• USD 468.56

  • EUR 497.56

  • RUB 7.3

  • CNY 67.18

28 Наурыз, 16:37:47
+35°

26 Желтоқсан, 2018 Аймақтар

Науқас балалардың ата-аналары жаңа заңды толығымен қолдайды...

Алматы қаласы Педиатрия және балалар хирургиясы ғылыми орталығында «Денсаулық сақтау саласындағы клиникалық зерттеулердің рөлі» атты брифинг өтті

Алматы қаласы Педиатрия және балалар хирургиясы ғылыми орталығында «Денсаулық сақтау саласындағы клиникалық зерттеулердің рөлі» атты брифинг өтті, деп хабарлайды Qamshy.kz ақпарат агенттігі.

Жиын ҚР Парламенті Сенатының 25 желтоқсанда қабылдаған гемофилия және өзге де сирек кездесетін аурулармен ауыратын науқастарға клиникалық зерттеу жүргізу туралы ҚР Денсаулық сақтау министрлігінің заң жобасын талқылау-түсіндіру мақсатында ұйымдастырылды. Аталған заң жобасы еліміздегі медицинаның дамуымен қоса, фармацевтика, диагностикалық зерттеулер мен сирек кездесетін ауруларды түбегейлі емдеуде маңызды рөл атқарады- дейді брифинг спикері С.Д. Асфендияров атындағы ҚазҰМУ-нің ғылыми зерттеу жұмыстары бойынша проректоры Жүсіпов Бауыржан Сәбитұлы.

Алматы

«Отандық фармкомпаниялар шетелде зерттелген және тексерілген препараттарды өндірумен айналысады. Дегенмен, шетелдіктерге оң әсер еткен дәрі-дәрмектердің барлығы қазақстандықтарға да дәл солай әсер етеді деген сөз емес. Сапалы медициналық қызмет көрсету мен науқастардың жағдайын бақылауда клиникалық зерттеу жүргізудің маңызы зор...»-деп түсіндірді Бауыржан Сәбитұлы.

Алматы

Баспасөз брифингіне сирек кездесетін дертке шалдыққан балаларды қолдау ұйымдарының өкілдері арнайы шақыртылған. Қазақстандық мүмкіндігі шектеулі жандар мен гемофилияға шалдыққан науқастар ассоциациясының президенті Тамара Рыбалова клиникалық зерттеу жүргізу науқас балалардың өмірін сақтап қалуда маңызды екендігін атап өтті: «Елімізде гемофилияның ауыр түріне шалдыққан 40-тан аса балалар мен 15-ке жуық ересектер бар. Мұндай түрімен ауыратын балалар тек біздің елде ғана туылады. Оған басты себеп, экологиялық мәселелер болуы мүмкін. Мәселен, алты жасар Радамир Шагабудинов туғанынан бастап әр күн сайын өте ауқымды дозада ем қабылдап келді. Бірақ, бала денсаулығы оңалмады. Ата-анасы Ресейде емдетуге шешім қабылдаған болатын. Ресейде гемофилияға шалдыққан 84 мың науқастың ішінде дәл Радамирдің симптомдары мүлде кездеспеді. Клиникалық зерттеуге қатысып, жаңа препаратты сынақтан өткізді. Радамир үшін шығарылған дәрілер оның денсаулығына оң әсер етіп, бүгінде басқа балалармен қатар мектепке барды. Оның еміне жыл сайын миллиондаған қаржы кетіп, күн сайын өте көп мөлшерде дәрі қабылдау тиімсіз болғаны анық. Ал, қазір клиникалық зерттеуден сәтті өткен препараттың арқасында тек аптасына 3 рет қана доза қабылдайды. Клиникалық зерттеу жүргізу әдістері елімізде экономикалық жағынан да аса тиімді болмақ»,-дейді Тамара Рыбалова.

Алматы

Жиын барысында мамандар отандық фармацевтиканы дамыту мен препараттар ойлап табу қажеттілігі  де сөз болды. Себебі, кез келген препараттың кері әсері болуы мүмкін. Әсіресе шетелде шығарылатын немесе басқа мемлекеттерде сынақтан оң нәтиже көрсеткен дәрілердің өзге аймақтарда кері әсер етуі ғажап емес. Қазақстан экологиялық, географиялық тұрғыдан алғанда денсаулық көрсеткіші төмен елге жатады. Генетикалық нысанда да әлдеқайда айрықша белгілер бар. Сондықтан отандық дәрі өндірісі мен оны қазақстандықтар ағзасына әсерін білу үшін клиникалық зерттеулер жүргізу медицинаны дамытуда, сапалы медициналық қызмет көрсетуде маңызды екенін атап өтті. Қоғамда әр алуан пікір тудырған Заң жобасын халыққа дұрыс жағынан түсіндіру керектігін, азаматтардың клиникалық зерттеуге қатысушылар сынама объектісі болады деген жаңсақ пікірінің орынсыз екенін де ескертті.

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Пікір қалдыру

пікір