• usd 468.56

  • eur 497.56

  • rub 7.3

  • cny 67.18

29 ناۋرىز, 17:02:26
الماتى
+35°

18 ماۋسىم, 2018 ۇلى كوش

قىتايدا قالعان اكەسىن 8 اي كورمەگەن بالالار ەلباسىدان جاردەم سۇرايدى

اكەسى مەن اعاسىنان تىرىدەي ايرىلىپ, انالارىن جەر قويىنىنا تاپسىرعان قوس ءبۇلدىرشىن ەلباسىنان, قر سىم-نەن, حالىقارالىق قۇقىق قورعاۋ ۇيىمدارىنان كومەك سۇرايدى.

انالارىن جەر قوينىنا تاپسىرىپ, اكەسى مەن باۋىرىنان تىرىدەي كوز جازىپ قالعان بالالار ەلباسىدان جاردەم سۇرايدى, دەپ جازادى qamshy.kz اقپارات اگەنتتىگى.

بۇل تۋرالى قىتايداعى قانداستارىمىزدىڭ ماسەلەسىنە ءجىتى نازار اۋدارىپ جۇرگەن ساۋلە ءابىلداحانقىزى ءوزىنىڭ facebook پاراقشاسىندا ءجاريالادى.

الي سىلقىمبايۇلى سەگىز اي بۇرىن قارت اكە-شەشەسىن الماتى وبلىسى ەڭبەكشىقازاق اۋدانى شەلەك اۋىلىنا كوشىرىپ اكەلىپ, 20 جاستاعى ۇلىمەن كوشى-قون ماسەلەسىن اياقتاۋ ءۇشىن قىتايعا قايتا كەتكەن. سودان قايتا ورالماعان.

قانداستار ماسەلەسى

ساۋلە ءابىلداحانقىزىنىڭ ايتۋىنشا ەكەۋىنىڭ دە قۇجاتىن قىتاي بيلىگى تارتىپ العان. وزدىگىنەن ءجۇرىپ تۇرا المايتىن قوس قاريانى سەگىز ايدان بەرى كەلىنى كەرىمحان نامازحانقىزى باعىپ قالعان. ال, بۇگىن قۇسادان قايعى جۇتقان كەلىنشەك ويدا جوقتا كوز جۇمدى. ارتىندا 16 جاستاعى قايرات ەسىمدى ۇلى, 13 جاستاعى ءبۇلدىرشىن ەسىمدى 13 قىزى قالدى.

«ەڭ قيىنى جانە وكىنىشتىسى - بۇل كىسىلەردىڭ ەشقايسىسى قازاقستان ازاماتتىعىن الىپ ۇلگەرمەگەن. ءبىزدىڭ بيۋروكراتتار وتىرعاندا ءبىر جىلدا ازاماتتىق الۋ مۇمكىن دە ەمەس. ءتىپتى, ىقتيار حاتتىڭ ءوزىن ەكى جىلداپ الا الماي جۇرەتىندەر بار...
ودان دا اۋىرى - كىشى ۇلدىڭ قىتايلىق پاسپورت مەرزىمى ءبىتىپ كەتكەن. ول اكەسى جانىندا بولماسا, وزدىگىنەن قۇجات جاساي المايدى...
ال قىزدىڭ جەكە ىقتيار حاتى جوق, بۇگىن قايتىس بولعان اناسىنىڭ قۇجاتىنا تىركەلگەن”,-دەيدى شەلەك اۋىلىنا ارنايى بارعان ساۋلە ابەدينوۆا.

ساۋلە ءابىلداحانقىزىنىڭ سوزىنشە ەل ۇكىمەتى كامەلەتكە تولماعان بالالاردى تەك اتا-اناسىنىڭ قۇجاتىنا تىركەيدى.  قاپيادا كەلىنىنەن ايرىلىپ, ۇلى مەن ۇلكەن نەمەرەسىنە تىرىدەي جەتە الماي, قايعىدان قان جۇتىپ وتىرعان سىلقىمباي قاريا مەن جارى شاكەن كاسەنقىزىنىڭ قۇجاتسىز قالعان نەمەرەلەرىنىڭ جاعدايىن ويلاپ الاڭدايدى. قارت كىسىلەردىڭ قۇجات جاساتىپ, تابانىنان تاۋسىلىپ جۇرۋگە دەنساۋلىقتارى مۇلدە ءجارامايدى.

«بىزدىڭ قۇداي بەرە سالعان وكىمەت كامەلەتكە تولماعان بالالاردى اتا-اناسىنىڭ قۇجاتىنا تىركەگەنى دۇرىس شىعار, ءبىراق وزدەرىنە دە جەكە-جەكە ءبىر جاپىراق قاعاز بەرسە بولماي ما؟ جامان ايتپاي, جاقسى جوق دەمەكشى, مىناداي جاعدايدا (اتا-اناسىنان ايىرىلعان جاعدايدا) ونسىز دا قان جۇتىپ وتىرعاندا, ونسىز دا ازاماتتىق الا الماي سارىلىپ كۇتىپ جۇرگەندە, قۇجات مەرزىمى دەگەن ماسەلە ت.ب. قاعازستاندىق پروبلەمالار شاش ەتەكتەن بولعان قوعامدا ماسەلە ونان سايىن كۇردەلەنبەس ءۇشىن ىقتيارحاتتى ۇلكەن-كىشىگە بىردەي جەكە-جەكە جازىپ بەرۋ قيىن با؟», - دەپ اشىنادى قوعام بەلسەندىسى.

قانداستارىمىزدىڭ ءبىر جاپىراق ىحتيار حات الۋ ءۇشىن اي ارىلتىپ, جىلدار ساناپ, قاعازباستىلىقتىڭ قۇربانى بولىپ جۇرگەنى جاسىرىن ەمەس. اكەسى مەن باۋىرىنان تىرىدەي ايىرىلىپ, اناسىن قارا جەر قوينىنا تاپسىرعان قوس ءبۇلدىرشىن ەلباسىدان, قر سىم-نەن, حالىقارالىق قۇقىق قورعاۋ ۇيىمدارىنان كومەك سۇرايدى.

"ەندى بۇل ەكى بالا قىتاي ازاماتى رەتىندە ارعى بەتتىڭ ادامى دا, قازاق بالاسى رەتىندە ءبىزدىڭ بالامىز. وسى ەلدە وقيمىن, وسىپ-ونەمىن دەپ ارمانداپ, قازاقستاندىق كەلەشەگىنىڭ كەمەل ەكەنىنە سەنىپ كەلگەن جاۋتاڭكوزدەر...", - دەيدى ساۋلە ءابىلداحانقىزى.

قانداستار ماسەلەسى

ەستەرىڭىزگە سالساق, qamshy.kz اقپارات اگەنتتىگى وسىعان دەيىن قىتايداعى قانداستارىمىزدىڭ ماسەلەلەرى بويىنشا قۇزىرلى ورگاندارعا ساۋال جولداپ, بولعان جاعدايلاردىڭ ءمان-جايىن وقىرمان نازارىنا ۇسىنىپ كەلدى. 

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر