اس بولمەسىنە قاتىستى 30 كەڭەس

1.جۇمىرتقانىڭ ساپاسىن قالاي انىقتاۋعا بولادى؟ ول ءۇشىن ءبىر ىدىسقا سۋ قۇيىپ جۇمىرتقانى سالىڭىز. بۇزىلماعان جۇمىرتقا سۋعا باتىپ كەتەدى, ەگەر بۇزىلىپ كەتكەن بولسا سۋ بەتىنە قالقىپ شىعادى.

2.جەمىس-جيدەكتى بۇزباي ساقتاۋ امالى. توڭازىتقىشتاعى جاشىكتىڭ استىنا قاعاز ورامال توسەڭىز. ول ارتىق ىلعالدى وزىنە تارتىپ الادى. ءسويتىپ, كوكونىستەر مەن جەمىستىڭ ۇزاق ساقتالۋىنا, ءارى كوگەرىپ كەتپەۋىنە كومەكتەسەدى.

3.اشىلعان شاراپتىڭ ساقتالۋ مەرزىمىن ۇزارتۋ جولى. جارتىلاي ىشىلگەن شاراپ نەمەسە شامپاننىڭ بوتەلكەسىن لاقتىرىپ تاستاماڭىز. شولمەكتىڭ ىشىنە 2-3 ءتۇيىر مەيىز سالىپ, ەكى ساعاتقا جاۋىپ قويىڭىز. مەيىزدىڭ قۇرامىنداعى تابيعي قانت شامپان, شاراپتىڭ باستاپقى قالپىنا كەلۋىنە كومەكتەسەدى.

4.ليمون كەۋىپ قالماسىن دەسەڭىز... 2-3 تامشى ليمون شىرىنى قاجەت بولسا تۇتاس ليموندى ەكىگە ءبولۋدىڭ قاجەتى جوق. ودان دا ليموندى تەسىپ, قالاعانىڭىزشا شىرىنىن سىعىپ الىڭىز. مۇنداي ءادىس جەمىستىڭ ۇزاق ساقتالۋىنا ءارى كەۋىپ كەتپەۋىنە كومەكتەسەدى.

5.كوك-سوكتى ۇزاق ساقتاۋ تاسىلى. ەگەر كوك-سوكتى ءبىر اي بويى ساقتاعىڭىز كەلسە ءبىر بۋماسىن جۋىپ, پلاستيك دوربالاردا مۇزداتقىشقا سالىپ قويىڭىز. پايدالانار الدىندا مۇزداتقىشتان شىعارعان كۇيدە تۋراپ الىپ, تاماققا قوسۋىڭىزعا بولادى. بىرەر مينۋتتان كەيىن اسكوك ەرىپ, تاماققا ءدامى سىڭەدى.

6.ۇيدەگى ازىق قورىن ساقتاۋ. ۇن, جارما, ماكارون ونىمدەرىن ساقتايتىن ىدىستىڭ ىشىنە لاۆر جاپىراعىنىڭ بىرنەشە تالىن سالىپ قويساڭىز شىبىن-شىركەي, قۇرت-قۇمىرسقا جولامايدى.

7.ساڭىراۋقۇلاقتى شىرىشتان قورعاۋ. ساڭىراۋقۇلاقتى توڭازىتقىشقا قاعاز ورامالعا وراپ سالىڭىز.

8. ىرىمشىكتى قالاي قۇرعاتپاي ساقتاۋعا بولادى؟ ىرىمشىك ءتىلىمى قۇرعاپ كەتپەسىن دەسەڭىز تۋرالعان تۇسىنا ماي جاعىپ قويعان ءجون.

9. كوكونىستەردى قالپىنا كەلتىرەمىز. ەگەر شالعام نەمەسە ءسابىز بوساڭسي باستاسا مۇزداي سۋعا سالىپ, شيكى كارتوپ بولشەكتەرىن قوسىڭىز. سوندا كوكونىستەر اپ-ساتتە باستاپقى قالپىنا قايتا كەلەدى.

10. پىسىرىلگەن توقاشتاردى ساقتاۋ. قىتىرلاق جانە جۇمساق پەچەنەنى بىرگە ساقتاۋعا بولمايدى. جۇمساق پەچەنەنىڭ قۇرامىنداعى ىلعال قىتىرلاق پەچەنەگە ءسىڭىپ كەتەدى. ءسويتىپ, ءوز قۇندىلىعىن جوعالتىپ الادى.

11.باناندى ساقتاۋ. پىسكەن باناندى ساباعىنان ۇزبەي ساقتاعان ءجون. سوندا ۇزاق تۇرادى.

12. تۇزدى دۇرىس ساقتاۋ. تۇز سالعىشتىڭ تۇبىنە ازداپ كۇرىش سالىپ قويساڭىز ۇنتاق جابىسىپ, قاتىپ قالمايدى. كۇرىش ارتىق ىلعالدى بويىنا ءسىڭىرىپ الادى.

13.سارىمايدى توڭازىتۋ. سارى مايدى مۇزداتقىشتا جارتى جىلعا دەيىن ساقتاۋعا بولادى. مايدى بىرنەشە بولىككە ءبولىپ, گەرمەتيكالىق پاكەتتەرگە وراپ سالىڭىز. سوندا ول جانىندا تۇرعان باسقا تاعامداردىڭ ءيىسىن بويىنا تارتپاي, جاقسى ساقتالادى.

14. قىشقىل ءسۇت ونىمدەرىن قالاي ساقتاۋ كەرەك؟ ىرىمشىك نەمەسە قايماق سالىنعان ىدىستى توڭكەرىپ قويۋ كەرەك. توڭكەرىلگەن ىدىستا تۇرعان سۇيىق زاتتىڭ اسەرىنەن ۆاكۋۋم پايدا بولىپ, تاعامدى بۇزاتىن باكتەريالاردان قورعايدى.

15. قانتقا اينالعان بال. قويۋلانىپ قالعان بالدى تاستاي سالماڭىز. بالدى 30 سەكۋند بويى ميكروتولقىندى پەشتە ورتاشا قۋاتتا قىزدىرۋ كەرەك. سوندا بال ءوز قالپىنا كەلەدى.

16. ىرىمشىكتى توڭازىتۋ. مايلىلىعى جوعارى جۇمساق ىرىمشىكتى توڭازىتۋعا بولادى. قالعان ىرىمشىكتى اۋا وتكىزبەيتىن گەرمەتيكالىق دورباعا نەمەسە كونتەينەرگە سالىپ مۇزداتۋ قاجەت. مۇزداتىلعان ىرىمشىكتى داستارقانعا قويماسان ءبىر كۇن بۇرىن توڭازىتقىشتا ۇستاعان ءجون.

17. تۇزى وتكىن سورپانىڭ ءدامىن قالاي كەلتىرۋگە بولادى؟ تاعامنىڭ تۇزى اششى بولىپ كەتسە وعان شيكى كارتوپ نەمەسە الما قوسۋعا بولادى. ول ارتىق تۇزدى بويىنا ءسىڭىرىپ الادى. ول ءۇشىن سورپاعا كارتوپ نە بولماسا المانى سالىپ 10 مينۋت قايناعاننان كەيىن ءسۇزىپ الاسىز. تاماعىڭىز ءالى دە اششى بولسا ءبىر قاسىق قانت قوسىڭىز. ەگەر ول دا كومەكتەسپەسە ءبىر قاسىق الما سىركە سۋىن قوسقان ءجون.

18. تاعام مايلى بولسا… ەگەر ۋاقىتىڭىز بولسا سورپانى جارتى ساعاتقا توڭازىتقىشقا قويىڭىز. بەتىندە توڭازىعان مايدى قالقىپ الىپ تاستاۋعا بولادى. ال ەگەر ۋاقىتىڭىز از بولسا سورپاعا بىرنەشە ءتۇيىر مۇز سالىپ, مايمەن بىرگە قالقىپ الىڭىز.

19. ءسۇت كۇيىپ كەتسە. ول ءۇشىن ءتۇبى كۇيگەن ىستىق سۇتكە ازداپ تۇز سالىپ جىبەرسەڭىز كۇيىكتىڭ ءيىسى مەن ءدامىن الادى.

20. قاتتى ەتتى جۇمسارتايىق. ەتتى پىسىرمەس بۇرىن مارينادتاپ العان دۇرىس. ول ءۇشىن سىرا, سىركە سۋى, اناناس شىرىنى نەمەسە قىزاناق پايدالانعانىڭىز ءجون. بۇلاردىڭ بويىندا ەتتى جۇمسارتاتىن قىشقىلدار مەن فەرمەنتتەر بار.

21. شىرىن الۋ. سيترۋس ونىمدەرىن سىقپاس بۇرىن ۇستەلدىڭ ۇستىنە قويىپ, ارى-بەرى ىسقىلاپ العان ءجون. سوندا شىرىنى كوپ شىعادى.

22. جەمىس-جيدەك تەز ءپىسسىن دەسەڭىز... ەگەر ءسىز پىسپەگەن جەمىس-جيدەك ساتىپ الساڭىز ونى قاعاز پاكەتكە سالىپ اراسىنا 1 الما قوسىڭىز. الما وسىمدىكتىڭ تەز پىسۋىنە كومەكتەسەتىن ەتيلەن گازىن بولەدى.

23.تاعام ساقتايتىن كونتەينەرگە ءسىڭىپ قالعان ءيىستى كەتىرەيىك. تاماق ساقتايتىن ىدىستاردى قانشا جۋساڭىز دا جاعىمسىز ءيىستىڭ ساقتالىپ قالاتىنى راس. ولاردىڭ ىشىنە اق-قارا ءتۇستى گازەتتى ۋقالاپ سالساڭىز ءيىستى تارتىپ الادى. پايدالانار الدىندا تاعى ءبىر رەت جۋىپ جىبەرەسىز.

24.تاۋىقتى مۇشەلەۋ. ەڭ الدىمەن اياقتارىن كەسىپ العان ءجون. ودان كەيىن جامباسىن سۇيەكتەن اجىراتىپ, قاناتتارىن كەسەسىز. سودان سوڭ ءتوسىن تومەن قاراتىپ ومىرتقاسىنان اجىراتاسىز. ودان ءارى جۇمساق ەتتەرىن بولشەكتەپ تۋراۋعا بولادى.

25. پەشكە ارنالعان تابا مەن قاعازدى قايدا ساقتاعان ءجون؟ بۇل ماقساتقا فايل سالۋعا ارنالعان قالىپتى پايدالانۋعا بولادى. مۇنداي قالىپقا جۇقالتىر, اس ورايتىن ءۇلدىر, تاعام پىسىرۋگە ارنالعان قاعاز بەن تابا, پلاستيك فورمالاردى سالىپ قويۋعا بولادى.

26. قالعان كوفەنى قايدا جىبەرەمىز؟ قايناتىلعان كوفە ىشىلمەي قالسا, ونى توگىپ تاستاماڭىز. ونى مۇز جاسايتىن قالىپقا قۇيىپ قاتىرىپ قويساڭىز, سۋىق كوفە دايىنداعان كەزدە پايدالانا الاسىز. قاتىرىلعان كوفەنىڭ قۇرامى وزگەرمەيدى.

27. قاتقان ناندى تاستاي سالۋعا بولمايدى. ونى كىشكەنتاي بولىكتەرگە تۋراپ, قۋىرىپ, سورپاعا سالىپ ىشۋگە بولادى نەمەسە سالاتقا قوسۋعا بولادى.

28. توت باسپايتىن تەمىردى قالاي تازالاعان ءجون؟ ول ءۇشىن سپيرت نەمەسە اراق پايدالانۋعا بولادى. ماقتانى نەمەسە تازا شۇبەرەكتى سپيرتكە باتىرىپ, داق تۇرىپ قالعان ورىنداردى سۇرتەسىز.

29. كۇيگەن قازاندى تازارتۋ. قازاننىڭ تۇبىنە كوپ مولشەردە اس سوداسىن سەۋىپ 4-5 قاسىق تۇز قوسىڭىز. ۇستىنە سۋ قۇيىپ ءبىر تۇنگە قالدىرىڭىز. سوندا كۇيىپ, جابىسىپ قالعان تاماق قالدىقتارى تەز تازارادى.

30. پىسكەن ماكارون جەلىنبەي قالسا, تاستاماڭىز. اۋا وتكىزبەيتىن پلاستيك پاكەتتەرگە نەمەسە قاقپاعى بار كونتەينەرگە سالىپ توڭازىتقىشقا قويساڭىز ۇزاق ۋاقىت ساقتالادى. داستارحانعا قويار الدىندا بىرنەشە سەكۋندقا ىستىق سۋعا سالىپ الساڭىز باستاپقى قالپىنا قايتا كەلەدى.

دەرەككوز: syrlasu.kz سايتى

ۇسىنعان: ماقپال سەمباي