قانشا بايلىق بەرسەڭ دە, ساۋابىممەن بولىسە المايمىن

بىر باي ادام مەشىتكە كىرىپ, ناماز وقىپتى. نامازدان سوڭ دۇعا ەتىپ جاتىپ, قاسىندا وتىرعان ءبىر ءدارۋىشتىڭ دۇعاسىن قۇلاعى شالادى. ءدارۋىش بىلاي دەپ دۇعا قىلۋدا ەدى:

- اللاھىم! قارنىم وتە اش. ماعان مىناداي تاعام, مىناداي تاتتىلەر جەتكىزىپ بەرشى!

باي ادام ىشىنەن "بۇل ءدارۋىش مەنى ەستىسىن دەپ ادەيى داۋىسىن شىعارىپ دۇعا جاسادى. سونى وزىمە كەلىپ ايتسا دا بولار ەدى عوي. وسى ىستەگەنى ءۇشىن وعان ەشنارسە بەرمەيمىن" دەپ ويلاپتى. ء(ناپسى دەگەن مىنە وسىنداي, ءار جەرگە مۇرنىن سۇعا قويادى).

دارۋىش دۇعاسىن اياقتاپ, ورنىنان تۇرادى دا, سوسىن مەشىتتىڭ ەسىك جاعىنا وتىرىپ, جانتايادى. ءبىرازدان سوڭ مەشىتكە ءبىر ادام قولىندا سەبەتىمەن بىرگە كىرىپ كەلەدى. ول تۇپ-تۋرا ءدارۋىشتىڭ جانىنا بارىپ, سەبەتتى ونىڭ الدىنا قويا سالادى. ءدارۋىش سەبەتتىڭ ءۇستىن اشىپ قاراسا, دۇعاسىندا سۇراعان تاعام مەن تاتتىلەر تۇرعان ەكەن. بۇل كورىنىستى كوز الماي قاراعان باي, وتىرعان جەرىندە اڭ-تاڭ بولادى.

دارۋىش تاعامنان, تاتتىلەردەن ءوزى تويعانشا جەپ, قالعانىن سەبەتتى اكەلگەن ادامعا قايتارىپ بەرىپتى. الگى ادام ۇندەمەي سەبەتتى كوتەرىپ, مەشىتتەن شىعىپ كەتەدى. 

باي ورنىنان اتىپ تۇرىپ, سەبەت كوتەرگەن ادامنىڭ ارتىنان جۇگىرەدى. جەتكەن بويدا ونى توقتاتىپ, سۇرايدى:
- ءسىز كىمسىز؟
- ءبىر پاقىرمىن.
- بۇل نارسەلەردى كىم جىبەردى؟
- ەشكىم. ءوزىم الىپ كەلدىم. 
- ءسىز الگى ءدارۋىشتى تانيسىزبا؟
- جوق, تانىمايمىن.
- ءوزىڭىز تانىمايتىن, بىلمەيتىن ادامعا نەگە سونشا ازىق كوتەرىپ كەلدىڭىز؟

پاقىر كىسى كۇلىپ قويىپ, بىلاي دەيدى:
- مەن ءبىر قاراپايىم جالدانبالى جۇمىسشىمىن. ادامداردىڭ جۇگىن تاسىپ كۇن كورەمىن. بۇگىن ءبىر بايدىڭ جۇگىن تاسىپ بەرگەن ەدىم, ول ماعان كوبىرەك اقشا بەرىپ جىبەردى. قۋانىپ, بازارعا باردىم, باسقا ۋاقىتتاردا بالالارىما اپەرىپ, جەگىزە الماعان تاعامداردى الىپ, ۇيىمە باردىم. قاتتى شارشاعان ەكەنمىن, ايەلىم تاماق ازىرلەيمىن دەگەنشە ۇيىقتاپ قالىپپىن. تۇسىمدە پايعامبارىمىزدى (س.ا.ۋ) كوردىم. ول (س.ا.ۋ) ماعان بىلاي دەدى:
- مىنا مەشىتتە ءبىر ءۋالي ادام وتىر. ول ءقازىر عانا سەنىڭ ۇيىڭدەگىدەي تاعامداردى سۇراپ, اللاعا دۇعا قىلدى. سەن وعان تاعامدارىڭنان, تاتتىلەرىڭنەن الىپ بارىپ, جەگىزگىن. ول ءوزى قالاعانشا تويىپ جەسىن. قالعانىن الىپ كەتىپ, بالا-شاعاڭمەن بىرگە جەسەڭ, سەنىڭ وتباسىڭا بەرەكەت بولادى. وسىلاي جاساساڭ, ءجانناتقا كىرۋىڭە ءوزىم كەپىل بولامىن!"

...مەن وياندىم دا, تاعامدارىمدى الىپ, مەشىتكە جۇگىردىم. بارى وسى. قالعانىن ءوزىڭىز كوردىڭىز. 

باي ودان "وسى بازارلىعىڭا قانشا قاراجات كەتتى؟" دەپ سۇرادى. پاقىر قانشا قاراجات جۇمساعانىن ايتتى. 
- وسى قاراجاتىڭنىڭ ون ەسەسىن بەرەمىن. قارىمى ءۇشىن ساۋابىڭنىڭ ءبىر بولىگىن ماعان بەر! - دەپتى باي. 
- بولمايدى, - دەيدى پاقىر.
- جيىرما ەسەسىن بەرەمىن.
- بولمايدى.
- ەلۋ ەسە!
- جوق.
- ءجۇز!!!

باسىن شايقاعان پاقىر بايعا قاراپ, بىلاي دەگەن ەكەن:
- بەكەرگە اۋرەلەنبەڭىز. قانشا بەرسەڭىز دە, ساۋابىمدى سىزبەن بولىسە المايمىن. ويتكەنى پايعامبارىمىز (وعان اللانىڭ يگىلىگى مەن سالەمى بولسىن!) ماعان وسى ءبىر ءىسىم ءۇشىن ءجانناتتى ۋادە ەتتى. ءسىز ماعان بۇكىل بايلىعىڭىزدى بەرسەڭىز دە, مەن سىزگە بۇل نىعمەتتى بەرمەيمىن!...

ۇسىنعان: ماقپال سەمباي