«قازاقتىڭ قازاناتى قايدا؟» دەپ پرەزيدەنتتىككە كانديدات رەتىندە تىركەلگەن ازامات كىم؟

پرەزيدەنتتىككە كانديداتتاردى تىركەۋ باستالدى. ال «پرەزيدەنتتىككە كانديدات رەتىندە العاشقى بولىپ تىركەلگەن سادىبەك تۇگەل كىم؟» دەگەندە وعان بەرەر جاۋاپ بار: ول - «قازاقتىڭ قازاناتى قايدا؟» دەپ جۇرگەن ۇلتجاندى قايراتكەر. سونىمەن...

–«ۇلى دەگەن سوزدەن قاشپاۋ كەرەك. قازاق– ۇلى حالىق. قازاق ۇلى بولماسا, وسىناۋ ۇلى جەردى ۇستاپ تۇرا الماعان بولار ەدى. مەنىڭ زەرتتەۋىمدە قازاقتىڭ تاريحىنداعى بارلىق سوعىستىڭ 90 پايىزى وسى ۇلى دالا جەرى ءۇشىن بولعان. ءبىزدىڭ مىندەتىمىز–ۇلى دالانى قاستەرلەۋ, قۇرمەتتەۋ, تاريحىن زەرتتەۋ, قازىرگى قازاق جاستارىن ەرلىككە, باتىرلىققا, باتىلدىققا, وتانشىلدىققا, جەردى سۇيۋگە تاربيەلەۋ. ء«بىز كىممىز؟» دەگەندە,  التايدان اتىراۋعا, ۇلىتاۋدان الاتاۋعا دەيىنگى ۇلانعايىر جەردى مەكەندەۋشى –ۇلى قازاق حالقىنىڭ ۇرپاعىمىز دەۋىمىز قاجەت,–دەيدى ول.  

–بىزدە ۇلتتىق يدەولوگيا, جاستاردىڭ تالىم-تاربيەسى كەمشىن سوعىپ كەلەدى. ونى بايۋ, بايۋ, بايۋ دەگەن ۇعىمدار باسىپ قالعان. بۇل دەگەنىمىز, الدىمەن ەكونوميكا, سوسىن يدەولوگيا دەگەن ۇعىمنىڭ سالدارى دەپ ەسەپتەيمىن. مەنىڭ پىكىرىمشە, ەكونوميكا مەن يدەولوگيا  قىران قۇستىڭ قاناتىنداي تەڭ بولۋى كەرەك. بىرگە ءجۇرۋى كەرەك. سوندا عانا ۇلت رۋحانياتى جوعارى دەڭگەيدە بولادى,–دەيدى ول.

ول –ۇلى دالاعا ارنالعان «ۇلى دالا باتىرلارى», «ۇلى دالا تۇلپارلارى»,  «زامانا جەلمەن جارىسقان قازانات» اتتى ۇلتتىق رۋحقا تولى يگى شارالاردى تۇراقتى وتكىزىپ جۇرگەن ازمات.

ول – «ۇلا دالا تۇلپارى – قۇلاگەرگە» ەسكەرتكىش تۇرعىزعان جانى قازاقى جىگىت

قازىر ول دوستارىمەن بىرلەسىپ, دۇنيە جۇزىندە تەڭدەسى جوق «ۇلى دالا داڭقى» مۇراجايىن سالۋدا.

ول – استاناعا ارنالعان «استانا قاھارماندارى» – «پەرۆوپروحودسى استانى» اتتى جوبانىڭ اۆتورى.

ول – گۋمانيتارلىق عىلىمدار اكادەمياسىنىڭ اكادەميگى. شىعىس قازاقستان وبلىسى ۇلان اۋدانىنىڭ قۇرمەتتى ازاماتى.

سادىبەك تۇگەل – ۇلتتىق سپورت سالاسىندا دا ايتارلىقتاي تابىستارعا قول جەتكىزگەن ازامات. وتكەن عاسىردىڭ 90 جىلدارى  قر ۇلتتىق  ات سپورتى تۇرلەرىنىڭ نەگىزىن قالادى,  العاشقى ەرەجەسىن جازدى, جۇمىسىن جەتىلدىردى. سادىبەك تۇگەل  بۇكىل قازاقستان اتبەگىلەرىنىڭ 1995 جىلى الماتى قالاسىندا وتكەن  تۇڭعىش قۇرىلتايىنىڭ باستاماشاسى.

ول - ۇلى دالا قىراندارى»»رەسپۋبليكالىق حالىقتىق قوزعالىستىڭ تەڭتوراعاسى.

ول– قازاقستان رەسپۋبليكاسى ۇلتتىق ات سپورتى تۇرلەرى فەدەراسياسىنىڭ پرەزيدەنتى.

ول –جازۋشى, قازاقستاننىڭ ەڭبەك سىڭىرگەن قايراتكەرى, جۋرناليست.

پرەزيدەنتتىككە كانديدات تۋرالى از-كەم دەرەك

تۇگەل سادىبەك – جازۋشى. 1955 جىلدىڭ 25 اقپانىندا شىعىس-قازاقستان وبلىسىنىڭ ۇلان اۋدانىنىڭ امانكەلدى اۋىلىندا دۇنيەگە كەلدى. ۇلتتىق قۇندىلىقتاردىڭ ۇلىقتاۋشىسى, زەرتتەۋشىسى, نۇر-سۇلتان قالاسىنىڭ تۇڭعىش ءباسپاسوز حاتشىسى, ۇلتتىق ات سپورتى فەدەراسياسىنىڭ پرەزيدەنتى, «ۇلى دالا قىراندارى» رەسپۋبليكالىق قوعامدىق الەۋمەتتىك-مادەني قوزعالىسىنىڭ تەڭ ءتوراعاسى, قر ەڭبەك سىڭىرگەن قايراتكەرى, جازۋشى.

سادىبەك تۇگەل  1955 جىلى 23 اقپاندا شىعىس قازاقستان وبلىسى ۇلان اۋدانىنىڭ امانكەلدى اۋىلىندا تۋعان.

1980 جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن, 1990 جىلى الماتىداعى پوليتولوگيا-باسقارۋ ينستيتۋتىن (بۇرىنعى جوعارعى پارتيا مەكتەبى) تامامداعان. اسكەري مىندەتىن اتقارىپ كەلگەن سوڭ, الماتى ماقتا ءيىرۋ فابريكاسىندا سلەسار بولىپ جۇمىس ىستەگەن. 

1977–1978 جج. ۇلان اۋداندىق «راسۆەت» – «وركەن» گازەتىندە اۋدارماشى, 1978–1979 جج. ۇلان اۋداندىق اتقارۋ كوميتەتىنىڭ ۇيىمداستىرۋ بولىمىندە نۇسقاۋشى, 1979–1984 جج. ۇلان اۋداندىق پارتيا كوميتەتىنىڭ ۇيىمداستىرۋ ءبولىمىنىڭ مەڭگەرۋشىسى, 1990–1991 جج. اۋداندىق حالىقتىق باقىلاۋ كوميتەتىنىڭ ءتوراعاسى, 1991–1992 جج. حالىق دەپۋتاتتارى اۋداندىق كەڭەسىنىڭ تەكسەرۋ كوميسسياسىنىڭ ءتوراعاسى, 1992–1994 جج. اۋداندىق «ۇلان تاڭى» – «ۋلانسكيە زوري» گازەتىنىڭ رەداكتورى قىزمەتتەرىن اتقارعان. مەملەكەتتىك ەمتيحان كوميسسياسىنىڭ 1990 جىلعى شەشىمىمەن پوليتولوگ, جوعارعى جانە ورتا دارەجەلى وقۋ ورىندارىندا الەۋمەتتىك-ساياسي ماسەلەلەرىنىڭ وقىتۋشىسى ماماندىعىن العان. 

1994–1998 جج. «قازاق تەلەۆيدەنيەسى مەن راديوسى» كورپوراسياسىندا جاۋاپتى قىزمەتتەر اتقارىپ, 1998–2003 جج. ەلوردامىز – استانا قالاسىنىڭ ءباسپاسوز حاتشىسى, ءباسپاسوز ورتالىعىنىڭ جەتەكشىسى, استانا حالىقارالىق ءباسپاسوز ورتالىعىنىڭ باس ديرەكتورى مىندەتىن اتقارعان. 2003–2005 جج. قازاقستان رەسپۋبليكاسى پارلامەنتى سەناتىنىڭ بۇقارالىق اقپاراتپەن بايلانىس ءبولىمىنىڭ مەڭگەرۋشىسى بولىپ قىزمەت ەتكەن. ءقازىر قازاقستان رەسپۋبليكاسى ۇلتتىق ات سپورتى تۇرلەرى فەدەراسياسىنىڭ پرەزيدەنتى بولىپ قىزمەت اتقارادى.

اڭگىمەلەرى گازەت, جۋرنالداردا جاريالانىپ تۇرادى. «قايداسىڭ, قازاعىمنىڭ قازاناتى؟!» دەرەكتى پوۆەسىنىڭ, «اسىل جيرەننىڭ كيەسى» اڭگىمەلەر جيناعىنىڭ اۆتورى.