مۇسىلماندار اراسىندا مەيىرىمدىلىك جويىلا ما دەپ قورىقتىق

باياعىدا قولى قارۋلى جىگىت ءبىر ادامدى ءولتىرىپ قويادى. ابايسىزدا. ولگەن ادامنىڭ بالالارى جينالادى, سوت بولادى, ونى ولىمگە كەسەمىز دەيدى. ء«ماسساعان, ەندى ءقايتتىم؟» - دەمەيدى ول. «الىستا تۇرۋشى ەدىم, دۇنيەمدى جانۇياما تابىستايىن, جاقىندارىممەن قوشتاسايىن, قارىزدارىمدى جابايىن. سوعان 3 كۇنگە رۇقسات بەرسەڭىز» - دەيدى عوي الگى بەيباق. سول كەزدە سوت كوپشىلىككە قارايدى دا: «بۇعان كەپىل بولاتىن ادام بار ما؟» - دەيدى. ەشكىم ۇندەمەيدى. سەبەبى, اناۋ جىگىت الداپ كەتىپ, كەلمەي قالسا, وعان كەپىل بولعاننىڭ باسىن شابۋى مۇمكىن. تاعى سۇرايدى. ەشكىم ۇندەمەيدى ءارى ونى مۇندا ەشكىم تانىمايدى.
⠀
سول كەزدە قارت ساحابا ءابۋ زار شىعىپ: «مەن كەپىل بولامىن. ونى تانىمايمىن, كەلمەي قالسا, ولىمىڭە كەپىل بولامىن» - دەيدى. ءبارى قاتتى تاڭىرقاپ قالادى. 

ۇش كۇن دەگەن ءۇش ساعاتتاي وتەدى دە, كەتەدى. تۇرعىنداردىڭ ءبارى قايتا جينالادى. كىسى ولتىرگەن جىگىت جوق. ءتىرى جاننىڭ ءبارى ۋادە بەرىپ كەتكەن جاننىڭ جولىنا قاراپ تۇر. ءبىراق ەشكىم كورىنبەيدى.

"الدادى-اۋ" دەپ ساندارىن سوققالى تۇرعاندا, الىستان قاراسى كورىنەدى. جۇگىرىپ كەلەدى ەكەن. سوندا ونىڭ ۋادەسىندە تۇرعانىنا ءبارى تاڭ قالادى. ول بولسا: «اۋىلىم الىس بولعاننان كەيىن كەشىكتىم, بارىنە ۇلگەردىم, ەندى ولىمگە دايىنمىن» - دەيدى. سەرتتەن تايماعانىنا ءتانتى بولىپ, ولگەن كىسىنىڭ بالالارى ء«بىز كەشىردىك» دەيدى.
⠀
سوندا سوت ءولىم جازاسى بەرىلگەن ادامنان: «سەن ولەتىنىڭدى بىلە تۇرا وسىندا كەلدىڭ, نەگە قاشىپ كەتپەدىڭ؟» - دەيدى. ول: «مەن سەرتىمدە تۇرماسام, كەيىن مۇسىلماندار اراسىندا سەرت جويىلا ما دەپ قورىقتىم, سول ءۇشىن كەلدىم» - دەيدى. ەندى سوت ءابۋ زارعا بۇرىلىپ: «سەن بۇل ادامدى تانىماساڭ دا كەپىل بولدىڭ, نەگە؟" -دەيدى. ءابۋ اقساقال: «كەيىن مۇسىلماندار اراسىندا باۋىرماشىلىق السىرەي مە دەپ قورىققاننان كەپىل بولدىم» - دەيدى. ال اكەسى ولگەن بالالار: «ەگەر ءبىز كەشىرمەسەك, مۇسىلماندار اراسىندا مەيىرىمدىلىك جويىلا ما دەپ قورىقتىق, سول سەبەپتى كەشىردىك» - دەيدى.
⠀
مىنە, بۇرىن ادامدار وسىنداي بولعان دەپ ايتاتىنداي جاعداي. ۋادەدە تۇرۋ, باۋىرمال بولۋ, كەشىرىم قىلۋ. بۇل مىسالدىڭ ارعى ءتۇبى سول شۇكىر قىلۋ شىعار.. وزىنە بەرىلگەن ءاربىر قاسيەتتىڭ, ءار نىعمەتتىڭ قۇدايدىڭ تاراپىنان ساعان سىيلىق ەتىلگەنىن ءبىلۋ.

ساياحاتشى-جۋرناليست, وركەن كەنجەبەكتىڭ ينستاگرام پاراقشاسىنان الىندى

ۇسىنعان: ماقپال سەمباي