از اقشامەن شەتەلگە قالاي ساياحاتتاۋعا بولادى؟

قالانىڭ قىم-قۋىت تىرلىگى جۇدەتىپ, توبەڭنەن ءتونىپ تۇراتىن ءزاۋلىم عيماراتتارى القىمىڭنان العاندا, جۇمىستان شارشاپ قاجىعاندا, «اتتەڭ دەمالىسقا شىعىپ, ساياحاتتاسام عوي!», دەپ ارماندايمىز. شەتەل اسىپ, ەۋروپالىق ەلدەردى شارلاماساق تا قالانىڭ سىرتىنا شىعىپ, تازا اۋامەن تىنىستاعىمىز كەلەدى. ال ەگەر ءسىز ەڭبەك دەمالىسىڭىزدىڭ باسقاشا بولعانىن قالاپ, شەتەلگە دەمالۋعا قاراجات جيناپ جۇرگەن بولساڭىز شە؟ وندا qamshy.kz اقپارات اگەنتتىگىنىڭ rambler.ru سايتىنان كەلتىرگەن اقىل-كەڭەستەرى كادەڭىزگە جارارى انىق.

ەرتەرەك قامدانىڭىز

اۋەبيلەتتەرىن (نەمەسە تۋريستىك اگەنتتىكتەردىڭ قىزمەتىن) ءتيىمدى باعادا ساتىپ العىڭىز كەلسە, كومپانيالاردىڭ ارنايى ۇسىنىستارى مەن جەڭىلدىك ناۋقاندارىن ەرتەرەك زەرتتەۋدى باستاڭىز. مول تاجىريبەسى بار ساياحاتشىلار, بيلەتتەردى مەرزىمىنەن بۇرىن الىپ قويساڭىز, اقشاڭىزدىڭ 40%-ىن ۇنەمدەيسىز دەپ سەندىرەدى. جانە سىزدە تاڭداۋ مۇمكىندىگى دە كوپ بولادى.

تۇراتىن ورىن مەن جۇگىڭىزدى سايلاڭىز

ساراپشىلاردىڭ پىكىرىنشە, تۋريستەردىڭ سانى از بولعان سايىن, قوناق ۇيلەردىڭ باعالارى دا ارزان بولادى دەيدى. سول سەبەپتى ارتىق اقشا تولەمەس ءۇشىن ءوزىڭىزدىڭ ساياحاتقا شىعاتىن ۋاقىتىڭىزدى جوسپارلاي ءبىلىڭىز. قوناق ءۇي جالداۋعا اقشاڭىز جەتپەسە, باعاسى ارزانىراق حوستەلدەر وتە كوپ. اسىرەسە ەۋروپالىق ەلدەردە قوناق ءۇيدىڭ بالامالارى جەتىپ ارتىلادى. ال جولعا الاتىن جۇگىڭىزگە كەلەر بولساق, ول بارىنشا ىقشامدى جانە ونىڭ ىشىندە وزىڭىزگە ناقتى كەرەك زاتتار عانا بولۋ كەرەك. تەك جول سومكەسىمەن ساياحاتتايمىن دەسەڭىز, ول وتە ءتيىمدى بولماق. ويتكەنى, جۇگىڭىزدى كۇتۋگە ارتىق ۋاقىت جۇمسامايسىز, ارتىق اقشا تولەمەيسىز.

اۋەجايدان قالاي قاتىناۋعا بولادى؟

اربىر ساياحاتتىڭ الدىندا اۋەجايدان قاتىنايتىن كولىك ءتۇرىن انىقتاپ الىڭىز. كەي جاعدايلاردا مەترومەن نەمەسە اۆتوبۋستارمەن دە دىتتەگەن جەرىڭىزگە ىڭعايلى جەتىپ الۋىڭىزعا بولادى. ال تاكسيگە وتىرساڭىز, كوپ اقشا جۇمسالادى جانە ۋاقىتىڭىزدىڭ كوبى كەپتەلىستە ءوتۋى مۇمكىن. ەگەر دە كولىك جالدايتىن بولساڭىز, بروكەرلەر ارقىلى جالداڭىز. بۇل ارنايى اگەنتتەردەن جالداعاننان ارزان.

تۋريستىك ساقتاندىرۋ

بۇعان ءمان بەرگىڭىز كەلمەسە دە, ساياحاتشىلار  بۇل بولىمگە ۇنەمدەمەڭىز دەپ كەڭەس بەرەدى. جانە ءارقاشان دا تۋريستىك ساقتاندىرۋدى العاشقى ورىنعا قويىڭىز. قۇداي بەتىن ءارى قىلسىن, ەگەر سىزگە باسقا ەلدە ءبىر جاعداي بولا قالسا, كوپ شىعىنعا ۇشىراۋىڭىز مۇمكىن. ال تۋريستىك ساقتاندىرۋ قىزمەتى ودان اناعۇرلىم ارزانعا تۇسەدى.

مۇراجايلاردى قالاي تەگىن ارالاۋعا بولادى؟

بىرىنشىدەن, ەۋروپانىڭ كوپتەگەن ەلدەرىندە مۇراجايلاردى تەگىن ارالاۋعا ارنالعان كۇندەر بولادى. سول سەبەپتى ءوزىڭىز باراتىن مەملەكەتتىڭ مۇراجايلارى جايلى اقپارات الىپ, قاي كۇندەرى تەگىن بولاتىنىن سايتتاردان ءبىلىپ الىڭىز. ودان بولەك, ەۋروپانىڭ ءىرى قالالارىنا free walking tour دەپ اتالاتىن كۇندەلىكتى تەگىن ەكسكۋرسيالار جۇرگىزىلەدى. ونىڭ دا ارنايى ۋاقىتى مەن ارالايتىن نۇكتەلەرى بولادى. ولاردىڭ تەگىن بولعانىنا قاراماستان, قالانى ارالاتقان ادامعا العىس ورنىنا اقشا قالدىرىپ كەتۋ ادەتكە اينالعان. قالانى ارالاۋ كەزىندە تەگىن اۋديوگيدتەردى, جول نۇسقاۋشى باعدارلامالاردى پايدالانۋعا بولادى.

اۆتوكولىكپەن ساياحاتتاساڭىز...

ەگەر ءسىز كولىكپەن ساياحاتتايمىن دەپ شەشسەڭىز, ارنايى قىزمەتتەر ارقىلى جولاۋشىلاردى ىزدەسەڭىز بولادى. ەۋروپانىڭ بارلىق اۆتوتۇراقتارى اقىلى ەكەنىن دە ۇمىتپاڭىز. ءبىراق سۋپەرماركەتتەردىڭ ماڭايىنا قويساڭىز, اقشاڭىز قالتاڭىزدا قالادى. كۇن جىلى كەزدە كولىكپەن ساياحاتقا شىقساڭىز, اقشاڭىزدى كەمپينگكە ۇنەمدەپ قالۋعا بولادى.

ۇلتتىق تاعامداردى قايدان تابۋعا بولادى؟

ەگەر ءسىز بارعان مەملەكەتتىڭ اسحاناسىمەن تانىسىپ, ۇلتتىق تاعامدارىنان ءدام تاتقىڭىز كەلسە, قىمبات مەيرامحانالاردى ىزدەمەسەڭىز دە بولادى. وندا جەرگىلىكتى تۇرعىندار ۇسىناتىن ارنايى قىزمەتتى پايدالانىپ, ءدامدى ءارى ارزان باعادا ۇلتتىق تاعامداردى تابا الاسىز.

ارزان كادەسىيلار قاي جەردە ساتىلادى؟

شەتەلگە شىققاننان كەيىن مىندەتتى تۇردە سول مەملەكەتتەن كادەسىي الماي كەتۋگە تاعى بولمايدى. ءبىراق مىنانى ەستە ساقتاڭىز! اۋەجايدا جانە تۋريستەرگە ارنالعان ارنايى دۇكەندەردە ولاردىڭ باعاسى وتە قىمبات بولادى. سول ءۇشىن تۋريستەر كوپ جۇرمەيتىن ورىندارعا بارىپ تاڭداڭىز. ال ەگەر كولەمدى ساۋدا جاسايتىن بولساڭىز, سول ەلدىڭ قايتارۋ سالىعىنىڭ مۇمكىندىگىن الدىن الا ءبىلىپ الىڭىز.

اقشانى قالاي ايىرباستايمىز؟

ەۋروپاعا نەمەسە اقش-قا ساياحاتتاساڭىز, ۆاليۋتانى ەۋروعا نەمەسە دوللارعا ەرتەرەك ايىرباستاڭىز. ارگەنتينا, ۆەنەسۋەلا, وزبەكستان جانە تاعى باسقا دا مەملەكەتتەردە اقشاڭىزدى ءتيىمدى اۋدارۋعا مۇمكىندىك بەرەتىن «قارا كۋرس» اتتى جۇيە بار. سونىمەن قاتار, ساياحاتتاۋ بارىسىندا كارتامەن ەمەس, تەك اقشالاي تولەگەن دۇرىس.

اۋدارعان: مارجان سابەت