ەندى جىنىسقا قاراي جۇمىسقا تۇراسىز: گەندەرلىك ساياساتتىڭ ۇلەس-سالماعى

باسەكەلەستىك, جەتىستىك شىڭىنا تالاس, تولاسسىز تارتىس... بۇگىنگى قوعامداعى كاسىپكەرلىك سالاسىنىڭ اينالاسىنداعى ءحال-احۋال وسىنداي. بايراقتى باسەكەدە جۇزدەن جۇيرىك, مىڭنان تۇلپار شىققاندار عانا جەتىستىك تۋىنا قول جەتكىزەدى. ەگەر بەلدەسۋ ءۇشىن جارالماعان جان بولساڭىز, ات تەرلەتىپ, "اتتان سالىپ", بۇل دوداعا كىرۋدىڭ نەگىزى جوق.

ەرتەرەكتە ايەل ادامدار باسشىلىق بيىككە كوتەرىلۋ ءۇشىن ەر ادامعا ءتان قاسيەتتەردى ءوز بويىنا كوشىرۋگە تىرىساتىن. جاسامپاز ۇرپاق ءداۋىرى باستالعالى بەرى ەر مەن ايەلدىڭ قوعامداعى كەز-كەلگەن رولدە اسا ءبىر ايىرماشىلىعى سەزىلمەيتىن بولدى. باستىسى – جاڭا تالاپتار مەن قۇقىقتىق زاڭنامالارعا, كاسىپ تاقىمىنا قاراي تەز يكەمدەلەتىن جان بولسا بولدى. دەمەك, جىنىسقا قاراي جۇمىسقا تۇرۋ دەگەن قاعيدانى بۇگىندە ولدىگە ساناۋعا بولادى.

جوعارىدا ايتىلعان جايتتار الەم بويىنشا ورىن الىپ جاتقان وزگەرىستەر بەينەسىنەن ءبىر ۇزىك كورىنىس. ال قازاقستانداعى بيزنەس-ورتادا بۇل وزگەرىستىڭ جۇزەگە اسۋ قارقىنى تىم باياۋ. بىزدە وتكەن عاسىرلارداعى "قاتتى قاعيدا" ءالى كۇنگە دەيىن ەرىمەي كەلەدى. ەر ادام باسشىلىققا, ايەل ادام حاتشىلىققا دەگەن ىسپەتتى قاعيدالاردىڭ جويىلماۋى – اتالعان وزگەرىستەردىڭ جەدەل ىسكە قوسىلماۋىنا كەدەرگى.

ستاتيستيكالىق مالىمەتتەرگە كەزەك بەرسەك, كەز-كەلگەن كومپانياداعى لاۋازىمدى پوزيسيالاردىڭ تەك 20 پايىزىن ايەلدەر قۇرايدى ەكەن. بۇل كورسەتكىش ەلىمىزدە ءالى وتكەننىڭ قالدىعى قىزمەت جاساپ تۇرعانىن كورسەتەدى. ارينە, ايەلدەر جوعارى تاپقا كوتەرىلىپ, ەرلەرمەن تەڭەسۋى قاجەت دەپ تابانداپ تۇرىپ الۋعا جانە بولمايدى. ويتكەنى, كومپانياداعى لاۋازىمدى ورىندارعا كىم لايىق سول وتىرۋعا ءتيىس. ادامنىڭ بارلىعىنا بىردەي باسشىلىق, ۇيىمداستىرۋ سياقتى قابىلەتتەر قاتار ۇلەستىرىلمەيتىنىن وسى جەردە ەسكەرگەن ءجون.

قازىرگى ۋاقىتتا مامانعا قويىلاتىن تالاپ قانداي؟

"وسىنداي قىزمەتكە تەك ەر/ايەل ادام سايلانسىن" دەگەن زاڭناما ەش جەردە جوق. سوندىقتان, كومپانيانىڭ نەگىزگى باسشىلىعىنا نەمەسە مەنەدجەرلەرگە قىزمەتكەر تاڭداعان ۋاقىتتا جۇمىسقا تۇرۋعا ءوتىنىش بەرۋشىنىڭ جاڭا ورتاعا قالاي تەز ۇيرەنىسەتىندىگىنە, قۇلشىنىسىنا, جاۋاپكەرشىلىگىنە اسا ۇلكەن كوڭىل ءبولۋ كەرەك. وكىنىشكە قاراي, قازىرگى ۋاقىتتا سەلەكسيا قىزمەتىنە جاۋاپ بەرەتىن ماماندار جاڭا قىزمەتكەردى جىنىسىنا قاراي تاڭداۋىن ءالى تاستاماي كەلەدى.

ساندىق جۇيەنىڭ قولدانىسقا ەنۋى ارقىلى يەرارحيالىق قاعيدالار قازىرگى ۋاقىتتا جۇمىس جاسامايدى. "مەن – باسشىمىن, ءبارىن ءوزىم بىلەمىن, قالاي جانە قاشان جاساۋ كەرەكتىگىن مەن شەشەمىن" دەگەن مودەل – ەسكىلىكتىڭ بەلگىسى. بۇگىنگى كۇنى-اق حولاكراتيالار سانى وتە جىلدام ارتىپ كەلەدى.

بارلىعىمىز قاتار تىنىستاپ كەلە جاتقان داۋىردە اقپاراتتىڭ مولدىعى سونشا, ءبىر ادام ونىڭ بارلىعىن ساراپتاپ, قابىلداي المايدى. ويتكەنى, باسشى بولا تۇرا, ودان دا مىقتى بىلەتىن ادامداردىڭ بولۋى ابدەن مۇمكىن. سوندىقتان, قازىرگى باسقارۋ, قىزمەت جاساۋ جۇيەسى ورتالىقتاندىرىلعان جانە ءبىر-بىرىنىڭ كومەگىنە جۇگىنەتىن قالىپقا كوشكەن.

كەيبىر مەكەمەلەردە باسشىنىڭ ءرولى تەك قانا قىزمەتكەرلەردىڭ جىگەرىن جانيتىن ادام بولۋى مۇمكىن. ۇيىمداسىپ قىزمەت ەتە الماعان ۇجىمنىڭ قازىرگى كەزدە باسەكەگە قابىلەتتىلىگى, ەڭبەك ونىمدىلىگى تومەندەپ كەتۋى شارتتى دۇنيە ىسپەتتى.

دەمەك, ءبىزدىڭ ەلدەگى كومپانيالار مەن بارلىق ۇجىمدارعا باسقارۋ فورماسىن قايتا ءبىر سۇزگىدەن وتكىزىپ, جاڭا فورماتقا بەت الۋ قاجەتتىلىگى تۋىنداپ وتىر. سول كەزدە عانا ۇجىم جۇمىسى قارقىن الىپ, باسەكەلەستەر اراسىندا ءوز ۇلەسىن الىپ وتىراتىنى انىق.

جىلدار بويى قالىپتاسقان باعىتتىڭ ەسكىرەتىنى دە وتىرىك ەمەس. زامان تالابىنا قاراي يكەمدەلگەندەر بەلگىلى ءبىر جەتىستىك شىڭىنا شىعىپ جۇرگەنىنە ۋاقىت كۋا. "زامانىڭ تۇلكى بولسا, تازى بوپ شال" دەگەن حالىق ناقىلى دا وسى جەرگە تۋرا ۇيلەسەتىندەي.

جىنىس پەن ۇلتقا, ءدىن مەن ۇلىسقا ءبولىنۋ – قىزمەت ساپاسىن تومەندەتەتىن نەگاتيۆتەر. جەتىستىككە جەتىپ, باسەكەلەستەردىڭ الدىنا شىعۋ ءۇشىن جۇمىلعان جۇدىرىقتاي مىعىم بىرلىك قاجەت.