26 ءساۋىر, 2019
قاسىم-جومارت توقاەۆ: ابايدى عانا ەمەس, قۇنانبايدى دا قۇرمەتتەۋىمىز قاجەت
جيدەبايداعى كەشەندى جاڭعىرتىپ, ينفراقۇرىلىمدى قالپىنا كەلتىرۋ قاجەت.
"ۇلى ابايدى ۇلىقتاعاندا, ونىڭ اكەسى – قۇنانبايدىڭ ەل تاريحىنداعى ەڭبەگىن ۇمىتپاۋىمىز قاجەت." بۇل تۋرالى مەملەكەت باسشىسى قاسىم-جومارت توقاەۆ سەمەي قالاسىنىڭ زيالى قاۋىم وكىلدەرىمەن كەزدەسۋىندە ايتتى.
"ول – سەمەيدە عانا ەمەس, تۇتاس قازاق تاريحىندا ءوز ورنى بار تۇلعا.
ونى حالقىمىز جاقسى بىلەدى, ءقادىر تۇتادى. سوندىقتان, الداعى ۋاقىتتا وبلىس اكىمدىگى قۇنانبايدىڭ ەسىمىن ۇلىقتاۋعا بايلانىستى ءتيىستى شارالار قابىلداۋ مۇمكىندىگىن قاراستىرۋى قاجەت.
جاس ۇرپاققا جاقسى ۇلگى-ونەگە بولاتىن ءىستى مەن ءارقاشان قولدايمىن.
ەلباسىنىڭ «رۋحاني جاڭعىرۋ» باعدارلاماسىن جۇزەگە اسىرۋ ءۇشىن ءبىز, شىن مانىندە, وسىنداي ساباقتاستىق داستۇرىنە جول اشاتىن بىرەگەي باستامالاردى قولعا الۋىمىز كەرەك." دەدى قازاقستان پرەزيدەنتى قاسىم-جومارت توقاەۆ.
ال الداعى جىلى اباي قۇنانباەۆتىڭ تۋعانىنا 175 جىل تولادى. توقاەۆ وسىعان وراي "ۇلى ابايدىڭ مۇراسى «رۋحاني جاڭعىرۋدىڭ» ماڭىزدى باعدارىنا اينالۋى قاجەت ەكەندىگىن ايتتى.
–وسى ايتۋلى داتانى ءبىز تۇتاس ەل بولىپ, مەملەكەتتىك دەڭگەيدە اتاپ وتەمىز.
ءبىز ءۇشىن بۇل مەرەيتويدىڭ ماڭىزى ەرەكشە. تاريحي داتانى اقىل-پاراساتپەن, ساليقالى دەڭگەيدە وتكىزۋگە باسا ءمان بەرۋ كەرەك.
نەگىزگى ماقسات – دانا ابايدىڭ تاعىلىمىن جاستاردىڭ ساناسىنا ءسىڭىرۋ, ۇلى تۇلعانىڭ وي-تولعامدارىن كەڭىنەن دارىپتەۋ.
ۇكىمەتكە ابايدىڭ مەرەيتويىنا قاجەتتى شارالار ازىرلەۋدى تاپسىرامىن.
اباي, شىن مانىندە, قازاق بولمىسىنىڭ ايناسى.
اقىننىڭ دارا تۇلعاسى – حالقىمىزدىڭ رۋحانياتىن الەمگە تانىتاتىن تەڭدەسى جوق قۇندىلىق.
دۇنيە ءجۇزى ادەبيەتىندە اباي سياقتى اقىن, اعارتۋشى, ويشىل, سىنشى كەمدە-كەم.
اباي, شىن مانىندە, قازاقتىڭ ءبىرتۋار پەرزەنتى. جيدەبايداعى كەشەندى جاڭعىرتىپ, ينفراقۇرىلىمدى قالپىنا كەلتىرۋ قاجەت.
حاكىم ابايدىڭ تۋعان جەرى دۇنيە ءجۇزىنىڭ تۇكپىر-تۇكپىرىنەن كەلەتىن تۋريستەردى قارسى الۋعا لايىقتى ءىرى ورتالىققا اينالۋى ءتيىس.
جەرگىلىكتى باسشىلار وسى ماڭىزدى ماسەلەگە نازار اۋدارۋى قاجەت.
بۇل – بابالار الدىنداعى بورىشىمىز ءارى وسكەلەڭ ۇرپاق ءۇشىن جاقسى ونەگە.
«رۋحاني جاڭعىرۋ», تۇپتەپ كەلگەندە, وسى مىندەتتى جۇرەكپەن سەزىنىپ, ەشقانداي نۇسقاۋسىز ورىنداۋ ەكەنىن ءبىز تەرەڭ ءتۇسىنۋىمىز كەرەك".
بۇل تۋرالى مەملەكەت باسشىسى قاسىم-جومارت توقاەۆ سەمەي قالاسىنىڭ زيالى قاۋىم وكىلدەرىمەن كەزدەسۋىندە ايتتى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر