"؛كەلىنشەگىڭ كوتەردى مە؟"؛ – بۇل ەركەك ايتاتىن ءسوز ەمەس

– ۇيلەندىم, 3 اي بولدى – دەپ ءبىرى قۋانىشىن جەتكىزدى. قۇتتى بولسىن ايتىستىق. ءسويتىپ تۇرعاندا ەندى ءبىرى:

– قالاي, كەلىنشەگىڭ كوتەردى مە؟ – دەپ سۇراقتى توتەسىنەن قويدى. ۇيلەنگەن جىگىت قىسىلىپ, قىزاراقتاپ, ءتۇرى بۇزىلا باستادى. مەن توبەمنەن بىرەۋ سۋ قۇيىپ جىبەرگەندەي بولدىم. شىداي الماي:

– سۇراعىڭ ىڭعايسىز ەكەن؟– دەدىم. سودان ول ءۇنسىز قالدى دا, اڭگىمەنىڭ اۋانى باسقا جاققا بۇرىلدى. الگى جىگىتكە كەيىن ءتۇسىندىردىم. نەسىن جازعىرايىن, مۇمكىن كىشكەنتايلى بولعانىن قالاعاسىن سۇراعان شىعار. ءبىراق, بۇل ەركەكتىڭ ايتۋى ءتيىس ءسوزى ەمەس ەدى. ءجيى بايقاپ قالام, سوڭعى كەزدە جىگىتتەر اراسىندا «كەلىنشەگىڭ كوتەردى مە؟» دەپ سۇراپ قاپ جاتادى. قايتالاپ ايتايىن, بۇل ەركەكتىڭ ايتاتىن ءسوزى ەمەس. وسىندايدا بۇرىنعى قازاقتىڭ كەسەك مىنەز, بەكزات بولمىسى ەسكە تۇسەدى. ەرىكسىز قايران ءقالام!

اربىر اتا-انا قىزىن ۇزاتقاننان كەيىن ونىڭ پەرزەنتتى بولعانىن قالايدى, سول ءۇشىن ۇلى اللادان دۇعا تىلەيدى. اياعى اۋىر بولعانىن بىلگىسى دە كەلەدى. ءبىراق, اكەسى, اعاسى تۇرماق, شەشەسىنىڭ ءوزى ونى قىزىنان سۇرامايتىن بولعان بۇرىن. ويتكەنى, ونى سۇراۋ ۇيات دەگەن ۇعىم قالىپتاسقان. يا, اق نەكەلى ادال جارى. اللانىڭ دا, ادامنىڭ دا الدىندا ارى تازا. دەسە دە, بۇل تىلمەن ايتىپ تۇسىندىرە المايتىن قازاققا ءتان ۇيات, يبا, ينابات. ونى قىزدىڭ ءوزى دە توركىنىنە اشىقتان-اشىق جاريالاۋدان قىسىلادى. ءبىراق, اياعى اۋىر بولعانىن قىزدار شەشەسىنە بىلدىرگەن. سوندا قالاي؟ ول ءبىلاي.

وز ەلىنەن جىراققا كەلىن بولىپ تۇسكەن قىز العاشىندا اكە-شەشەسىنىڭ ايالى الاقانىن, ىستىق قۇشاعىن ساعىنادى. ىزدەيدى. مۇمكىن وڭاشادا جىلاپ تا الاتىن شىعار. مۇنى قازاق جاقسى بىلەدى. مىنە, وسى كەزدە قىزدىڭ اكە-شەشەسى قۇداسىن اۋلەتىمەن بىرگە «ىرگە كورسەتۋ»دەگەن سالتتى نەگىزگە الىپ, قوناققا شاقىرادى. ءسويتىپ, قۇدالار ارقا-جارقا بولىپ قاۋىشادى. قىز توركىنىنە كەلگەسىن ابدەن ساعىنىشىن باسادى. وسى كەزدىڭ وزىندە قانشا بىلگىسى كەلگەنمەن اناسى قىزىنان «اياعىڭ اۋىر ما؟» دەپ سۇراۋعا قىسىلادى, قىزى دا ايتپايدى. تەك ءسوزدىڭ رەتى كەلگەندە اناسىنا: ء«بىر جىلعا دەيىن كەلە المايىن دەپ تۇرمىن» دەيدى. ەندى ويلانىپ كورىڭىزشى! نەگە ءبىر جىلعا دەيىن كەلە المايدى؟ ويتكەنى, قازاقتىڭ كەلىنى جۇكتى بولىپ, ءىشى بىلىنە باستاعان كەزدە اعاسىنىڭ, اكەسىنىڭ كوزىنە تۇسپەۋگە تىرىسادى. سوندىقتان, ول بوسانىپ, بالاسى قاتايعانشا ەشقايدا بارا المايدى. ەندى قاراڭىزشى, قۇرساق كوتەرگەنىن قالاي جەتكىزەدى, ءا؟! ءبارىن ىشتەي تۇسىنە قويعان اناسى اقىلىن ايتىپ, كەڭەسىن بەرەدى.انا جۇرەگى نازىك قوي, ەندى قىزىنىڭ امان-ەسەن بوسانۋىن اللادان تىلەيدى. كەزىندە اناسىنىڭ قىزىنا قويۋعا باتپاعان سۇراعىن بۇگىندە جىگىتتەردىڭ اۋزىنان ەستىگەندە قىنجىلاسىڭ؟! قازاقى تانىمنىڭ جوعالىپ, بولمىستىڭ وزگەرگەنى جۇرەگىڭدى اۋىرتادى.

ايدوس مارات