تاق تالاستىق پەن باقتالاستىق: زەلەنسكيي جەڭىپ, پوروشەنكو پرەمەر-مينيسترلىككە كەلۋى مۇمكىن

21 ءساۋىر كۇنى ۋكراينادا پرەزيدەنتتىك سايلاۋ وتەدى. ءقازىردىڭ وزىندە مۇندا الاپات اقپاراتتىق مايدان ءجۇرىپ جاتىر. كىم جەڭەدى؟ ۆلاديمير زەلەنسكيي مە, جوق الدە قازىرگى پرەزيدەنت پەتر پوروشەنكو ما؟ سوڭعى زەرتتەۋ قورىتىندىسىنا نازار اۋدارار بولساق, الامان بايگەدە زەلەنسكييدى اتى وزاتىنىن ساۋالناما قورىتىندىسى اڭعارتىپ-اق تۇرعانداي.

 «رەيتينگ» الەۋمەتتىك توبىنىڭ ساۋالناماسىنا زەر سالار بولساق, ۋكرايندىقتاردىڭ جارتىسىنان استامى شوۋمەن جىگىتكە داۋىس  بەرەتىن سياقتى. ساۋالناماعا قاتىسقانداردىڭ 19 پايىزى پوروشەنكوعا داۋىس بەرۋى مۇمكىن, ال 7 پايىزى پرەزيدەنتتىك سايلاۋعا بارۋدان باس تارتاتىنىن ءمالىم ەتكەن. سونىمەن, «الامان بايگەدە اتى وزادى» دەلىنىپ وتىرعان ۆلاديمير زەلەنسكييگە حالىقتىڭ 73 پايىزى داۋىس بەرمەك. ساراپشىلاردىڭ ايتۋىنا قاراعاندا, بۇل جولعى سايلاۋعا حالىقتىڭ 80 پايىزى قاتىسۋى ىقتيمال. سونداي-اق ولار ۋكراينانىڭ باتىسى مەن شىعىس بولىگى, وڭتۇستىك پەن ورتالىق اۋداندارى زەلەنسكييدى تولىق قولدايدى دەگەن پىكىردە. ال ۋكراينانىڭ باتىسىندا حالىق تاڭداۋى يتجىعىس ءتۇسۋى ىقتيمال. سايلاۋشىلاردىڭ جاس ەرەكشىلىگىنە قاتىستى ايتار بولساق, شوۋمەن جىگىتتى قولداۋشىلاردىڭ قاتارى ءباسىم.

بىرىنشى, ەكىنشى تۋردا ۆلاديمير زەلەنسكييدەن ەكى ەسە  ارتىق اقشا جۇمساماق بولىپ وتىرعان پەتر پوروشەنكو شىن مانىندە جەڭىلىسكە ۇشىراي ما؟ مۇمكىن.

ەندى بىرنەشە كۇننەن كەيىن ۋكراينادا پرەزيدەنتتىك سايلاۋ باستالادى.  وعان دەيىن نەشە ءتۇرلى بولجامدار جاريالانادى. كەيبىر ساراپشىلار «پرەزيدەنتتىك سايلاۋعا ەڭ سوڭعى نۇكتە 19 ءساۋىر كۇنى قويىلادى» دەپ بولجاپ وتىر. ويتكەنى وسى كۇنى پرەزيدەنتتىككە ۇمىتكەر ۆلاديمير زەلەنسكيي مەن پەتر پوروشەنكو «وليمپييسكيي» ستاديونىندا حالىقتىڭ  الدىنا شىعادى. مۇندا ءسوز سايىسىندا كىم جەڭەدى, 21 ءساۋىر كۇنگى سايلاۋدا سول ۇمىتكەردىڭ ء باسى جوعارى تۇرۋى مۇمكىن.

الايدا جەڭىستى زەلەنسكييگە بەرىپ قويعاندار بار. بۇل سەنىمدى دە شىعار. دۇرىس تا شىعار. ۆلاديمير زەلەنسكيي ءقازىردىڭ وزىندە كىمدى قاي لاۋازىمعا  تاعايىندايتىنىن ايتتى. دەمەك, كومانداسىن جاساقتادى دەگەن ءسوز. «بيلىككە مەنىمەن بىرگە كاسىبي مىقتى ماماندار مەن اقىلدىلار كەلەدى»,– دەدى ول.

ال ءبىرقاتار ساراپشىلار «پرەزيدەنت پوروشەنكو بۇل سايلاۋدا ۇتىلادى دا, كەلەسى پارلامەنتتىك سايلاۋعا دايىندالادى» دەگەندى دە ايتىپ وتىر. سوندىقتان ول بولاشاقتاعى پارلامەنتتىك سايلاۋدا باسىم داۋىسقا يە بولادى دا,  پرەمەر-مينيسترلىككە كەلەدى. ءبىراق بۇل قانشالىقتى اقيقاتقا جاقىن؟ ونى ۋاقىت كورسەتەدى. ال ءبىزدىڭ قازاقستاندىق ساراپشىلاردىڭ باسىم كوپشىلىگى «بيلىك باسىنا قازاقستان ءۇشىن پەتر پوروشەنكونىڭ كەلگەنى ءتيىمدى. ويتكەنى قازىرگى ۋاقىتتا ول ۆلاديمير ءپۋتيننىڭ بيلىگىن بارىنشا سىناپ وتىرعان جانە بىردەن-بىر قارسى تۇرعان تۇلعا» دەپ وتىر.

ەسكەرتە كەتەيىك, 31 ناۋرىز كۇنى وتكەن پرەزيدەنتتىك سايلاۋداعى ءبىرىنشى تۋردا زەلەنسكيي 30,24, ال پوروشەنكو 15,95 پايىز داۋىس العانى بەلگىلى.