بىرنەشە بانكروتتى باستان كەشكەن بيزنەسمەندەر بايانى

ومىر – قۇلاۋ مەن قايتا بوي تىكتەۋدەن تۇراتىن ەرەكشە قۇبىلىس. ومىردە تۋرا داڭعىل جولدىڭ بولا قويۋى ەكىتالاي. سوندىقتان, كەز-كەلگەن قادامدى باتىل ءارى نىق قادام باسۋ كەرەك. بۇل تۋرالى ەلباسىمىز ءوزىنىڭ "بولاشاققا باعدار: رۋحاني جاڭعىرۋ" اتتى باعدارلامالىق ماقالاسىندا دا ناقتىلاپ ايتقان ەدى. ەندەشە دامۋشى ەلدىڭ وعلاندارىنا ساباق ءارى قۇلاققاعىس بولسىن دەگەن ويمەن الەمگە اتى ءماشھۇر بولعان اتاقتىلاردىڭ ءسۇرىنىپ, قايتا تۇرعان ساتتەرىن بايانداپ وتەلىك. 

ستيۆ دجوبس – تەحنولوگيا الەمىنىڭ بەت-بەينەسىنە اينالعان اڭىز تۇلعا. ول ۋاعىندا قاتال باسشى بولىپ, بىرنەشە رەت قىزمەتكەرلەرىنە دورەكىلىك تانىتادى. وسى سەبەپتەن ونى 1985 جىلى apple كومپانياسىنىڭ ديرەكتورلار كەڭەسى جۇمىستان بوساتادى. راس, وسىنداي لاۋازىمدى قىزمەتىنەن ايىرىلۋ كاسىپكەرگە اۋىر تيەرى ءسوزسىز. ءبىراق ستيۆ مويىمادى. سودان كەيىن next اتتى كومپانيا اشتى جانە pixar اتتى كىشكەنە ستۋديانى ساتىپ الدى. كەيىن, 1997 جىلى عانا ول apple كومپانياسىنا قايتا ورالدى. ارتىنشا اتاقتى "الما" كومپانيا دجوبستىڭ باسشىلىعىمەن الەمگە تانىمال بولىپ, نارىقتى باسىپ الدى. بۇل – دجوبستىڭ ءوز قاتەلىگىنەن ساباق الىپ, ونى تۇزەتە بىلگەنىنىڭ ايقىن دالەلى.  

كەيىن ستيۆ ستۋدەنتتەرمەن كەزدەسكەندە سول جولى جۇمىستان شىعىپ قالعانى وعان پايدا اكەلگەنىن ايتادى.  

يلون ماسك – ومىرىندە قيىندىققا مويىماي, بىرنەشە ساتسىزدىكتەن كەيىن تاماشا جەتىستىككە قول جەتكىزگەن ادام. ول اسىرەسە 90-جىلداردىڭ باسىندا ۇلكەن رۋحاني قۇلدىراۋعا ۇشىراعان. سول ۋاقىتتا ءوزى نەگىزىن قالاعان paypal كومپانياسىنان جۇمىستان قۋىلادى. سودان كەيىن netscape كومپانياسىنىڭ جۇمىستارىمەن اينالىسىپ تا ساتسىزدىكتەرگە ۇشىرادى.  

تەك قانا وسىنداي بىرنەشە ساتسىزدىكتەردەن كەيىن ول ءوزىنىڭ العاشقى بيزنەسى zip2 كومپانياسىن اشتى. ال paypal كومپانياسىنان كەيىن tesla, spacex, neuralink جانە the boring company سياقتى الىپتاردىڭ نەگىزىن قالادى.  

باربارا كوركوران – كاسىبي مانسابىن ساتسىزدىكتەردەن باستاپ, كەيىن اتاعى الەمگە ءماشھۇر بولعان ازاماتشا. ينۆەستور جانە  corcoran group جىلجىمايتىن مۇلىك اگەنتتىگىنىڭ نەگىزىن قالاۋشىنىڭ مانسابى ايتارلىقتاي ءساتسىز باستالعان. باربارا 22 جاسىندا داياشى بولىپ جۇمىس ىستەپ ءجۇرىپ, جىگىتىنەن اگەنتتىك اشۋ ءۇشىن قارىزعا اقشا الادى. جۇپ بولىپ بيزنەستى بىرگە دامىتىپ جاتقان باربارا مەن ونىڭ جىگىتىنىڭ ورتاق بيزنەسىنىڭ عۇمىرى جەتى-اق جىل بولدى. ويتكەنى, باربارانىڭ سۇيىكتىسى ونىڭ حاتشىسىن الىپ, ەكەۋى وتباسى قۇرعان.  

ارادا بىرنەشە جىل وتكەننەن كەيىن باربارا shark tank شوۋىنىڭ تورەشىلىگىنە كانديداتۋراسىن ۇسىنادى. ءبىراق ارتىنشا كوركوراندى المايتىن بولىپ شەشىم قابىلداعان رەجيسسەر بۇل ازاماتشانىڭ ورنىنا باسقا كاسىپكەردى الۋدى ءجون كورىپتى. سوندا باربارا پروديۋسەرگە حات جازىپ, ءوزىن قابىلداماسا كوپتەن قۇر قالاتىنىن اڭعارتقان.  

"مەنىڭ مانساپ جولىمداعى جەتىستىكتەردىڭ ءبارى قارسىلىق بىلدىرە الماي زارداپ شەككەن جاعدايلاردان كەيىن كەلەدى. مەن ولارعا ءوز ومىرىمنەن ونداعان تاجىريبەمدى ۇسىندىم", - دەپ حاتتا نە جازعانىن ايتادى كوركوران.  

ۋوررەن باففەت – عالامشارداعى ەڭ باي ادامداردىڭ ءبىرى. ول العاشقى قاراجاتىن 11 جاسىندا تاۋىپ, ارتىنشا اقشا تابۋمەن اينالىسىپ كەتكەن. دەگەنمەن, ونىڭ دا مانسابىندا ۇلكەن قيىندىقتار ورىن العان. ول 19 جاسىندا ارمانىنا اينالىپ, تۇسىنە كىرىپ, تۇنگى ۇيقىسىنان قالدىرعان گارۆارد ۋنيۆەرسيتەتىنە تۇسپەكشى بولادى. ءبىراق ونىڭ بۇل ارمانى ورىندالمايدى.  

"مەن 16 جاستاعى جىگىتكە ۇقسادىم. ءبىراق توعىز جاسار بالا سەكىلدى ەموسياعا بەرىلگىش بولدىم. مەن گارۆاردتىڭ كىرە بەرىسىندە تۇلەكتەرمەن ون مينۋت كولەمىندە سويلەستىم. ولار مەنىڭ قابىلەتىم جارامايتىنىن ايتىپ, قابىلدامايتىندىقتارىن جەتكىزدى", - دەيدى ول.  

گارۆاردتان سۇرىنگەن باففەت سول كەزدە كولۋمبيا ۋنيۆەرسيتەتىنىڭ بيزنەس مەكتەبىنە قابىلدانىپ, سول جەردەن قاراجات تارتۋ, قارجى قۇيۋ سەكىلدى بيزنەسكە قاجەتتى دۇنيەلەردى يگەرىپ شىعادى. وسىداي كەيىن بارىپ قانا ونىڭ العاشقى تابىسى قولىنا كەلە باستادى.  

دجەفف بەزوس – قازىرگى ۋاقىتتا امەريكالىق كومپانيالار ەكىنشى شتاب-پاتەرىن ورنالاستىرۋ ءۇشىن تالاسىپ جاتقان amazon كومپانياسىنىڭ يەسى. دەسەك تە, بەزوسقا بۇل كومپانيانى اشۋ, وسىنداي دارەجەگە كوتەرۋ وڭاي بولعان جوق. ول كومپانياعا 1 ميلليون دوللار ينۆەستيسيا تارتۋ ءۇشىن 60 كەزدەسۋ وتكىزگەن. 22 ينۆەستورمەن كەلىسسوز جۇرگىزىپ, اربىرىنەن 50 مىڭ دوللاردان ينۆەستيسيا تارتقان.  

"ماعان بارلىعى وتە قيىن بولدى. ءالى جارىققا شىقپاعان دۇنيە كۇيرەپ كەتە جازداعان دا ساتتەر بولدى. بۇل – 1995 جىل ەدى. ءاربىر ينۆەستور مەنەن "عالامتوردىڭ" نە ەكەنىن سۇرايتىن", - دەدى بەزوس.  

كاسىپكەردىڭ ايتۋىنشا, جوبا جۇزەگە اسىپ, قولدانىسقا ەنگەننەن كەيىن بارلىعى ويىنداعىداي جۇمىس جاساي باستاعان.  

كاسىپ جاساۋ ارقىلى ادام تۇلعا رەتىندە داميدى جانە ءوزىن ءتۇرلى باعىتتاردا سىناپ كورەدى. كاسىپتىڭ جولى اۋىر, كۇتىمى قيىن. ونى وزدەرىڭىز جوعارىدا ءبىز تىلگە تيەك ەتكەن اتاقتى كاسىپكەرلەردىڭ پىكىرلەرىنەن بايقاعان بولارسىزدار. دەگەنمەن, ادامنىڭ قولىنان كەلگەن دۇنيە ءسىزدىڭ دە قولىڭىزدان كەلەتىنىنە ءشۇبا كەلتىرمەڭىز. ويتكەنى, جەتىستىككە جەتۋ ءۇشىن ەڭبەكتەنە ءبىلۋ شارت. ەرىنبەي ەڭبەكتەنگەن ادام ءوز ءىسىنىڭ جەمىسىن جەيتىنى انىق.  

وز-وزىڭدى قامشىلاۋ – جانايارلىقتان قۇتقارىپ, جەتىستىككە جەتەلەيدى. وسىدان كەلىپ ادامنىڭ دارەجەسى ءوسىپ, باسەكەگە قابىلەتتىلىك دەڭگەيى ارتىپ, ماقساتىنىڭ اۋقىمى ۇلعايا تۇسپەك. سوندىقتان, الدىڭىزعا ءىرى ماقسات قويۋدان ەشقاشان قورىقپاڭىز.  

مەملەكەت ازاماتتارعا قولداۋ كورسەتىپ وتىرعان شاقتا قول قۋسىرىپ وتىرۋعا استە بولمايدى. ءوزىڭىزدىڭ قالاعان كاسىبىڭىزدى باستاپ, سول كاسىپتى دوڭگەلەتىپ وتىرساڭىز, سىزدە بارلىعى ورىندالادى. ارمان مەن ماقساتتى ۇشتاستىرىپ, جەتىستىككە جەتۋ جولىن قاراستىرا ءبىلىڭىز.