03 مامىر, 2024 بارلىق ايماقتار
قازاقستان, وزبەكستان جانە ازەربايجان بىرلەسىپ, كاسپيي تۇبىمەن كابەل تارتادى
تاشكەنت قالاسىندا قازاقستان, وزبەكستان جانە ازەربايجاننىڭ ەنەرگەتيكا مينيسترلەرى كاسپيي تەڭىزىنىڭ استىمەن ەلەكتر كابەلىن تارتۋ جوباسىن ىسكە اسىرۋ تۋرالى ۋاعدالاستى,- دەپ جازادى qamshy.kz اقپارات اگەنتتىگى inbusiness.kz سايتىنا سىلتەمە جاساپ.
فوتو: اشىق دەرەككوزدەن
قۇجاتقا ساي, اتالعان ءۇش مەملەكەت كۇن, جەل جانە سۋ ەلەكتر ستانسياسى سياقتى ەكولوگيالىق تازا كوزدەردەن وندىرىلگەن ەلەكتر ەنەرگياسىن وزگە ەلدەرگە ەكسپورتتايدى.
ول ءۇشىن الدىمەن كاسپيي تەڭىزىنىڭ استىمەن جوعارى ۆولتتى كابەل تارتۋ جوسپارلانىپ وتىر.
بۇل رەتتە ەنەرگەتيكا ءمينيسترى الماسادام ساتقاليەۆ بۇعان دەيىن كاسپيي تۇبىمەن كابەل وتكىزۋ جوباسىن ىسكە اسىرۋ ماقساتىندا تەحنيكالىق تاپسىرما ازىرلەنگەنىن اتاپ ءوتتى.
"تەحنيكالىق تاپسىرما شەڭبەرىندە حالىقارالىق ترانسميسسيالىق دالىزدەردى دامىتۋ جانە ەۋرووداق ەلدەرىنە جاسىل ەنەرگيانى ساتۋ ءۇشىن جوبالىق بيزنەس-مودەل ازىرلەنەتىن بولادى. جوعارىدا ايتىلعانداردىڭ نەگىزىندە ءۇش ەلدىڭ ەنەرگەتيكا مينيسترلىكتەرى وزدەرىنىڭ ەنەرگەتيكالىق جۇيەسىن بىر-بىرىمەن بايلانىستىرۋ جونىندەگى ىنتىماقتاستىق مەموراندۋمىنا قول قويدى", &ndash؛ دەدى ول.
الماسادام ساتقاليەۆتىڭ اقپاراتىنا سايكەس, قازىرگى ۋاقىتتا اتالعان جوبانى ىسكە اسىرۋ بويىنشا بازالىق مەحانيزمدەر تالقىلانىپ, بارلىق تاراپتارمەن كەلىسىلدى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر