەرەكتەرگە سۇيەنسەك, ءاربىر ادامنىڭ ءونىمدى جۇمىس جاسايتىن مەزگىلى ءارتۇرلى. وسى ورايدا ايتىلعان كەڭەستەر بويىنشا تاڭعى جانە تۇنگى مەزگىلدى جۇمىس جاساۋعا وڭتايلى قولدانا بىلگەن ءجون ەكەن. ويتكەنى, ءدال وسى ۋاقىت ارالىعىندا ادامنىڭ كوڭىلىن الاڭداتاتىن نارسەلەردىڭ ءبارى دامىلدايدى. سول سەبەپتى جۇمىس جاساپ وتىرعان كىسىنىڭ بار نازارى تەك الدىنداعى ىسىنە عانا اۋماق.

2 – قاعيدا. كەڭسەدە عانا ءونىمدى جۇمىس جاساۋعا بولادى

بۇل قاعيدا وسىدان ون شاقتى جىل بۇرىن ءوتىمدى بولعان بولار, بالكىم؟! ويتكەنى, ول كەزەڭدە ءاربىر ادامنىڭ قولىندا قاجەتتى تەحنولوگيالار, قولجەتىمدى ينتەرنەت نەمەسە باسقا دا قاجەتتىلىكتەر بولعان جوق. سوندىقتان, ورتالىقتاندىرىلعان كەڭسەدە كۇندىز-تۇنى جۇمىسىن اياقتاعانشا وتىرۋعا ءماجبۇر بولدى.

كوپتەگەن ساراپتامالاردىڭ ناتيجەسىنە سۇيەنسەك, ۇيدەن نەمەسە كافەلەردەن جۇمىس ىستەگەن ازاماتتاردىڭ قىزمەت ونىمدىلىگى الدەقايدا جوعارى بولادى ەكەن. سەبەبى, ۇيدەن نەمەسە وزىنە ىڭعايلى جەردەن قىزمەت جاساۋ ارقىلى ادام وزىنە ىڭعايلى ۋاقىتتى نەمەسە قولايلى جاعدايدى جاساپ الادى. سودان كەيىن بار ىنتاسىمەن جۇمىس جاسايدى.

ساراپتامالار ناتيجەسىندە بۇگىندە كوپتەگەن ادامداردىڭ قاشىقتىقتان جۇمىس جاساۋعا داعدى الىپ بارا جاتقانى انىق كورىنەدى. دەگەنمەن, ولاردىڭ دا قىزمەت ونىمدىلىگى كەڭسەگە تۇراقتى بارىپ جۇمىس جاسايتىنداردان ارتىق بولماسا, كەم ەمەس.

جوعارىدا دا ايتىپ وتتىك, ادامدار وزىنە قولايلى نارسەنى تاڭدايدى. كەيبىر ادامدارعا قاشىقتىقتان قىزمەت جاساعان وڭتايلى بولسا, كەيبىر جاندارعا, كەرىسىنشە, ارىپتەستەر اراسىندا, كەڭسەدە جۇمىس جاساعان ءتيىمدى.

3 – قاعيدا. ۇيقى تەك السىزدەر ءۇشىن

ۇيقى – ادامنىڭ فيزيكالىق قاجەتتىلىگى. راس, تۇنگى ۋاقىت – كوپ ادامدار ءۇشىن جۇمىس جاساۋعا وتە قولايلى ۋاقىت. دەگەنمەن, مەديسينالىق تۇجىرىم بويىنشا دەنى ساۋ ادام تاۋلىگىنە 8 ساعات مىندەتتى تۇردە ۇيقتاۋى شارت. بۇل ارالىقتا ادامنىڭ جالپى اعزاسى, ميى تىنىعىپ, كەلەسى كۇن سەرگەك بولۋعا كومەكتەسەدى.

كوپشىلىك ادامدار تۇنگى ۇيقى ۋاقىتىن قىسقارتىپ, ونى وزگە ءبىر پايدالى نارسەگە جۇمساعاندى ءجون دەپ سانايدى. ءبىراق, ەسىڭىزدە بولسىن, ۇيقىنىڭ جەتكىلىكسىزدىگى ونىمدىلىكتىڭ ازايۋىنا الىپ كەلەدى. سوندىقتان دا, ءوزىڭىزدىڭ ۋاقىتىڭىزدى ءتيىمدى پايدالانىپ, قاجەت ۇيقىنى وتەپ جۇرگەنىڭىز ابزال.

4 – قاعيدا. ءبىر نارسەمەن شۇعىلدانۋ - ءونىمدى ەڭبەك ەتۋ

وزىڭىزگە بۇل جاعداي ابدەن تانىس بولار. ادام بىردەڭەمەن شۇعىلدانىپ جاتقان كەزىندە ءوزىن ءونىمدى ەڭبەك ەتىپ جاتقان ازامات رەتىندە, ۋاقىتىن ءتيىمدى باسقارىپ وتىرعان تۇلعا رەتىندە سەزىنە باستايدى. ەگەر ءسىز ءوزىڭىزدىڭ جەكە ەسەپ داپتەرىڭىزدە اتقارىلعان ءبىر ىستەردى ءتۇرتىپ جۇرسەڭىز دە, بۇل ونىمدىلىكتى بىلدىرمەيدى. ويتكەنى, وندا ورىنداۋعا جانە ورىنداماۋعا دا بولاتىن شۇعىل شارۋالار نەمەسە جەدەل ويعا ورالعان دۇنيەلەر بولۋى مۇمكىن.

ونىمدى بولۋ دەگەنىمىز – ارنايى جوسپارلانعان كاسىبىڭدى دوڭگەلەتىپ, ءوز سالاڭدا قارقىندى جۇمىس جاساۋ جانە سول ارقىلى پايدا كەلتىرۋ. ال جوعارىدا ايتىلعانداي شۇعىل جانە جەدەل شەشىم قابىلدانعان شارۋالارمەن اينالىسۋ ارقىلى ادام ءوزىن-وزى باسقارۋىن جوعالتادى نەمەسە ونىمدىلىك دەڭگەيىن تومەندەتەدى.

ەگەر ءوزىڭىز شۇعىلدانىپ جۇرگەن ىستەرىڭىز ناتيجە بەرسىن دەسەڭىز, بارلىعىن الدىن الا جوسپارلاڭىز. سودان كەيىن جوسپارداعى شارۋالاردىڭ ەڭ ماڭىزدىسى دەپ سانايتىن نارسەنى ءبىرىنشى كەزەكتە ورىنداۋعا تىرسىڭىز. ۋاقىت جوعالتاتىن نەمەسە ءوزىڭىزدىڭ ونىمدىلىك دارەجەڭىزگە كەدەرگى كەلتىرەتىن ارەكەتتەردەن باس تارتىڭىز.

5 – قاعيدا. جۇمىس داعدارىسىن جەڭىپ شىعۋعا قالىپتاسىڭىز

اربىر ادام جۇمىس ۋاقىتىندا باسقا دۇنيەمەن شۇعىلدانعىسى كەلىپ نەمەسە دەمالعىسى كەلىپ تۇراتىنى وتىرىك ەمەس. بۇل نارسەنى عالىمدار "جۇمىس داعدارىسى" دەپ اتايدى. اتالعان داعدارىس كەزىندە ادامدار قىزمەتكە دەگەن قۇلشىنىسىن جوعالتادى.

"جۇمىس ۋاقىتىنداعى وسى ءبىر ساعاتتاردى وتكىزۋدىڭ ورىنىنا باسقا شارۋامدى تىندىرۋ كەرەك ەدى" دەگەن سەكىلدى ويلار ادام ساناسىن جاۋلاپ العان كەزدە, ول ءوزىن-وزى باسقارۋ قابىلەتىنەن اجىراي باستايدى. سودان كەلىپ, بۇگىن اتقارىلۋى ءتيىس جۇمىستى ەرتەڭگە قالدىرۋ سەكىلدى ونىمدىلىكتى جوعالتاتىن ەرىنشەكتىك ارەكەتتەر جول الا باستايدى.

ال كەيدە ادام وزىنە بەرىلگەن جاۋاپكەرشىلىكتى قىزمەتىن جاساۋدىڭ ورنىنا ۇستەل ۇستىندەگى قاعازداردى قايتا ءبىر شولىپ شىعۋ, الەۋمەتتىك جەلىنى پاراقتاۋ, تازا اۋامەن دەمالۋ, پوشتاسىن تەكسەرۋ سەكىلدى ارەكەتتەرمەن اينالىسىپ كەتەدى.

ونىمدى قىزمەت جاساۋعا قاۋقارىڭىز بار كەزدە, التىن ۋاقىتىڭىزدى بوسقا جوعالتپاڭىز. بۇگىنگى قىزمەتىڭىز ۋاقىت وتە كەلە الدىڭىزدا ابىرويىڭىزدى اسقاقتاتىپ توسەلەتىن قىزىل كىلەم, قالتاڭىزدىڭ قالىڭدىق دەڭگەيىن ارتتىراتىن قاراجات بولىپ ورالماق.

6 – قاعيدا. جۇمىس بارىنەن جوعارى

الەمدىك دەڭگەيدە بەلگىلى ءبىر جەتىستىك دەڭگەيىن باعىندىرىپ قويعان ادامداردىڭ پايىمىنشا, جۇمىستى ءبىرىنشى ورىنعا قويۋدىڭ قاجەتى شامالى. نەمەسە باسقاشا جەتكىزىپ كورەلىك. تۇراقتى قىزمەتىڭىز بەن جەكە ءومىرىڭىز اراسىندا تەپە-تەڭدىك ۇستاي ءبىلىڭىز.

قازىرگى كۇنى ادامداردىڭ كوپشىلىگى وزدەرىنىڭ كوزدەگەن ماقساتتارىنا جەتۋى ءۇشىن كۇنى-تۇنى ەكى-ۇش جۇمىستى قاتارىنان اتقارىپ ءجۇر. ال بۇل نارسە سىزگە ەشقاشان كوزدەگەن مەجەڭىزگە جەتكىزبەيتىن, قۇيرىعىمەن الداپ وتىراتىن قىزىل تۇلكى سەكىلدى.

ەڭ دۇرىسى – جۇمىس جاسايتىن ۋاقىتتا ءونىمدى قىزمەت اتقارىپ, قالعان ۋاقىتتا قالاعانىڭىزشا جەكە ومىرىڭىزگە كوڭىل بولگەنىڭىز ابزال. ەگەر دەمالىس كۇندەرى جۇمىس جاساۋ قاجەت بولسا, وعان بەلگىلى ءبىر ۋاقىت ارالىعىن عانا ءبولىڭىز. ويتكەنى, ءۇزىلىسسىز قىزمەت جاساۋ – ونىمدىلىك دارەجەسىن قۇلدىراتۋعا الىپ كەلەتىن بىردەن-بىر كەلەڭسىزدىك.

7 – قاعيدا. كوپ جاۋاپكەرشىلىك جۇكتەۋ – ماقساتقا جەتۋ جولى

قازىرگى نارىق تالابىنا ساي كەلىپ, جۇكتەلگەن مىندەتتەمەلەردى تولىعىمەن ورىنداۋ ءۇشىن ماقساتى ايقىن ازاماتتاردىڭ كوپشىلىگى ەكى نەمەسە ءۇش جۇمىستىڭ جاۋاپكەرشىلىگىن وزدەرىنە جۇكتەيدى. بۇل جولمەن, ارينە, تاماشا تابىس تابۋعا بولادى. ءبىراق, الدىمەن, دەنساۋلىقتى, ەكىنشىدەن, ونىمدىلىك دەڭگەيىن ەڭ تومەنگى قاتارعا ءتۇسىرىپ الاسىز.

كوپ جاۋاپكەرشىلىك جۇكتەگەن ادامدا ءبىرىنشى قىزمەت پەن ەكىنشى قىزمەت اراسىنداعى اۋىسىم كەزىندە دەمالىس بولمايدى. راس, ءبىر مۇمكىندىگىن تاۋىپ, ۇيقتاپ نەمەسە ءسال دەمالىپ جاتۋعا بولادى. ءبىراق مي ءاردايىم قوزعالىستا بولادى.

ال مي دەمالماعاننان كەيىن ادام رۋحاني تۇرعىدان شارشاي باستايدى. مىنە, وسى كەزدە بارىپ قانا ادام ءوزىنىڭ ونىمىدىلىگىنىڭ ناشارلاعانىن ءبىر-اق سەزەدى.

8 – قاعيدا. عالامتور ءونىمدى ەڭبەك ەتۋگە كەدەرگى جاسايدى

قازىرگى كەزدە ادامداردىڭ كوپشىلىگى الەۋمەتتىك جەلىلەردەن, ءتۇرلى سايتتاردان كەلىپ تۇسەتىن اقپاراتتاردىڭ كوپتىگىنە شاعىمدانادى. ولاردىڭ ايتۋى بويىنشا, اقپارات كوپ قابىلداعان سايىن ادام نەگىزگى جۇمىسىنىڭ ونىمدىلىگىن ازايتا باستايدى ەكەن.

دەگەنمەن, بارلىعىن عالامتورعا ۇيىپ-توگە سالۋعا بولادى ما؟ جوق, ارينە. ءاربىر ادام – ءوز ءومىرىنىڭ قوجاسى. ەگەر ادام ءوز ۋاقىتىن تاۋلىكپەن ءبولىپ, ءار تاۋلىكتەگى جالپى ۋاقىتتى جوسپارلاپ وتىرسا, ەشتەڭەدەن قۇر قالماۋعا جانە بارلىعىنا ۇلگەرۋگە ۋاقىت تابادى.

عالامتورداعى كوپتەگەن اقپاراتتىڭ كەيدە پايداسى دا تيەتىنىن ۇمىتپاعان ءجون. ءبىراق ونىمدىلىكتى ارتتىرىپ, قىزمەت جاساۋ قاجەت كەزدە ءوز قىزىعۋشىلىعىڭىز ارقىلى قارايتىن باعدارلامالار, وتىراتىن الەۋمەتتىك جەلىلەر تۋرالى ۇمىتۋدى داعدىعا اينالدىرىڭىز.

9 – قاعيدا. ۇزاق جۇمىس جاساساڭ, كوپ شارۋا تىندىراسىڭ

كەڭسەدە ۇزاق ۋاقىت وتىرىپ الىپ جۇمىس ىستەۋ ارقىلى ءوز ونىمدىلىگىڭىزدى ارتتىرام دەگەن ويىڭىزدىڭ 100 پايىز ورىندالارى نەمەسە ويىڭىزداعىداي شىقپاۋى تارازى باسىندا تۇرادى.

پاركينسون تۇجىرىمداماسى بويىنشا, ءسىزدىڭ قىزمەت جاساعان ۋاقىتىڭىز بولىپ, تەك تازا جۇمىسپەن اينالىسقان ۋاقىتىڭىز عانا ەسەپتەلەدى. ال قالعان ۋاقىت – بوسقا وتكەن نەمەسە جەكە ومىرىڭىزگە جۇمسالعان ۋاقىت.

ەگەر ءسىز كەڭسەگە تاڭەرتەڭ كەلگەن كەزدە, جۇمىس ۋاقىتى بىتە سالىسىمەن ۇيگە بارۋ قاجەت دەگەن ويمەن جۇمىسقا وتىرساڭىز, وندا سول ۋاقىتقا دەيىن ءبىر كۇندىك تاپسىرماڭىزدى تولىق ورىنداپ كەتەسىز. ال كەشكە جۇمىس ۋاقىتىنان كەيىن اسىقپاۋعا, ءبىراز ۋاقىت تاعى دا قالىپ, ارتىعىراق جۇمىس جاساۋدى كوزدەسەڭىز, ارتىق ساعاتتاردى قوسقان كۇندە دە كەشەگى كۇنمەن بىردەي تاپسىرما ورىنداپ شىعاسىز.

دەمەك, ۇزاق جۇمىس ۋاقىتى ءونىمدى ەڭبەكتىڭ ايناسى ەمەس, ءونىمدى ەڭبەك قىزمەت ساپاسىمەن سىنالادى.

10 – قاعيدا. تازا جۇمىس ورنى ونىمدىلىكتى ارتتىرادى

بۇل قاعيدانىڭ دا اسەرى اركىمگە ءارقالاي. مىسالى, كەيبىر ازاماتتار ۇستەلدەرىنىڭ ۇستىندە ارتىق جاتقان جارتى پاراق قالدىرماي جيناپ وتىرسا, كەيبىركىسىلەر بارلىعىن شاشىپ وتىرىپ جۇمىس جاساعاندى جاقسى كورەدى. بۇل – اركىمنىڭ جەكە كوزقاراسىنىڭ ناتيجەسىندە ورىندالاتىن دۇنيە.

جوعارىدا ايتقان دەڭگەيدىڭ ەكىنشىسىنە جاتاتىن ادامدار تاپ-تازا ۇستەل ۇستىندە وتىرىپ جۇمىس جاساي الماۋى مۇمكىن. ويتكەنى, ول الدىنا قاعازداردى جايىپ تاستاپ, ۇستەلىنىڭ شەتىنە كىتاپ جيناپ قويىپ, قويىن داپتەرىنە ءبىر دۇنيەلەردى ءتۇرتىپ وتىرىپ جۇمىس اتقارعاندى جانى قالايدى.

ال ءبىرىنشى دەڭگەيدىڭ ادامدارى ەكىنشى دەڭگەيدەگى قىزمەتكەرلەردىڭ جۇمىس ۇستەلىندە وتىرا الماۋى مۇمكىن.

بىز شولۋ جاساپ وتكەن 10 قاعيدانىڭ بارلىق شارتتارى كۇللى ادامزات بالاسىنا ارنالماعان. ەگەر جوعارىداعى قاعيدالار ىشىنەن ءوزىڭىزدىڭ بويىڭىزدا بار ارەكەتتەردى بايقاعان بولساڭىز, وندا وسى قاعيدا مىندەتتەەلەرىن ورىنداپ كورسەڭىز بولادى.

قىزمەتتىڭ ءونىمدى بولۋى وزىڭىزگە, جاساعان جۇمىسىڭىزعا, پايدالانعان ۋاقىتىڭىزعا بايلانىستى ەكەنىن ۇمىتپاعان ابزال.