"؛قۇرباقا جەگىزۋ"؛ ءتاسىلى: وزىڭە ۇنامايتىن ىستەن قالاي ناتيجە شىعارۋعا بولادى؟

كۇندەلىكتى ومىردە جاقسى قاراجات تابۋ ءۇشىن مۇرىنىڭنان شانشىلىپ جۇمىس جاساۋ قاجەت ەمەس. تەك قانا قىزمەتتىڭ كوزىن تابا ءبىلۋ قاجەت. روب مۋر ەسىمدى ۇلىبريتانيالىق اۆتوردىڭ "تابىس تابۋ قاعيدالارى" اتتى كىتابىندا وسىلاي قىزمەت جاساۋدىڭ جولدارى تولىعىنان تالقىلانىپ, وقىرمانىنا ءتۇرلى ۇسىنىستار مەن پايدالى كەڭەستەر بەرەدى. كىتاپتا جاقىندارىڭا, وزىڭە ۋاقىت بولە ءبىلۋ تۋرالى, قالاي ۇلكەن ماقساتتار قويا ءبىلۋ تۋرالى, ءوز ارماندارىڭىزدى قۇربان ەتپەي كوزدەگەنىڭە جەتۋ جولدارى تۋرالى تاراۋلار بار. ەندەشە, كىتاپتى باستى نازارعا الا وتىرىپ, وزىڭە ۇنامايتىن ءىستى قالاي اياقتاۋعا بولاتىنى تۋرالى ايتىپ كورەلىك.

ەموسياڭىزدى قولدا ۇستاي الساڭىز, ءسىز بيزنەستە دە, جەكە ومىردە دە ءبىراز جەتىستىكتەرگە قيىندىقسىز جەتەسىز. اشۋ مەن شەكتەن تىس قۋانۋ - كاسىپ سالاسىندا كوپتەگەن دۇنيەلەرگە كەدەرگى بولاتىن فاكتورلار. تومەندە جەتىستىككە جەتىپ ۇلگەرگەن ادامدار قولداناتىن قاعيدالار تۋرالى ايتپاقپىز.

الدىمەن ەڭ ماڭىزدى تاپسىرمانى ورىنداڭىز

كۇندەلىكتى تۇرمىستا, قىزمەتتە ماڭىزدى جۇمىس بولعانىمەن, ءسىزدىڭ ونى ورىنداعىڭىز كەلمەيتىنى, ونى ورىنداعان ۋاقىتتى بوسقا زايا كەتىردىم دەپ ويلاۋىڭىز – ۇيرەنشىكتى جاعداي. دەگەنمەن, ەگەر ول ءىس سىزگە بەلگىلى ءبىر مولشەردە پايدا الىپ كەلەتىن بولسا, وندا ءسىز ونى ورىنداۋعا ءتيىستىسىز. ويتكەنى, سول ءىستى جۇزەگە اسىرۋ ارقىلى ءسىزدىڭ جەتىستىككە جول اشاتىن مۇمكىندىكتەر كۇتىپ تۇرۋى ابدەن كادىك.

زاۋقىڭ سوقپاعان ءىستى دە ساپالى تۇردە اتقارىپ شىعۋعا بولادى. ول ءۇشىن جۇمىستىڭ اياعىنا قاراماي, بەلگىلى ءبىر بولىگىن ورىنداعانعا دەيىن شاعىن مەجەلەر قويىپ وتىرىڭىز جانە ءجيى-جيى از ۋاقىتتىق دەمالىس جاريالاپ وتىرىڭىز. بۇل ادىستەردىڭ سىزگە پايداسى تيەرى ءسوزسىز.

وزىڭىزدىڭ ىس-ارەكەتتەرىڭىزدى باقىلاۋدا ۇستاڭىز

ادام ءوزىن-وزى باقىلاۋدا ۇستاپ, شالىس باسىپ جۇرگەنىن سەزگەن ۋاقىتىندا تەزگە سالىپ, تۇزەلىپ وتىرسا, ۇلكەن قيىندىقتارعا, كەلەڭسىزدىكتەرگە ۇرىنا قويۋى ەكىتالاي. مىسالى, ءسىز ماڭىزدى ءبىر شارۋامەن شۇعىلدانىپ وتىرعاندا, ەلەكتروندى پوشتاڭىزدى نەمەسە الەۋمەتتىك جەلىلەردەگى جەكە پاراقشالارىڭىزدى تەكسەرىپ, ءبىر شولىپ شىققىڭىز كەلەدى. وسى ۋاقىتتا وز-وزىڭىزگە "جوق" دەگەن شەكتەۋ قويا الساڭىز, ءسىز بەلگىلى ءبىر مولشەردە ۋاقىت ۇنەمدەيسىز.

وزىڭىزدى ءبىر ىسپەن شۇعىلدانىپ جاتقان ۋاقىتتا باسقا نارسەگە الاڭداماۋعا ۇيرەتكەنىڭىز ابزال. ويتكەنى, ادام ويى بولىنگەننەن كەيىن جاسالىنىپ جاتقان شارۋانىڭ ناتيجەسى شيكى بولىپ شىعۋى ابدەن مۇمكىن. سونىمەن قاتار, ءبىر ۋاقىتتا ەكى شارۋامەن اينالىسۋدىڭ دا جاقسى اسەر ەتە بەرمەيتىنى بار. ادام ميىندا جۇمىس جاساپ جاتقان ۋاقىتتا ۇلكەن ۇدەرىستەر ءجۇرىپ جاتادى. ءبىرىنشى ۇدەرىستى توقتاتىپ قويىپ, ەكىنشىسىنە كوشۋ ءۇشىن ءبىرشاما ۋاقىت ولتىرەسىز جانە قاي جەرگە توقتاعانىڭىزدى, قاي شارۋا توڭىرەگىندە نە ويلاپ تۇرعانىڭىزدى شاتاستىرىپ الاسىز.

بارلىق نازارىڭىزدى ءبىر باعىتقا جۇمساساڭىز, ءىستىڭ ناتيجەسى كوڭىل تولتىرارلىقتاي بولىپ شىعارى انىق. ال ساپالى ناتيجە, ساپالى ءونىم – ءسىزدىڭ ىسكەرلىگىڭىزدىڭ, ەڭبەك ونىمدىلىگىڭىزدىڭ دالەلى.

ەڭ قيىن ارەكەتتەردى ەڭ ءبىرىنشى جانە بارىنشا جىلدام ورىنداعان ءجون

ادامداردىڭ بارلىعىندا ءوزى جاقتىرمايتىن, ءبىراق جاساۋ كەرەك دەگەن تيپتەگى دۇنيەلەر, ىس-ارەكەتتەر بولادى. ولاردى بارىنشا ۋاقىتىندا ورىنداپ, ارتقا قالدىرماعان ءجون. ناقتى شەشىم قابىلداڭىز دا, قيىندىق پەن جاعىمسىزدىق تۋدىراتىن ارەكەتتى ورىنداپ تاستاڭىز.

برايان ترەيسي "باقا جەڭدەر!" دەپ ايتادى. ەلەستەتىڭىز, ءسىزدىڭ ءبىر كۇنىڭىزدەگى ەڭ قيىن ءارى جيىركەنىشتى نارسە – ءتىرى باقانى جەۋ. ەگەر ءسىز بۇگىن ورىندالۋى ءتيىس ارەكەتتى تاڭەرتەڭگى ۋاقىتتا جۇزەگە اسىرساڭىز, كەشكە دەيىنگى ۋاقىتتا ەشتەڭەگە الاڭداماي جۇرەسىز.

ورىن الۋى مىندەتتى قيىن ارەكەتتىڭ ەڭ دۇرىس شەشىمى – ونى جىلدام ءارى تەز ورىنداپ تاستاۋ. ادام سول قيىن ارەكەتتى ۋاعىندا ورىنداماسا, ونى ويلاي بەرۋ ارقىلى ودان ءارى قيىنداتا تۇسەدى.

جوعارىدا ايتىلعان مىسالداعى باقانى تاڭەرتەڭ جەپ قويعان سەكىلدى ءوزىڭىز ءۇشىن قيىن دەپ ەسەپتەيتىن ارەكەتتى ەرتە ورىنداپ ۇلگەرسەڭىز, ءسىز جەڭىلدىكتى سەزىنەسىز. سونداي-اق, ءسىزدىڭ ميىڭىز ەندورفيندەرمەن, باقىت گورمونىمەن تولىعىپ, كوڭىل-كۇيىڭىزدىڭ كوتەرىڭكى جۇرۋىنە اسەر ەتەدى.

وزىڭىز قالاماعان ءىستى اتقارۋ قاجەتتىلىگى تۋىنداعاندا, سول ارەكەتتى جۇزەگە اسىرعاننان كەيىنگى سەزىلەتىن جەڭىلدىك تۋرالى ويلاڭىز. بۇل سىزگە قيىن ارەكەتتى ورىنداۋعا كومەكتەسەرى انىق.

 وز ۋاقىتىڭىزدى قاداعالاڭىز جانە وزگەلەردىڭ ءسىزدىڭ شەشىمدەرىڭىزگە بيلىك جۇرگىزۋىنە جول بەرمەڭىز

ومىر ءوز ۋاقىتىن جوسپارلاماعاندارعا, جالپى ادام بالاسىنا توسىننان جاعىمسىز جايتتار سىيلاۋى مۇمكىن. سول جاعىمسىزدىقتاردان قاشۋ ءۇشىن ءسىز ءوز ۋاقىتىڭىزدى ماڭىزدىراق دۇنيەلەردى ىسكە اسىرۋعا جوسپارلاپ وتىرىڭىز. سوندىقتان, ادامداردىڭ بارلىق ۇسىنىستارى مەن وتىنىشتەرىنە يىلە كەتپەي, قاجەتسىز دەپ ەسەپتەيتىن ارەكەتتەردەن سىپايى باس تارتۋدى ۇيرەنىڭىز.

ەگەر ءسىزدىڭ جەكە جوسپارلارىڭىز بولماسا, وزگە ادامنىڭ بولىگىنە اينالاتىنىڭىزدى ءتۇسىنىڭىز. ەڭ باستىسى, وزگەلەر ءۇشىن قولايلى ادام بولماۋ كەرەك.

سىز بىرەۋگە شۇعىل قاجەت بولعان جاعدايدا دا بارلىعىنا بىردەي سەنىم ارتۋدىڭ قاجەتى شامالى. ويتكەنى, ءسىز جوسپاردان تىس ءبىر ارەكەتكە بارۋ ارقىلى كەلەڭسىزدىككە ۇرىنۋىڭىز ابدەن مۇمكىن.

ۋاقىت – ءسىزدىڭ قايتا اينالىپ كەلمەيتىن ەڭ قىمبات قۇندىلىقتارىڭىزدىڭ ءبىرى. سوندىقتان, ونى ءتيىمدى ءارى پايدا الىپ كەلەتىن ارەكەتتەرگە عانا جۇمساعان ءجون. ەڭ ءبىرىنشى جاقسىلىقتى دا, پايدانى دا وزىڭىزگە جاساڭىز.

تاپسىرمالاردى ورىنداۋ بارىسىندا وز-وزىڭىزگە ادال بولىڭىز

وز-وزىڭدى الداۋ – اداميلىققا جات ءارى ۇلكەن قىلمىس. كەز-كەلگەن ادام قيىندىقتان قاشۋ ءۇشىن, تەككە ۋاقىت ولتىرەتىن دۇنيەلەردى جاساۋ ءۇشىن ءوز-وزىن ءوز وتىرىگىمەن سەندىرە الادى جانە ءوزىنىڭ سول ارەكەتىن اقتاپ الا الادى. ءبىراق ءتۇسىنىڭىز جانە سەنىڭىز: "ەرتەڭ" دەگەن ءسوز "ەشقاشان" دەگەن سوزبەن بىردەي. سونىمەن قاتار, ءسىزدى "اۋىر جۇمىس جاسادىڭ" دەپ كوندىرەتىن, جالقاۋلىققا جەتەلەيتىن ىشكى داۋىسىڭىزعا كوپ قۇلاق اسا بەرمەگەن ءجون. ال شىن مانىسىندە, ءسىز ارى كەتسە 5-6 ساعات قانا ەڭبەك ەتتىڭىز. سەنىڭىز, ءسىز ءوزىڭىزدىڭ ەرىك-جىگەرىڭىزدى قامشىلاپ وتىرساڭىز, بۇدان دا ونىمدىرەك جۇمىس جاساۋعا قابىلەتتىسىز.

سىز بەلگىلى ءبىر جەتىستىككە جەتۋدى قالاساڭىز, سول جولعا ماقساتتار قويىپ, جوسپار جاساپ, سول بويىنشا ارەكەت ەتىپ كەلە جاتساڭىز, وزگەنىڭ ءسىزدىڭ جەتىستىك شىڭىنا جەتەر جولىڭىزدى كەسۋىنە جول بەرمەڭىز. ويتكەنى, ءسىزدىڭ ماقساتىڭىز وزگەلەردىڭ كوڭىلىنە قاراعاندا الدەقايدا ماڭىزدى.

وزىڭىزدى جىگەرلەندىرەتىن دۇنيەلەردى انىقتاپ, سولاردى كۇندەلىكتى جاساۋدى داعدىعا اينالدىرىڭىز. مىسالى, تاڭەرتەڭگىلىك ءبىر شىنى اياق كوفە ءىشۋ ارقىلى, ءبىر اۋەن تىڭداۋ ارقىلى, ءبىر دوسىڭمەن سويلەسۋ ارقىلى, جاتتىعۋ جاساۋ ارقىلى اركىم ءارقالاي جىگەرلەنەدى. ءوز جولىڭىزدى انىقتاپ, سول ارەكەتتى كۇن تارتىبىنە ەنگىزىڭىز.

سىزدى جەتىستىككە جەتۋ جولىندا الاڭداتاتىن دۇنيەلەردەن ارىلىڭىز. ولار سىزگە جاعىمسىز كوڭىل-كۇي سىيلاۋى مۇمكىن. مىسالى, ارتىق سالماقتان ارىلعىسى كەلگەن ادامدارعا توڭازتقىشتان نەمەسە سورەدەن تابەت شاقىراتىن تاعامداردى الىپ تاستاۋ كادىمگىدەي ۇلكەن كومەك بەرەدى.

وز-وزىڭىزدى باسقارا الساڭىز, قاجەتسىز نەمەسە بوسقا ۋاقىت ولتىرەدى دەپ ەسەپتەلەتىن دۇنيەلەردەن باس تارتا بىلسەڭىز, سىزدە تۇلعالىق ءوسۋ ۇدەرىسى جۇرە باستايدى. ال ادامنىڭ تۇلعالىق بولمىسى وسكەن سايىن جەتىستىككە جەتەر جولدارى كوبەيەدى.