شاۆكات ميرزيёەۆ: اۋىلدى كوتەرمەسەك, حالىق بىزگە ەشقاشان سەنبەيدى

تاققا مىنگەنىنە ءبىر جىلدان جاڭا اسقان شاۆكات ميرزيёەۆ وزبەك جۇرتىن عانا ەمەس, ورتالىق ازيا ەلدەرىن دە ءجيى-جيى اۋزىنا قاراتىپ كەلە جاتىر. اۋزىنا قاراتقاندا, ءدامدى ءسوز ايتىپ, كوسەمسىپ جۇرگەن جوق. يسلام كاريموۆتىڭ كەزىندەگى قاتقان سەڭدى بۇزىپ, بۇقارانى باسقارۋدىڭ وزىندىك ارناسىن سالدى. ءارى سول ارناعا قۇياتىن ۇكىمەت تىرلىگىنىڭ ءبارىن حالىقتىڭ قالاۋى توڭىرەگىنەن تاۋىپ كەلەدى.

كەشەلى بەرى تمد اۋماعىنداعى ءبىرقاتار باسىلىمدار وزبەكستان پرەزيدەنتىنىڭ پارمەنىمەن قايتا تۇلەگەن ماناس اۋىلى تۋرالى جاڭالىقتى جارىسا جاريالاپ جاتىر. جاڭالىقتىڭ تورەسى سول, يت بايلاسا, تۇرعىسىز قيىرداعى قاڭىراعان اۋىل 45 كۇننىڭ ىشىندە جارقىراپ شىعا كەلگەن. وندا دا, اعاشىن اكتەپ, جولىنىڭ وي-شۇقىرىن بۇتىندەيتىن كوزبوياۋشىلىق ەمەس, ىرگەسى 60-شى جىلدارى قالانىپ, كەيىن قاراۋسىز قالعان ەلدى-مەكەندى ءسۇرىپ تاستاپ, جاڭازامانعا لايىق, مۇلدە وزگەشە قالاشىق تۇرعىزعان. قوسقاباتتى كوپپاتەرلى ۇيلەر, ەمحانا, بالاباقشا, سپورت كەشەنى سەكىلدى الەۋمەتتىك نىسانداردى بىلاي قويعاندا, تەرى مەن ءجۇن وڭدەيتىن شاعىن ءوندىرىس ورىندارى دا تۇساۋىن كەسكەن. ءتىپتى تۇيە سۇتىنەن دارىلىك پرەپارات جاسايتىن سەح تا اشىلىپتى.

اقپاراتقا قاراعاندا, وزبەكستان باسشىسى بۇل اۋىلعا اقپان ايىندا كەلىپ, ءتيىستى تاپسىرمالار بەرگەنگە ۇقسايدى. مىنە, سودان 1,5 اي عانا ۋاقىت وتكەندە پرەزيدەنتتتىڭ تاپسىرماسى تاپ-تۇيناقتاي ەتىپ ورىندالعان. جاڭارىپ, قايتا تۇلەگەن اۋىلعا ەكىنشى مارتە كەلگەن شاۆكات ميرزيёەۆ قۋانىشى قوينىنا سىيماعان كوپشىلىككە «؛قۇتتى بولسىن»؛ ايتا وتىرىپ, نوكەرلەرىنە ءبۇي دەپتى: «؛حالقىمىزدىڭ قانداي جاعدايدا تۇرمىس كەشىپ جاتقانىن كورسەڭ, جانىڭ اۋىرادى. ءبىزدىڭ الدىمىزدا نەندەي ماقساتتار مەن مىندەتتەر تۇرعانىن مەن وسى ماناس اۋىلىن مىسالعا كەلتىرە وتىرىپ تۇسىندىرەيىن. ارينە, وڭاي ەمەس, شارۋا شاشەتەكتەن. ءبىراق ورلەۋدى اۋىلدى تۇلەتۋدەن, وندا دا, تالقانى شىققان, جاعدايى مۇشكىل اۋىلداردان باستاماساق, حالىق بىزگە سەنبەيدى. ەشقاشان سەنبەيدى!»؛.

بىلاي قاراساڭىز, وزبەكستان باسشىسىنىڭ ارەكەتى ءبىر وقپەن ەكى قويان اتقانمەن تەڭ. سەبەبى 6,5 مىڭ حالىق تۇراتىن ماناس اۋىلىندا نەگىزىنەن ەتنيكالىق قىرعىزدار تۇرادى. كاريموۆتىڭ كەزىندە وزبەك-قىرعىز قاتىناسى تىم شيەلەنىسىپ كەتكەنى ەستە. ەندى مىناداي جاعدايدان كەيىن ارىپتەسىنە سوورونباي جەەنبەكوۆتىڭ دە ءىشى جىلىپ تۇرارى بەلگىلى. قىرعىز بەن وزبەك جۇرتىنىڭ دا بىر-بىرىنە دەگەن ىقىلاس-پەيىلى بەكي تۇسەدى. مۇنىڭ بارلىعى تاشكەنتتىڭ كورشىلەرمەن ءارى تۋىستاس ەلدەرمەن قارىم-قاتىناستى قالپىنا كەلتىرۋ ساياساتىمەن ۇندەس.

ال باستىسى, وزبەك باسشىسىنىڭ اۋىلدى كوتەرۋگە قاتىستى باستاماسى. ءوزى ايتپاقشى, بۇل شارۋانىڭ وڭاي بولمايتىنى دا راس. دەگەنمەن نيەت بار. سول نيەتتى جۇزەگە اسىراتىن كۇش ميرزيёەۆتىڭ قولىندا. ميرزيёەۆ شەندى-شەكپەندىلەردىڭ ەكى اياعىن ءبىر ەتىككە تىعىپ, حالىققا باسىن يدىرگەن سايىن بۇقارانىڭ دا بيلىككە دەگەن سەنىمى ارتىپ كەلە جاتىر. ال بۇل دەگەنىڭىز, ميرزيёەۆتىڭ كوكەيىندەگى ەڭ باستى ماقسات. ويتكەنى حالىق بيلىككە سەنبەگەن جەردە ەشقاشان بەرەكە بولمايدى. اربىردەن سوڭ, ەكونوميكانى دامىتىپ, مەملەكەتتى العا سۇيرەيتىن قۋات بيلىكتىڭ ەمەس, حالىقتىڭ بويىندا. الەۋمەت ءال جيعان سايىن ونىڭ بەرەرى دە ارتا تۇسەدى. ال ەگەر بيلىك باردى باۋىرىنا باسىپ الىپ, حالىقتى الدارقاتۋعا كوشسە, ونىڭ ارتى مىندەتتى تۇردە ءبىر بالەگە اپارىپ تىرەيدى. ي.كاريموۆ وقىستان كوز جۇمباعاندا, وزبەكستان دا وسىنداي ءبىر قاتەرگە ۇرىنۋى ابدەن مۇمكىن ەدى. وزبەك جۇرتىنىڭ باعىنا قاراي, بيلىككە ميرزيёەۆ كەلدى. قىزىعاسىڭ. قىزىقپاۋ مۇمكىن بە؟

سانسىزباي نۇربابا