"؛nur otan"؛ نارازىلاردىڭ نازىنا قانداي جاۋاپ قاتتى؟ (ۆيدەو)

21 مامىر كۇنى الماتى قالاسىندا 60-تان اسا ادام يپوتەكالىق كرەديتتەرىن كەشىرۋدى تالاپ ەتىپ, "نۇر وتان" پارتياسى قالالىق عيماراتىنىڭ الدىنا جينالدى. ولار بيلىك پارتياسىنا بىرنەشە تالاپتارىن قويىپ, شاعىمدارىن قازاقستاننىڭ جوعارى بيلىگىنە (ەلباسى ن.نازارباەقا, قازاقستان پرەزيدەنتى قاسىم-جومارت توقاەۆقا, پارلامەنتكە) جەتكىزۋىن تالاپ ەتتى دەپ جازادى qamshy.kz اقپارات اگەنتتىگى. 

نارازىلار تالابى

نارازى توپتىڭ نازىن تىڭداپ, ميتينگ وتكەن مەكەمەنىڭ عيماراتىنان تىكەلەي رەپورتاج جاساعان "ازاتتىق راديوسى" تىلشىلەرىنىڭ ايتۋىنشا, شاعىمدانۋشىلاردىڭ اراسىندا وزگە قالادان كەلگەن ادامدار دا بار. ءبىراق ءبارىنىڭ تالابى ءبىر, مۇددەسى ورتاق. ولار ءبىراۋىزدان "قازاقستانداعى قازىرگى كرەديتتىك جۇيە حالىقتىڭ ەمەس, بانكتىڭ عانا پايداسىنا جۇمىس جاساپ تۇر" دەپ ەسەپتەيدى. كۇللى حالىقتىڭ كۇندىز ۇيقىسىن, تۇندە كۇلكىسىن ۇرلاعان بۇل جۇيەنىڭ "بۇيرەكتەي" بۇلىنۋىنە ءبىرىنشى كەزەكتە, نەسيە تۋرالى زاڭداردى قابىلداعان جوعارى باسشىلار مەن پارلامەت پالاتالارىن كىنالاعان نارازىلار "جوعارىداعىلاردان" سول زاڭداردى قايتا قاراۋىن تالاپ ەتىپ وتىر. ولار بيلىك وكىلدەرىنە تالاپتارىن 9 ماۋسىمدا وتەتىن كەزەكتەن تىس پرەزيدەنت سايلاۋىنا دەيىن ورىنداۋدى سۇرادى. "ناقتى ءىس كۇتەمىز, ناقتى ءىس دەگەنىمىز كرەديت امنيستياسى بولۋى كەرەك" دەدى جۋرناليستەرگە "ار-نامىس-5" قوعامدىق بىرلەستىگىنىڭ ءتوراعاسى قاناعات تاكەەۆا. 

نۇر وتان سوندا نە دەدى؟

نارازىلاردى "نۇر وتان" پارتياسىنىڭ الماتىداعى فيليالىنىڭ وكىلى, قازاقستان پرەزيدەنتتىگىنە كانديدات قاسىم-جومارت توقاەۆتىڭ الماتىداعى شتابىنىڭ مۇشەسى بوريس جاپاروۆ قابىلدادى. ول "جينالعانداردىڭ تالابى ورىندى. ءبىز بۇنى جوعارى بيلىككە جەتكىزەمىز جانە وڭ شەشىمىن تابۋىن تىلەيمىز. ءبىراق ۇكىمەتتىڭ شەشىمىنە جاۋاپ بەرە المايمىز. "نۇر وتان" يپوتەكالىق نەسيە ال" دەپ ەشكىمدى ۇگىتتەگەن ەمەس جانە بۇل ماسەلەمەن اينالىسپايدى" دەدى. 

ۆيدەو ازاتتىق راديوسىنىڭ you tube پاراقشاسىنان الىندى.

♦وقي وتىرىڭىزدار: قارىزى باردىڭ "nur otan"-عا ارىزى بار

دايىنداعان: ميات كاشىباي