ميللياردەر ءوز قۇپياسىمەن ءبولىستى: از جۇمىس جاسا, كوپ اقشا تاپ!

كاسىپكەرلىك – زاۋقىڭ سوقسا قىزمەت ەتىپ, قالاعان ۋاقىتىڭدا دەمالاتىن سالا ەمەس. كاسىپپەن اينالىسقان تۇلعا ءارقاشان دامۋ مەن ىزدەنىس ۇستىندە, ءونىمدى ەڭبەك ەتۋ ۇدەرىسىندە بولۋى شارت. ەگەر بۇل "تارتىپكە" كونۋدەن باس تارتسا, العا باسقان ءبىر قادامى كەيىن كەتىپ, ەڭ اقىرىندا قۇلدىراۋ مەن داعدارىستىڭ قۇرباندىعىنا اينالادى. قازىرگى نارىق تالاپتارى ەڭبەكتى ەكى ەسەلەۋدى تالاپ ەتەدى. ولاي جاساماعان كاسىپكەر باسەكەلەستىكتە ۇتىلىپ, ءوز ءونىمىنىڭ جەمىسىن كورۋ تۇرماق, شىعىنىن وتەۋ بارىسىندا قيىندىقتارعا تاپ بولادى. "زامانىڭ تۇلكى بولسا, تازى بوپ شال" دەگەن حالىق ءسوزى وسى جەردە تۋرا كەلەتىن ىسپەتتى.

qamshy.kz اقپارات اگەنتتىگى ازاماتتارعا ءبىر پايداسى تيەر دەگەن ويمەن الەمدىك ارەنادا جەتىستىك شىڭىن باعىندىرعان ايگىلى تۇلعالاردىڭ كەڭەستەرىن, ولاردىڭ جەتىستىككە اپارار جول دەپ ەسەپتەگەن قاعيدالارىن ۇسىنىپ كەلەدى. بۇگىن دە سول باعىتىمىزدان اينىماي, دجوردج سوروستىڭ ءوز تاجىريبەسىندە داعدىعا اينالدىرعان 15 كەڭەسىن ۇسىنۋدى ءجون كورىپ وتىرمىز.

17 جاسىندا تۋعان جەرىن تاستاپ, باتىسقا جونەلگەن, سوندا داياشى, باقشادا قاتارداعى جۇمىسشى بولىپ قىزمەت ەتكەن سوروس قانداي كەڭەس بەرمەك؟ بىلگىڭىز كەلسە, ءارى قاراي وقىڭىز.

"مەن ءومىردىڭ زاڭدىلىعىمەن جۇرگەننەن گورى ول ەرەجەلەردى وزگەرتكەن دۇرىس دەپ ەسەپتەيمىن"

ادام ءبىر زاڭدىلىققا ءوزىن باعىندىرعاننان گورى مۇمكىندىگى جەتسە, ءوز تاقىمىنا ءدوپ كەلەتىن ەرەجەلەرمەن جۇرگەنى ابزال. بۇل ارقىلى "ويىڭا نە كەلسە, سونى ىستە" دەگەن ۇگىت-ناسيحات جۇرگىزبەكشى ەمەسپىز. ءوز قۇزىرىڭ بار جەرلەردە بارلىعى ءونىمدى ەڭبەك ەتۋى ءۇشىن كەي نارسەلەردى وزگەرتە بىلگەن ابزال ەكەنىن جەتكىزۋ – ماقسات.

"مەن وزىمە جانە وزگەلەرگە سىني كوزقاراستا قارايتىن اداممىن"

سىن – قاتەلىكتەردى كورۋگە جانە ولقىلىقتاردىڭ ورىنىن دەر شاعىندا توقتاتا بىلۋگە كومەكتەسەتىن تاماشا قاسيەت. اتاقتى ميللياردەر وزىنە ەشقاشان وتىرىك ەسەپ بەرمەۋدى, قاتەلىكتەرىن شىنىمەن مويىنداي ءبىلۋدى ءجون دەپ ەسەپتەيدى. ونىڭ پايىمداۋىنشا, وسى ارقىلى ادام ءوز بويىنداعى كەمشىلىكتەرىن ۋاقىتىندا ۇعىپ, ونى تۇزەتۋ ءۇشىن ارەكەت ەتەدى.

"وزگەلەر قاتەلەسۋگە ۇيالادى, ال مەن ءۇشىن ءوز قاتەلىكتەرىمدى سەزىنۋ – ءلاززاتتى دۇنيە"

قاتەلەسۋ ادامزات بالاسىنا ءتان نارسە. ءبىراق قاتەنى ۋاقىتىندا ءتۇسىنىپ, ونى قالپىنا كەلتىرۋ ءۇشىن ارەكەت ەتۋ, كەلەسى جولى اتالعان قاتەلىكتەردى قايتالاماۋعا تىرىسۋ بارلىعىنا بىردەي بەرىلگەن قاسيەت ەمەس. ادامدار قاتەلەسكەننەن كەيىن ونى تۇزەتۋ ارقىلى ءوزىنىڭ شالىس قادامىن وزگەلەر كورەدى دەپ قىسىلعاندىقتان ەشتەڭە جاسامايدى نەمەسە قاتەلىگىن ءوزى مويىنداي الماي جۇرە بەرەدى. سوروس ءوز قاتەلىگىن ۋاقىتىندا تاني ءبىلۋ تۇسىنگەن ادامعا ءلاززات سىيلايتىنىن ايتادى.

"قاۋىپ پەن تاۋەكەل بار جەردە قىزمەتكە دەگەن قۇلشىنىس, ونىمدىلىك بولادى"

كاسىپ سالاسىندا بولسىن, وزگە باعىتتا بولسىن, ادامدار ماتەريالدىق جانە رۋحاني تۇرعىدا داعدارىسقا تۇسۋدەن قاشادى. بۇل – دالەلدەنگەن قاعيدا. دەمەك, ءوزىڭىزدى ەڭبەككە يتەرمەلەي تۇسەتىن وسىناۋ ءبىر وسال تۇسىڭىزدى مىقتاپ پايدالانعانىڭىز ءجون. ءبىرىنشى دەڭگەيگە ءبىر-اق تۇسىرەتىن ءقاۋپى بار نەمەسە تاۋەكەل ەتۋ قاجەت ارەكەتتەرمەن اينالىسىڭىز. ءبىر نارسەگە ءمان بەرگەنىڭىز ابزال. ءسىز قاۋىپكە باس تىككەن نەمەسە تاۋەكەل ەتكەن دۇنيەنىڭ جوسپارلى تۇردە ورىندالعان ۋاعىندا وزىڭىزگە تابىس اكەلەتىن بولۋىن ەستەن شىعارماۋ قاجەت.

"مەن جۇمىس ىستەگەندى ۇناتپايمىن. تەك قانا شەشىم قابىلداۋعا قاجەتتى ەڭ تومەنگى شەكتەگى تاپسىرمانى ورىندايمىن"

ادامدار كوپ جۇمىس جاساۋ جەتىستىككە جەتكىزەدى دەپ ويلايدى. شىن مانىندە مۇلدە ولاي ەمەس. ادام اقىلمەن جۇمىس جاساپ, بارلىعىن جوسپارلى تۇردە ورىنداعان كەزدە عانا جەتىستىككە جەتە باستايدى. دەمەك, بارلىعىن ماقساتىڭىزعا وراي, اقىلدى تۇردە جاساۋعا بەت بۇرىڭىز.

"قاجەت كەزىندە بار كۇشىمدى سارقىپ جۇمىس جاسايمىن"

كەز-كەلگەن ادامدا قۇلشىنىس ارتىپ نەمەسە تومەندەيتىن ۋاعى بولادى. ادامنىڭ قۇلشىنىسى ەڭبەك ونىمدىلىگىنە تىكەلەي اسەر ەتەدى. ءبىراق كۇندەلىكتى ستاندارتتى جۇمىس جاساۋ ەشقانداي پايدا اكەلمەۋى مۇمكىن. ءوز ۋاقىتىڭىزدى ءتيىمدى پايدالانىپ, قۇلشىنىسىڭىز ارتىپ تۇرعان مەزگىلدە ءونىمدى جۇمىس جاساۋعا داعدىلانىڭىز. بۇل ارقىلى ءسىز ءوز سالاڭىزدا جەتىستىككە جەتۋگە باعىت الاسىز.

"مەن ءارقاشان تۇيىق بولدىم. بۇل ماعان قارجىلىق الەۋەتىمدى كوتەرۋگە كومەكتەستى"

تۇلعانىڭ مىنەزى اشىق بولۋى نەمەسە بارلىعىن وزگەلەرمەن بولىسكىسى كەلىپ تۇراتىن قاسيەتى كەيدە ونىڭ دامۋ جولىندا كەدەرگى بولاتىنى بار. سوروس ءوزىن ءبىراز نارسەنى قۇپيا ۇستاۋعا, جوسپارلاعان ءىسىن ورىندالمايىنشا ەشكىمگە ايتپاۋعا داعدىلانعانىن ايتادى. ونىڭ پايىمداۋىنشا, ءدال وسى "تۇيىقتىق" ادام دامۋىنا ءبىرشاما جاقسى اسەر ەتەدى.

"الدىمەن جاقسى ءومىر سۇرۋگە سوسىن پايدا تابۋعا ۇمتىلدىم"

قازىرگى قوعامدا ءبىرىنشى ورىندا ەل قاتارلى ءومىر ءسۇرۋ تۇرادى. ۇلكەن قالالاردا جەكە باسپاناڭنىڭ بولۋى, جەكە كولىگىڭنىڭ بولۋى سەكىلدى قاجەتتىلىكتەرگە قول جەتكىزۋ ارقىلى ەش ۋايىمسىز پايدا تابۋ جولىنا تۇسۋگە بولادى. ويلانىڭىز. ءسىز اي سايىن پاتەراقى تولەپ, تاكسيمەن ءجۇرىپ-تۇراتىن بولساڭىز, قور جيناۋعا مۇمكىندىگىڭىز بولادى ما؟ ارينە, جوق. سوندىقتان, ءوزىڭىزدىڭ تۇرمىستىق قاجەتتىلىكتەرىڭىزدى تولىقتىرىپ قويۋعا تىرىسىڭىز.

"ادام ومىرىندەگى قاتەلىكتەر بيولوگياداعى مۋتاسيا جانە ەۆوليۋسيا ۇدەرىسى سەكىلدى"

جوعارىدا دا ايتىپ وتتىك, قاتەلىك ادام دامۋىنا اسەر ەتەتىن بىردەن-بىر فاكتور. الەمدىك ارەنادا جەتىستىك شىڭىن باعىندىرعانداردىڭ كوپشىلىگى ومىرىندە جۇزدەگەن قاتەلىكتەرگە ۇرىنعاندارىن, سونان سوڭ تۋرا جولدى تاپقاندارىن ايتادى. دەمەك, قاتەلەسۋدەن قورىقپاۋ قاجەت. تەك قانا تۋرا جولدى تابۋعا ۇمتىلماق شارت.

"مەن وزگەلەر ۇسىنعان ەرەجەلەردى قابىلدامادىم. ەگەر سولاي جاساعاندا, ءومىر سۇرمەس ەدىم"

جەر بەتىندە قانشا ادام بولسا, ءاربىرىنىڭ ەشكىمدىكىن قايتالامايتىن ءوز جولدارى بار. سول جولدا جەتىستىك شىڭىنىڭ قاي تاراۋدا جاتقانىن دا ەشكىم بىلمەيدى. ويتكەنى, ول ءىر ادامدا ءارتۇرلى توراپتىڭ تورىندە ورنالاسقان. ءتۇرلى كەڭەستەردەن تەك قانا تاجىريبە جيناۋعا بولادى. ءبىراق تۋرا بىرەۋدىڭ كەڭەسى ارقىلى ءجۇرۋ – قاتە باعىت. ءوزىڭىزدىڭ تاجىريبەڭىز بەن وزگەلەردىڭ پىكىرلەرىن تىڭداي وتىرىپ, ءوز جەتىستىگىڭىزگە اپارار داڭعىلدى تاپقانىڭىز ابزال.

"مەن ريزاشىلىق پەن لايىقتى بولۋدى كوپ شاتاستىردىم"

الەمدەگى كەز-كەلگەن كىسىنىڭ ريزاشىلىق پەن ماقتاۋعا, ماراپاتتاۋعا قۋاناتىنى انىق. ولار كوپ جەردە وزىنە لايىق ماراپات الىپ جاتىرمىن دەپ ويلايدى. دەگەنمەن, قازىرگى قوعامدا كوپ ادام ءوزىنىڭ دارەجەسىنە لايىق ەمەس ماقتاۋلارعا يە بولىپ جاتادى. بۇل – كۇندەۋ نەمەسە كورەالماۋشىلىق ەمەس. تەك قانا وسى جاعداي ادام دامۋىنىڭ كەرى كەتۋىنە تىكەلەي اسەر ەتەتىنىن ۇمىتپاۋ كەرەك. ماراپاتتان باس تارتپاڭىز, دەسە دە, ونىڭ بۋىنا ۇرىنىپ, ءوزىڭىزدىڭ قارقىنىڭىزدى جوعالتىپ الماعانىڭىز ابزال.

"مەن اقشانى بىلاي تاپتىم: تەك قانا قارجى نارىعىندا بولىپ جاتقان وزگەرىستەردى مەزگىلىندە تۇسىنۋگە تىرىستىم"

سوروس وسىلاي دەيدى. بۇل قاعيدا تەك قانا قارجى نارىعىندا ەمەس, بارلىق سالادا قىزمەت جاسايدى. ءوز باعىتىڭىزداعى جاڭاشىلدىقتاردى جەدەل تانۋعا ۇمتىلىپ, سولاردى ءوز پايداڭىزعا وڭتايلاي تۇسسەڭىز, نۇر ۇستىنە نۇر. جاڭاشىلدىقتار داۋىرىندە ءاربىر وزگە نارسەنىڭ سۇرانىسقا يە بولاتىنى, ال سۇرانىستىڭ ارتىندا قىرۋار قاراجات جاتقانى ايتپاسا دا تۇسىنىكتى نارسە.

"جەتىستىككە جەتۋ ءۇشىن ءتۇرلى ادامدارمەن سويلەسەتىن بوس ۋاقىتتاردىڭ كوپ بولعانى جاقسى"

قازىرگى قوعامدا ادامداردىڭ كوپشىلىگى جۇمىستان باس الماي, اۋىر گرافيكپەن قىزمەت ەتەدى. بۇلاي جۇمىس جاساۋ ادامنىڭ دامۋ مۇمكىندىكتەرىن شەكتەيدى جانە وزگە باعىتتاردى سىناپ كورۋدەن ايىرادى. سوروستىڭ كەڭەسىنە قۇلاق تۇرسەك, ول ادامدارمەن كوپ سويلەسۋ, وزىڭە جاڭا ءبىر ورتا اشۋ ارقىلى عانا جەتىستىككە جەدەل جەتۋگە بولادى ەكەن.

"اقشا – جەتىستىككە جەتۋ جولىنداعى ءبىر عانا قاجەتتىلىك. اقشانىڭ كەي جاعدايلاردا پايدا عانا ەمەس, زيان دا تيگىزەتىن كەزدەرى بولادى"

اقشا بارلىق كەدەرگىنى شەشەتىن قۇدىرەت ەمەس. ەسىڭىزدە بولسىن, بارلىعى اقشاعا كەلىپ تىرەلمەيدى. اقشا – قاجەتتىلىك. ورىنىمەن تاۋىپ, ورىنىمەن جۇمساۋ قاجەت.

"سەنىڭ دۇرىس نەمەسە بۇرىس ەكەنىڭ تۇك تە ماڭىزدى ەمەس. ماڭىزدىسى – قانشا پايدا تاپساڭ دۇرىسسىڭ, قانشا دۇنيە جوعالتساڭ, قاتە جولداسىڭ"

سوروستىڭ بۇل ءسوزى كوپ نارسەنى ايقىنداپ بەرەدى. ول قاتەلىكتەر مەن دۇرىس جولدىڭ ساعان اكەلەر ماتەريالدىق ءھام رۋحاني پايداسىمەن ەسەپتەلەتىنىن ءبىر اۋىز سوزگە تاماشا سىيدىرا بىلگەن. بۇل – ءومىر شىندىعى.