«تۇركى ەلدەرى جاستارىنىڭ ۇلكەن قۇرىلتايى» 2019 جىلى وتەدى

وسىعان دەيىن ءار جىلدارى «قازاق حاندىعىنا 550 جىل», «قازاق داۋىسى», «كوش جانە كوشباسشى», «الاشوردا-100 ءجىل» ىس-شارالارىن وتكىزگەن «قامشى» اقپارات اگەنتتىگى بيىل دا بىرنەشە شارانى قولعا الۋدى جوسپارلاعان. ونىڭ ىشىندە ەڭ ماڭىزدىسى – «تۇركى ەلدەرى جاستارىنىڭ ۇلكەن قۇرىلتايى» ەدى. بۇل شارا تۇگەل تۇركىنىڭ اسپانىنا ورتاق «پوەزيا جۇلدىزى» ماعجان جۇماباەۆتىڭ 125 جىلدىعىنا ارنالىپ,  تۇركى ەلدەرىنىڭ بولاشاعى تالقىلاناتىن بولعان. قۇرىلتايدا تالقىلاناتىن نەگىزگى تاقىرىپتاردا بەلگىلەنگەن. ولار:

1. ورتاق تاريح. تۇركى ەلدەرى مەكتەپتەرىنە ورتاق «تۇركى تاريحى» ءپانىن وقىتۋ ماسەلەسى.
2. ورتاق ءالىپبي. لاتىن گرافيكاسى نەگىزىندە ورتاق جازۋ ۇلگىسىن قالىپتاستىرۋ.
3. ورتاق الەۋمەتتىك جەلى. facebook, instagram, telegram, whatsap سياقتى تۇركى ەلدەرىنە ورتاق الەۋمەتتىك حابار الماسۋ قۇرالىن جاساۋ.
4. ورتاق تەحنيكالىق پروگرەسس. تۇركى ەلدەرىندە بولىپ جاتقان تەحنيكالىق جەتىستىكتەردى ورتاق پايدالانۋ, دامىتۋ جولدارى.
5. ورتاق ەكونوميكالىق كەڭىستىك. تۇركى ەلدەرىنە ورتاق كاسىپكەرلىك بايلانىس, ەكونوميكالىق ەركىن ساۋدا جۇيەسىن قۇرۋ مۇمكىندىكتەرىن قاراستىرۋ.
6. ورتاق اقپاراتتىق اگەنتتىك. تۇركى حالىقتارىنا ورتاق اقپاراتتىق الاڭ جاساۋ. نەگىزگى باسىمدىق ينتەرنەت كەڭىستىگىندە اقپاراتتىق اگەنتتىك قۇرۋعا بەرىلەدى.
7. ورتاق بولاشاق. تۇركى مەملەكەتتەرىنىڭ ەرتەڭى, دامۋ بيىگى, ىقپالداستىق مۇمكىندىكتەرى, ورتاق قورعانىس ماسەلەلەرى.

دەگەنمەن قارجىلىق قيىندىقتارعا بايلانىستى بۇل يگى شارانى وتكىزۋ 2019 جىلدىڭ ەنشىسىندە قالىپ وتىر. سونداي-اق, ەلباسى تاپسىرماسىمەن 2019 جىل قازاقستاندا «جاستار جىلى» بولىپ جاريالاندى. سوندىقتاندا دايىندىقتى تياناقتى جاساپ, ناقتى ناتيجەلەرگە قول جەتكىزۋ ءۇشىن ءمان-ماڭىزى ۇلكەن قۇرىلتايدى بيىلعى جىلدىڭ كۇنتىزبەسىنەن الىپ تاستاپ وتىرمىز. ءبىراق  كوزدەگەن ماقسات پەن مۇرات-مۇددە ەش وزگەرمەك ەمەس. قاتىسۋ شارتتارى دا كوپ وزگەرىسكە تۇسپەيدى. 

تۇركى ەلدەرى جاستارىنىڭ ۇلكەن قۇرىلتايىنا قاتىسۋ شارتتارى:

1. قۇرىلتايعا قاتىسۋشىلاردىڭ جاس شەكتەمەسى 25-35 جاس اراسى.
2. قۇرىلتايعا قاتىسۋشى ءوز انا ءتىلىن جەتىك ءبىلۋى تيىس. 
3. تىلەك ءبىلدىرۋشى بىلىم سالاسىنىڭ قىزمەتكەرى, it مامانى, ساياساتكەر, جۋرناليست, كاسىپكەر تالاپتارىنا ساي كەلۋى كەرەك. 
4. جوعارىداعى تالاپتان ءتىس وز ەركىمەن قۇرىلتايعا قاتىسپاق بولعاندارعا شەكتەۋ قويىلمايدى. ءوز شىعىنىن ءوزى كوتەرەدى.
5. قاتىسۋشىنىڭ 3 كۇندىك ءقوناق-ۇيى, ترانسفەرى جانە ءوزى تۇرعان ەلدەن-كەلىپ كەتۋ قاراجاتى قۇرىلتايدى ۇيىمداستىرۋشى تاراپىنان تولەنەدى.
6. قۇرىلتاي شارتى الەۋمەتتىك جەلىدە جاريالانادى. قاتىسۋشى ءوزىنىڭ قاتىساتىنى تۋرالى كوممەنتتە جازۋى ءتيىس.ارى ءوزىنىڭ ءپروفيلى جالپىعا قولجەتىمدى بولۋى كەرەك.
7. ودان سوڭ قاتىسۋشى ءوزى تۋرالى تۇيىندەمەنى, قۇرىلتاي تاقىرىبىنا قاتىستى بايانداما وزەگىن بۇگىننەن باستاپ, [email protected]  پوشتاسىنا  جىبەرۋى ءتيىس. 
8. قۇرىلتايعا قاتىسۋعا جىبەرىلگەن وتىنىمدەردى ارنايى كوميسسيا ىرىكتەپ, دەلەگاسيا مۇشەلەرىن 22 ناۋرىزعا(22.03.2019) دەيىن بەكىتەدى.

قۇلاققاعىس: «قامشى» اقپارات اگەنتتىگى وسىعان دەيىنگى ءاربىر ءىس-شارانى ءوز قاراجاتىمەن جانە جەكەلەگەن مەملەكەتشىل ازاماتتاردىڭ قولداۋىمەن وتكىزىپ كەلەدى. باستى ماقسات – بيلىك تاراپىنان, مەملەكەت تاراپىنان جاسالىپ جاتقان وڭدى قادامدارعا قولداۋ تانىتۋ, كەمشىن ءتۇسىپ جاتقان تۇستارعا ازاماتتىق تۇرعىدان اتسالىسۋ.  «تۇركى ەلدەرى جاستارىنىڭ ۇلكەن قۇرىلتايى دا» سول داستۇرىمىزبەن «قامشىنىڭ» قاراجاتىمەن قولعا الىنىپ وتىر. ەگەر وسى شارامىزعا قولداۋ كورسەتىپ, سەرىكتەستىك تانىتامىز دەگەن ۇيىمدار مەن ازاماتتار بولىپ جاتسا, تەك قۋانامىز.