جۇلدىزاي تەمىربەكقىزى: كىشكەنتايىمنان فورما كيۋدى ارماندادىم

بۇگىن ەلىمىزدە قۇتقارۋشىلار كۇنى اتالىپ وتۋدە. ؛كاسىبي مەرەكەنىڭ بەكىتىلۋى ەلىمىزدە توتەنشە جاعدايلار جونىندەگى ورتالىق مەملەكەتتىك كوميتەتتىڭ قۇرىلۋىمەن بايلانىستى. وسىعان وراي ؛qamshy.kz اقپارات اگەنتتىگىنىڭ ءتىلشىسى ءورت ءسوندىرۋ سالاسىندا رەديوتەلەفونيست لاۋازىمىندا 8 جىل بويى قىزمەت ەتىپ كەلە جاتقان جۇلدىزاي تەمىربەكقىزىمەن سۇحباتتاستى. ؛

جۇلدىزاي تەمىربەكقىزى 1994 جىلى قىزىلوردا وبلىسى شيەلى اۋدانى جولەك اۋىلىندا دۇنيەگە كەلگەن. كىشكەنتايىنان فورما كيۋدى ارمانداعان ول ءقازىر ءورت ءسوندىرۋ سالاسىنىڭ بىلىكتى مامانى. ول مەكتەپ جاسىنان سپورتقا جاقىن. سول سەبەپتى بۇل ماماندىققا ءتۇسۋ وعان اسا قيىن بولمادى. ؛

"كىشكەنتاي كەزىمدە ۇيىمىزگە قاراما-قارسى ورنالاسقان كورشى ءۇيدىڭ قوراسى ورتەندى. ورتەنگەن اۋماقتىڭ كولەمى ۇلكەن ەدى. كورشىلەردىڭ ءبارى قولىنا شەلەك ۇستاپ, ءورتتى سوندىرۋگە كىرىستى. كىشكەنتاي بولسام دا قولىما ەسىك الدىنا سۋ شاشاتىن شلانكانى ۇستاپ الىپ كومەكتەسۋگە تىرىسقانىم ءالى كۇنگە دەيىن ەسىمدە. جانىپ جاتقان قوراعا جەتپەسە دە, شلانكانىڭ اۋزىن باسىپ, سۋ شاشىپ جۇرگەنمىن. سول كەزدە كورشى اعايدىڭ ءبىرى كۇلىپ, "وسكەندە ءورت ءسوندىرۋشى بولاتىن شىعارسىڭ", دەپ ايتقان ەدى. ءقازىر بالا كەزىمدەگى ارمانىم شىندىققا اينالدى", دەيدى جۇلدىزاي تەمىربەكقىزى. ؛

جۇلدىزايدىڭ ايتۋىنشا, بۇل ماماندىق نازىك جاندىلار ءۇشىن ءقاۋىپتى ەمەس. "ەرەجەگە ساي جۇمىس ىستەسەڭ حالىقتان العىس الىپ جۇرەسىڭ", دەيدى ول. ؛

العاشىندا بۇل ماماندىقتى تاڭداۋىنا وتباسى قارسى بولعان, الاڭداعان. ؛

"اكەم قارسى بولدى. وتباسىمدا ەرتەڭ تۇرمىس قۇرعان كەزدە قيىن بولماي ما, سەنى قولداي ما دەگەن قورقىنىش بولدى. ءبىراق مەن ءوز تاڭداۋىمدى جاسادىم. ۇيدەگىلەر ءمۇعالىم نەمەسە مەدبيكە بول دەپ وقۋعا تۇسىرگىسى كەلدى. الايدا مەن بۇل سالالارعا قىزىقپادىم. 9-شى سىنىپتان كەيىن توتەنشە جاعدايدا قورعانۋ ماماندىعىنا ءتۇسىپ, وقۋدى اياقتادىم. كەيىن ماماندىق بويىنشا جۇمىسقا تۇردىم.", دەيدى ول. ؛

بارلىعى بالا كەزگى ارماننىڭ سوڭىنان ەرۋدەن باستالدى. العاشىندا بۇل سالادا جۇمىس ىستەۋ پسيحولوگيالىق تۇرعىدان قيىن بولعان. ال ءقازىر جۇلدىزاي بارلىق جاعدايدى سالقىنقاندى قابىلداۋعا تىرىسادى. ؛

"كەزەكشىلىكتە تۇرعان كەزىم. 101 جەلىسىنە قوڭىراۋ ءتۇستى. 5 جاسار بالا قۇبىرعا ءتۇسىپ كەتكەن ەكەن. قۇتقارۋشىلار بىردەن جولعا شىقتى. الايدا بالانى قۇتقارا المادىق. قۇبىردان بالانىڭ ءمايىتى تابىلدى. سول وقيعا وزىمە اۋىر ءتيدى. "بالاسىنا دۇرىستاپ قاراماي ما؟" دەپ اتا-اناعا دا ىشتەي كىنا ارتتىم. جاڭاعى بالا ويىمنان كەتپەي قويدى. ءبىراق الدا نە بولارىن ەشكىم بىلمەيدى. سول بالانىڭ اتا-انانىڭ جاعدايى دا الاڭداتتى. قاي اتا-انا ءوز بالاسىن جاماندىققا قيادى؟! كەيىن كەز كەلگەن جاعدايعا سۋىققاندى ءارى ەكى تاراپتى قاراۋ كەرەگىن ءتۇسىندىم. جۇمىسىمىزدىڭ اۋىر تۇسى دا وسىنداي پسيحولوگيالىق قيىندىقتار دەپ ويلايمىن", دەيدى جۇلدىزاي. ؛

دەسە دە ول بۇل ماماندىقتى تاڭداعانىنا ەش وكىنبەيدى. كەرىسىنشە, وسى كۇنگە دەيىن جەتكەن جەتىستىگىمەن ءماقتانادى:

"وزىم جۇمىس ىستەيتىن ءورت ءسوندىرۋ سالاسىنىڭ ءيميدجىن كوتەرگىم كەلەدى. وسىعان بايلانىستى الەۋمەتتىك جەلىدە بلوگ جۇرگىزىپ باستادىم. بۇل باستامامدى ءارى قاراي دامىتقىم كەلەدى. قازىرگى كەزدە قىز بالالارعا شەكتەۋ كوپ. "سەن قىز بالاسىن, ءورت ءسوندىرۋ سالاسىندا جۇمىس ىستەي المايسىڭ" نەمەسە "بۇل سالادا ەركەكتەر كوپ, ولاردىڭ ويلارى جامان بولادى" دەگەن سەكىلدى ءارتۇرلى ميفتەر ايتالادى. اركىمنىڭ ويى ءارتۇرلى, ارينە. الايدا قىزداردىڭ ارمانىن شەكتەمەۋ كەرەك. ءورت ءسوندىرۋ سالاسىنداعى بارلىق ارىپتەستەرىممەن جاقسى ارالاسامىن. مۇنداعى ەر ازاماتتار ۇنەمى قولداۋ ءبىلدىرىپ, كومەكتەسەدى. ماعان الەۋمەتتىك جەلىدە كوپ قىزدار جازىپ, اقىل-كەڭەس سۇرايدى. پاراقشامدى سول قىزدارعا كومەكتەسۋ ءۇشىن اشتىم دەسەم دە بولادى". ؛

جۇلدىزاي تەمىربەكقىزى بۇل سالادا جۇمىس ىستەگىسى كەلەتىن ادامنىڭ بويىندا باتىلدىق, مەيىرىم بولۋى كەرەك دەپ ويلايدى. سونداي-اق بە ءورت ءسوندىرۋ سالاسىندا قىزمەت ەتۋ ءۇشىن بەلگىلى شارتتار مەن شەكتەۋلەر بار.

"35 جاسقا دەيىنگى ازاماتتاردى جۇمىسقا الادى. سونداي-اق سپورتتىق سايىستار بولادى. اتتەستاسيا تاپسىراتىن بولعان سوڭ وسىعان دايىن بولۋ كەرەك. نەگىزى قىز بالانىڭ قولىنان بارلىعى كەلەدى. ءبىر قولىمەن الەمدى, ءبىر قولىمەن بەسىكتى تەربەتەدى دەپ بەكەر ايتپاعان. سول سەبەپتى قىزدارعا ايتارىم: ارمان-ماقساتتارىڭىزدان باس تارتپاڭىزدار! ەشكىم ءبىلىپ تۋعان جوق. سول سەبەپتى قۇلشىنىس بولعان ادام كەز كەلگەن نارسەنى وڭاي ۇيرەنەدى", دەيدى ول. ؛