اقتوبەلىك شارۋالار ءتيىمدى جۇمىس ىستەي باستادى

اقتوبە وبلىسىندا اۋىل شارۋاشىلىعىنىڭ ەڭبەك ونىمدىلىگى بيىل 48%-عا, ءبىر جۇمىسشىعا 705 مىڭ تەڭگەدەن 1,2 ملن تەڭگەگە دەيىن ءوستى, دەپ مالىمدەدى ءوڭىر باسشىسى بەردىبەك ساپارباەۆ.

• ەلباسى تاپسىرماسىنا سايكەس, وڭىردە «اقىلدى» تەحنولوگيالاردى ەنگىزۋ, سۋارمالى جانە ەگىستىك الاڭدارىن كەڭەيتۋ, جاڭا يننوۆاسيالىق جوبالاردى ەنگىزۋ, ءونىم ءوندىرۋ ۇلەسىن ۇلعايتۋ ەسەبىنەن ازىق-تۇلىك قاۋىپسىزدىگىن قاماتماسىز ەتۋ جۇمىستارى كۇشەيتىلدى,-دەدى وبلىس اكىمى.

اتاپ ايتقاندا, وڭىردە مۇيىزبەن ەمدەيتىن ەمحاناسى بار باتىس قازاقستانداعى جالعىز مارال ءوسىرۋ فەرماسى, كوكونىس وسىرەتىن جىلىجاي كەشەندەرى, افريكالىق جايىن وسىرەتىن شارۋاشىلىق ىسكە قوسىلدى.

اۋىل شارۋاشىلىعىنىڭ ءداستۇرلى ەمەس سالالارى دا بەلسەندى دامىپ كەلەدى. قازىرگى تاڭدا قويان, ارا, بودەنە جانە ت.ب. وسىرەتىن 600-دەن اسا شارۋاشىلىق بار. «بولات لتد» ءجشس-نىڭ تاڭقۋراي ەگەتىن القاپتارىنان جىل سايىن 150 توننادان استام جيدەك جينالادى, جۋىردا قۇلپىناي وسىرەتىن جىلىجاي ىسكە قوسىلادى.

سونداي-اق, بيىل اسىل تۇقىمدى ءىرى قارا مال باسى 51%-عا, 28 مىڭنان 42,3 مىڭ مال باسىنا دەيىن ءوستى. سۋارمالى جەرلەر الاڭى وبلىس بويىنشا 41%-عا - 30,6 مىڭ گەكتارعا دەيىن, ەگىستىك جەرلەر15%-عا - 754,1 مىڭ گەكتارعا دەيىن كەڭەيدى.

• ەۋروپالىق قايتا قۇرۋ جانە دامۋ بانكىمەن بىرگە سۋارمالى جەرلەردى قايتا قالپىنا كەلتىرۋ جۇمىستارى جالعاسىپ جاتىر. بۇل ارىپتەستىك 2019 جىلعا قاراي 40 مىڭ گەكتار سۋارمالى جەردى ءتيىمدى اينالىمعا ەنگىزۋگە مۇمكىندىك بەرەدى,-دەدى ب.ساپارباەۆ.