اۆراام لينكولن: تاۋىپ العان 5 دوللاردان ماڭداي تەرمەن كەلگەن 1 دوللار قۇندى

اۆراام لينكولن - الەمنىڭ ەڭ تانىمال تۇلعالارىنىڭ ءبىرى. اقش-تاعى قۇلدىقتى جويۋداعى ەرەن ەڭبەگىنىڭ ارقاسىندا ۇلت باتىرىنا اينالعان تۇلعا. ول ءالى كۇنگە دەيىن امەريكالىقتاردىڭ ەڭ سۇيىكتى پرەزيدەنتى, ءبىراق بيلىك باسىندا قاتال سىنعا ۇشىراعان ساياساتكەر. اۆراام لينكولن قاساقانا ولتىرىلگەن العاشقى اقش پرەزيدەنتى بولدى.

اۆراام لينكولننىڭ ءتورت ۇلى بولعان. ولاردىڭ ۇشەۋى كامەلەتتىك جاسقا جەتپەي 4, 11 جانە 18 جاسىندا تۋبەركۋلەزدەن قايتىس بولعان. تەك ءبىر ۇلى روبەرت 82 جىل ءومىر ءسۇرىپ, زاڭ مەن ساياساتتا كەرەمەت مانساپ جاسادى.

اۆراام لينكولن 1855 جىلى تانىمال «ۇلىنىڭ ۇستازىنا حات» جازدى. بۇل حاتتى پرەزيدەنت بەس جاستاعى ۇلى ۋيليامنىڭ ۇستازىنا جازعان. وكىنىشكە قاراي ۋيليام ءوز ءبىلىمىن ومىردە قولدانا المادى. 11 جاسىندا قايتىس بولىپ, اكەسىمەن بىرگە جەرلەندى. اق ۇيگە ەكسكۋرسياعا بارعاندار عيماراتتا ءالى كۇنگە پرەزيدەنت اۆراام لينكولن مەن ۇلى ۋيليامنىڭ ەلەسى ارالاپ جۇرەتىنىن ايتادى.

اۆراام لينكولننىڭ ۇلىنىڭ مۇعالىمىنە جازعان حاتىنان ءۇزىندى:

«...بارلىق ادامنىڭ تۋراشىل جانە ءادىل ەمەس ەكەندىگىن بىلەمىن. ءار قارا نيەتتى ادامعا قارسى ءبىر قاھارمان, جەكە باسىن ويلاعان ساياساتكەرگە قارسى ءوزىن قۇربان ەتەتىن كوشباسشى دا بار ەكەنىن ۇيرەت. ءار دۇشپانعا قارسى ءبىر دوستىڭ تابىلاتىنىن ءتۇسىندىر! بۇعان ءبىراز ۋاقىت كەرەك ەكەنىن بىلەمىن, ءبىراق وعان تاۋىپ العان 5 دوللاردان ماڭداي تەرىڭمەن كەلگەن 1 دوللار قۇندى  ەكەندىگىن ۇيرەتسەڭىز ەكەن! جەڭىلە ءبىلۋدى دە, جەڭىسكە جەتكەندە قۋانۋدى دا ۇيرەت. كورە الماۋشىلىقتان, قىزعانىشتان ونى الىستات!...

وعان كىتاپتاردىڭ ماڭىزدىلىعىن ۇيرەت! ءبىراق وعان تىنىش ۋاقىت تا قالدىر, كوكتەگى قۇستاردىڭ, ارالاردىڭ جانە جاپ-جاسىل باۋرايداعى گۇلدەردىڭ ماڭگىلىك سىرىن دا ويلانسىن. ساباقتا قاتە جاساۋدىڭ قۋلىق جاساۋدان الدەقايتا ابىرويلى ەكەنىن دە ۇيرەت. وزگەلەر قاتە دەسە دە ءوز پىكىرىنە سەنە ءبىلۋدى ۇيرەت!

وعان بارلىق ادامدى تىڭداي ءبىلۋىدى ۇيرەت, ءبىراق بارلىق تىڭداعاندارىن شىندىقتىڭ سۇزبەسىنەن وتكىزىپ, تەك جاقسىلارىن الۋدى ۇيرەت! مۇڭلى كەزدە دە كۇلىمدەي الۋدى ۇيرەت!

ۇلىعان ادامدار توبىندا قۇلاعىن بىتەي الۋدى ۇيرەت. ەگەر ءوز ءىسىنىڭ دۇرىس ەكەنىنە سەنسە, شىندىق ءۇشىن تىك تۇرىپ كۇرەسۋدى ۇيرەت!

...ونىمەن نازىك مامىلە جاسا, ءبىراق ونى قۇشاقتاما, ويتكەنى بولاتتى وت قانا تازالاي الادى. سابىرسىز بولاتىنداي دارەجەدە باتىلدىققا يە بولسىن! باتىل بولاتىنداي دارەجەدە سابىرلى بولسىن. وعان وزىنە سەنۋدى ۇيرەت, وسىلايشا ادامدارعا دەگەن سەنىمى دە تەرەڭ بولادى. بۇل ايتقاندارىم ۇلكەن ءوتىنىش, قولىڭنان كەلگەنشە ورىنداۋعا تىرىس!...»