ناتيجە كورسەتەتىن كوماندا جيناۋ جولدارى

ەلىمىزدەگى جەكە كاسىپتە نەمەسە مەملەكەتتىك ۇيىمداردا جۇمىس جاسايتىن بارلىق ماماندار, باسشىلار تەوريالىق ءھام تاجىريبەلىك ءبىلىم تۇرعىسىنان تولىققاندى جەتىلگەن بولۋى شارت.

qamshy.kz اقپارات اگەنتتىگى ءوز وقىرماندارىنا قانداي دا ءبىر پايداسى تيەر دەگەن ويمەن باسقارۋدىڭ, ءونىمدى ەڭبەك ەتۋدىڭ ءتۇرلى ادىستەرىن جاريالاپ كەلەدى. نازارلارىڭىزعا مايكل بلۋمبەرگتىڭ كوماندا جيناۋدا پايدالاناتىن 7 قاعيداسىن ۇسىنباقپىز.

bloomberg lp اگەنتتىگىندە 1200-دەن اسا قىزمەتكەر جۇمىس جاسايدى. كومپانيانىڭ حالىقارالىق ارەناداعى بەدەلىنىڭ جوعارىلىعى سونشا, بۇل اگەنتتىك تاراتقان اقپاراتتارعا كاسىپكەرلەر, ءتىپتى, كۇمان كەلتىرمەيدى. مايكل بلۋمبەرگ مۇنداي جەتىستىككە جەتۋىندە ەشقانداي قۇپيا جوقتىعىن, ونىڭ جالعىز قۇپياسى قىزمەتكەرلەردىڭ ەڭبەگىندە ەكەنىن العا تارتادى. ارينە, قىزمەتكەرلەر كەز-كەلگەن كومپانيا ءۇشىن الدىڭعى قاتارلى اكتيۆتەرگە جاتاتىنى داۋسىز.

ال مايكل بلۋمبەرگ ءوز قىزمەتكەرلەرىنە قالاي موتيۆاسيا بەرەدى؟ ءارى قاراي بىرگە وقيىق.

1. جۇمىس جايى مەن قاراجات جونىندە قىزمەتكەرلەرمەن ساۋدالاسپاۋ قاجەت

بلۋمبەرگ ەشكىممەن جەكە شارتتارى جونىندە تالقىعا تۇسپەيدى. ونىڭ ويىنشا, جالعىز ادامنىڭ شارتىمەن ءساتتى كاسىپ جاساۋ ەكىتالاي. ەڭ ماڭىزدىسى – قىزمەتكەردىڭ كومپانيا جۇمىسىن ورىنداۋ بارىسىندا جان-تانىمەن, ريزاشىلىقپەن ارەكەت ەتۋى. سوندا عانا كوماندالىق بىرلىك, كوماندالىق جۇمىس ءوز ناتيجەسىن كورسەتپەك.

2. جۇمىسقا جاڭا مامان الار ۋاقىتتا بارلىق ارىپتەستەرمەن كەڭەسۋ

بارلىق قىزمەتشىلەر وزدەرى شەشىم قابىلداپ, قاتارلارىنا قوسقان جاڭا قىزمەتكەردى كوماندالىق جۇمىسقا تارتۋدى كوزدەيدى. ال ەگەر دە بۇرىننان جۇمىس جاساپ كەلە جاتقان قىزمەتكەرلەردىڭ بىرىنە جاڭا كانديدات ۇناماي قالسا, ونى قاتارعا قوسپاعان ءجون. ويتكەنى, ول ادام كوماندالىق جۇمىسقا كەرى اسەر ەتۋى مۇمكىن.

3. ەشكىمگە كومپانيانىڭ ءرولىن تاپسىرماعان ءجون

ەشقانداي قاتارداعى قىزمەتكەر ۇجىمدى ونىڭ نەگىزىن قالاۋشىدان ارتىق باسقارا المايدى. سوندىقتان, بلۋمبەرگ كومپانيانىڭ ىشكى ساياساتىمەن جانە قوعاممەن بايلانىس جۇمىستارىمەن ءوزى جەكە اينالىسادى. سونداي-اق, ول كومپانيانىڭ توپ-مەنەدجەرلەرىنەن باق الدىنداعى, قىزمەتكەرلەر مەن تۇتىنۋشىلار الدىنداعى اشىقتىقتى تالاپ ەتەدى.

4. كومپانيا قىزمەتكەرلەرىنە 24 ساعات بويى ۇلگى كورسەتىپ ءجۇرۋى قاجەت

ۇجىم باسشىسى جۇمىس بارىسىندا دا, جۇمىستان تىس ۋاقىتتا دا قىزمەتكەرلەردىڭ كوز الدىندا ءجۇرۋى كەرەك. سول كەزدە عانا ساپالى ەڭبەك, ءونىمدى جۇمىس اتقارىلماق. ال ەگەر باسشى ادامدا مۇنداي قاسيەت بولماسا, وعان باسقارۋ قابىلەتىن ءالى دە شىڭداي ءتۇسۋ قاجەتتىگى تۋىندايدى.

5. ءاربىر قىزمەتكەردەن ءوزىن ءاردايىم جەتىلدىرىپ وتىرۋدى تالاپ ەتۋ

مايكل بلۋمبەرگتىڭ بارلىق كومپانيالارىنا ورتاق ستراتەگيا – ۇسىنىلعان قىزمەتتەردى ۇزدىكسىز جاڭارتىپ وتىرۋ. بۇل باعىتتى جۇزەگە اسىرۋ ءۇشىن تەك قانا ءاربىر قىزمەتكەر ءوز قابىلەتىن, ءوز ءبىلىمىن ۇشتاپ وتىرعانى ابزال.

6. درەسس-كودتى تولىقتاي جويعان دۇرىس

بلۋمبەرگتىڭ كومپانياسىندا دجينسىمەن, ۇزىن شاپان, جەكە ءسان ۇلگىسىمەن جۇرەتىن جاستار دا جۇمىس جاساي الادى. ال ولاردىڭ جەكە قىزىعۋشىلىعىنا جۇمىس تالاپتارىنا بايلانىستى قول سۇعۋ – قاتە ارەكەت. بلۋمبەرگتىڭ ويىنشا, ماماننىڭ كومپانيادا باعالاناتىن دۇنيەسى – ونىڭ سىرت كەيپى ەمەس, جۇمىس قابىلەتى.

7. قاتارداعى قىزمەتكەرلەرمەن ءجيى بايلانىس جاساۋ

كومپانيا باسشىسى ءۇشىن جۇمىسشىلارمەن, تومەنگى دەڭگەيدەگى قىزمەتكەرلەرمەن سويلەسىپ, ولاردىڭ وي-پىكىرىن تىڭداپ تۇرۋ ماڭىزدى. ويتكەنى, ۇلكەن جوبالاردىڭ بارلىعى كىشكەنە عانا قادامداردان باستالاتىنىن ۇمىتپاعان ءجون. بلۋمبەرگ قاتەلىك جاساعان ادامنىڭ وزىندىك شەشىم شىعارۋىنا كەدەرگى جاسامايدى جانە بۇل ارەكەتىنەن ءوزى قورىقپايدى.

مىنە, ءساتتى كاسىپ جاساۋدىڭ نەگىزگى كوزدەرى, نەگىزگى قاعيدالارى – وسىلار. جاقسى كوماندا – جارتى بيزنەس. قىزمەتكەرلەردىڭ ارەكەت ەتۋ ساپاسى ارقىلى كومپانيا وسەدى نەمەسە قۇلدىرايدى.

ال وسەتىن كومپانيانىڭ ىرگەتاسىن قالاۋ ءۇشىن جاقسى كوماندا جيناۋ قاجەتتىلىگى تۋىنداپ تۇرعانى راس.